He nu testimony hi kan tlangzarh teh ang, a phalna thapin. A ngaihnawm bakah zir tur a tam tlat.

“Ka nun ka en let leh hian siam danglam theih tawh si loh inchhirna ka ngah asin! Tleirawl chhuah tirh, mahni tawka that vanglai ve tak khan ngaizawngtu pawh ka nei ve nual a. Mahse, sports lam ka tui avangin mipa kha ka ngaihsak lem lo. Thiante tih ang chu changkannaah ngaiin zu inte ka ching chho ve ta a. Inkhelh lam chawlhsanin khawvel lam chu ka hawi zau ta telh telh a, kar loah a ngawl vei ka lo ni ta der mai. Mi min selnate chu engahmah ngai lo angin ka duh dan danin ka awm chho ta zel a.

“Phaiah ka chhuk a, hna ka zuk thawk ve mawp mawp a. Chutah ka rin loh takin tlangval hmeltha tak, hleitling leh zei tak, a hawiherah reng mi neinung tih hai rual loh, bike te, car-te pawh nei zut mai nen chuan khuanu ruat tih phuahchawpin kan in-hmel-duh ta a. Ka chhuangin amahah rinna ka nghat thui hman em em a. Kar loah nupa angin kan cheng dun a, inneih hial kan sawi ta a.

“Kan haw chhoha ka chhungte nena ka inhmelhriattir chuan ka nu chuan, ‘He pa hi i neih chuan i nun a rethei dawn,’ min ti nghal ta tlat a nih chu. Ka rilru a hnual em em a. ‘Nu, ka siam tha thei ang, ka hmangaih asin,’ ka ti hram a. Ka nu chuan, ‘A nu leh pa pawhin an siam theih loh chu nang tehlul hian i siam tha thei ang maw?’ min ti a. Nu hmangaihna, an fate tana thil tha hre tlat mai thinlung kha tun hnuah hian a mak ka ti hnuhnawh.

“Inah pangngai takin ka awm leh ren rawn a. Ka rin loh leh beisei loh lutuk lam atangin zankhat chu message ka dawng a. Kan veng KTP hruaitu hlun chuan min rawn be hlawl a nih chu. Min rawn zilh vel a tum a niang tiin ka chhang duh lo a. Mahse, nelawm leh zaidam takin min be zel a. Tum khat, KTP intihsiaka tel ve tura min rawn sawm tlai phei chuan ka pindanah zu ka lo thlit mek lai a ni pek a!! Ka hnial a; mahse, chhungte nawrna avangin ka tel ve ta nge nge a, pakhatna ka la ni zui!!

“Kan innel zel a, a lo leng ta zeuh zeuh a. Ka phu lo ka tih avangin min duh tak tak ka ring ngai lo, ka mizia-in a type lo nasa bawk sia! Ka duh lo. Pathianin min pek a tum ngei chu a ni ka ti hnuhnawh, tun hnu hian. Min duhin min hmangaih tak tak tih chu ka pawm. Mahse, khawvel kan chena kan hlim lai tak a ni si a. Ka bialpa changkang ka tih zawk nen ka khaikhin a. KTP pa chu a tla ta vang vang a. Changkang lo ka tiin thing ka tiru em em a. ‘Mi kuah pawh tum lo, zei lo, inkhawm ang ti reng ringawt,’ tiin ka lensan ta fo thin a. Veng hla taka ka bialpate nena kan kal a, ka ruih a, ka haw theih loh tuma, ‘Min rawn lam rawh,’ ka tihte hian KTP pa chuan min rawn lam duh tlat tho a nih chu!! Mahse, kohhrana inhmante hi changkang lo ka ti thin a, ka ngaisang lo a, inhmuam up lutuk engmah hre ve lo turah ngaiin rilru na takin ka siam ta a nih kha! Ka va inchhir leh si em!

“Chuan mi hausa fapa zawka chu tifuh inti takin ka inruktir ta a. Mahse, kan inngaihzawn laia min duatna leh care khan kar hnih bak a daih ta hauh lo. Keimahah a hlim tawk viau emaw ka tih laiin a lo ni reng reng lo. Ni tin zan tin a leng a, khawhar takin inah min dah a. A chhungte bulah inthlahrung reng rengin, ‘I pasal pawisa hehzia hi,’ an tih reng avanga kekawrte pakhat man pawh dil ngam loin ka awm a. Hun eng emaw chen chu a that hun beiseiin ka nghak ni tin thin. Mahse, nghah chhuah ni a awm thei loh avangin beidawngin ka haw ta a. Kan innei zui leh ta lo. Nau ka lo pai hman si! Mahniin ka fanu chu ka enkawl a, sual hle mah ila ka nu min fuihna avangin ka inkhawmpui ve hram hram thin.

“Tum khat chu tunhmaa ka hnawl tak avanga ka nu kokia mittui tla chunga min beidawnsantu KTP pa, ka ngaihsan ngai loh thin em em mai nen chuan mahni fa kai ve vein Biak in bathlarah kan intawk ta hlawl mai a. Kan hamhaih deuh a niang, kan nui huk a, kan inchibai a, fate ve vein min pawh reng bawk si avangin inbiak rei theih pawh a ni lo. Kan inkalpel a, ka va hawi let hram a. A nupui nen, a fanu nen hlim taka nui chunga an inkai dial dial chu ka va hmu a. Ka ui lutuk a nih chu!!

“Kohhrana a tangkaizia leh in leh lo an din tawh thute ka nuin min hrilh zui a. Ka bengkhawn duh lo der a; mahse, ka thinlung chuan ka inchhir ngawih ngawih a nih chu. Ka lo ten thin em em, kohrana inhmang, ‘church boy’ tia kan lo nuih thin kha tunah chuan khitah, keini khutah kan lo awm ta si. Ka inchhirzia chu!!

“Lo nei ila tuna ka dinhmun, ruihtheihin a tihhmelchhiat tawh, nuthlawi satliah hi ka ni lo mai tur! Biak in kawtah chhungkuain nui her herin kan inkai ve mai tur a nia! An chhungkua hlim taka an inkai del del kha ka hmu leh thin a, ka ui a ni! Neih leh a rem tawh si lo. Ka lo thlan zawk lah chuan kan fanu a care tawh reng reng si lo, damdawi chu vawiin thlengin a duh ber a lo ni ta si a.

“Mizo thalaiten changkanna kan thlir dan dik lo vang hian fahrah pawh an tam phah (ka fanu tiamin) tihte ka zir chuak a. Nu leh pa thu lo awih mai ila chu tuna ka inchhirna ang hi ka tawng lo tur,” tiin mittui parawl kiangin a chanchin chu min hrilh melh melh a.

He nuthlawi chanchin min hrilh hian ka ngaihtuahna a tithui hle. Nu leh pa thuawih tur hian kan rinna bu hian min zirtir a. Dam reina, dam chhunga hlimna, malsawmna a awm a ti mawlh mawlh reng a. Mahse, thalai lungmawl, intifing si hian keimahni ngaihtuahna no zawk hmangin, dik zawk inti takin nu leh pa thute hi kan hnial ve ta tlat thin a, vanduainate hi kan tawngbaw ta fo reng a nih hi. Kawng engkimah nu leh pa thuawih hi a fuh fo. A hnua, "Ka ui lutuk a!" kan tih leh loh nan!!