Harrold Abbott-a chuan, “Mi lungngai hma chi ve tak ka ni \hin a. Kum 1934 \hal laia Webb City-a ka thil tawn chuan ka lungngaih \hinna zawng zawng a um bo vek. Second sawm chhung leka thil thleng mai a ni lehnghal. Mahse, chu second sawm chhunga ka thil zir thar chu a hma kum 10 chhunga nun dan ka zir aia tam daih a ni thung.

“Webb City-ah nepnawi dawr siamin kum hnih zet chu ka inham buai ve a. Hlawk chu khawi lamah, ba rul reng rengin ka buai a ni kumtluan mai. Ka sumdawnna chu ka tlachhe vek a, dawr pawh chu khar a ngai ta nge nge a. Kansas lama hnathawh tur zawn tuma ka kal theih nan Bank-ah pawisa puk ka rilruk a. Ui dawih zawk ang maiin meikhupin bank lam chu ka pan hnuk hnuk a. Huaisenna leh chakna pawh ka nei tawh lo.

“Chutia dar uai hnuanga ka kal kun lup lai chuan pa pakhat, ke nei miah lo hi ka tawk ta a nih chu! Thingphel lirtheiah a \hu a. A kuta thingbung a hum hmang chuan a rawn inbeng tawlh zar zar a. Kawng a rawn kan fel a, kea kalna tura a rawn innawr kai tur rawn hawi chhoh deuh lai leh keia lungngai hnuai lam ena kal kun lup mai mit chu a intawng ta chat mai a. Hlim hmel em em mai leh awki zang vah mai hian, ‘Ka pu, chibai! Vawiin khua chu a va’n nuam em tiraw,’ tiin min rawn nuih vur vur mai a nih chu.

“Chutia ding chunga amah ka en lai chuan ka lo hausak sizia chu ka ngaihtuah chhuak ta a. Ke pahnih ka la nei bik nia maw le! Ka kein ka kal thei nia maw le! Keimah ka lo inkhawngaih ve em em mai chu ka zak ta a. Ani ke pawh nei lo zawk chu a hlim thei tlat. Ani ke bul chu a nui thei tlat. Ani ke bul chu amah a la inring tawk khawp! Ani ke nei lo pawhin a theih chuan kei ke pahnih la nei hian ka thei tur a ni tiin ka inngaihtuah ta a. Ka awm chhung atang chuan chakna a rawn so thar leh ta a. Bank-a dollar za lek puk rilruk kha ka ni a; mahse, dollar zahnih puk ngam turin ka huaisen thar ta thut mai a. ‘Kansas-ah hna zawng turin kal ka rilruk deuh,’ ti ngam \awk kha a ni a. ‘Kansas-ah hna hmu turin ka kal dawn,’ ka ti ngam ta hial a. Pawisa chu ka puk a, hna pawh ka hmu ta reng a ni.

“Ka bual in darthlalangah chuan he thu tawi te, ‘Kalkawnga kebul ka tawh hma kha chuan, Pheikhawk bun tur ka neih loh avangin ka lo lungngai thin,’ tih hi ka tar a, zing tin hmuihmul ziah pahin ka chhiar ziah \hin,” a ti a.

Mahni inkhawngaiha vanduai inti em ema lungngaih ni i nei \hin em? I la chan tamzia ngaihtuah loin i neih loh lam ngawt i thlir \hin a, i lungngai \hin a nih kha. Pheikhawk bun tur neih loh avang hian a lo hlim loh theih tak ang a!

Pheikhawk bunna tur ke nei lo pawh an awm tih ngaihtuah thlen loh chuan! Mobile phone ka neih loh avangin ka lo titau \hin a. Phone humna tur kut nei lo pawh an lo awm asin! Show hmuhnawm tur taka ka kal a rem ve tak loh avang khan ka lunghnur maw! Engmah hmu thei lo mitdel tlat an awm asin! Hla ngaihnawm ka tih tak ngaihthlakna tur ear phone \ha ka nei lo a, ka phun maw? Rimawi pakhat mah hre thei lo bengngawng an lo tam alawm maw le! Ka nu leh pa thil ka dil a, min pe thei lo a, ka thin a rim \hin. Thil dilna tur nu leh pa pawh nei tawh lo an lo kat nuk nia maw le! Ka ngaihzawng nen kan in\hen a, rilru nain thih daih kha ka duh hial a. Ngaihzawng pawh ngaihtuah thei lo khawpa vanduai an awm tih ka lo ngaihtuah ngai lo. Scooty ka neih theih loh avanga inchhunga buaina ka siam lai khan, ei tur pawh nei zo lo an tam tih ka lo hre lo alawm maw le!

Kan neih tamzia ngaihtuah loin ka neih loh lam hlir ka lo en a, ka lo lungngai mai mai a ni. Rethei hi ka lo inti ve em em \hin a. Ka va lo hausa si em!