Inhmuam ûp reng a, un deuha intih pui-thû reng hi a hahthlâk. Coronavirus kai lo pawn kan ‘vei’ vek ta! Thâw ipik kâra han ‘hoh’ zauh emaw han fiamthû ve zauh emaw te hi kan mamawh tlâng vekin ka hria a—chuvâng chuan, tûn tum chu a ‘key’ ka’n thlâk te’ng.

Mi tin hian chêt chhiat châng leh chêt fuh zân loh châng kan neih theuh ka ring. Harh fîm kâra kan chêt chhiat tumte hi ziak theuh ta ila, kan thil ‘vei’ ngut ngut pawh hi a ti kiang ve deuh lo’ng maw tiin, ka chêt chhiat tum ka’n kam khat ve zeuh teh ang.

B Com final year ka zir kum, exam hnaih tawh fê khan George Jones-a hla ‘Who’s Gonna Fill Their Shoes’ hmangin Country musician fam chang tate pualin Lelte Weekly magazine-ah article ka thawh ve a. Khatih lai, 2005 chho khan Lelte magazine pawh kha a la darh zau fû a. Editor, Pu C Dina khan min rawn zawng chhuak ngat mai a. Music lam ziak tûrin min rawn sâwm pek a. Commerce zir e ti lo chuan, ka kal châkna ber media lama kalna remchâng ka hmu kha a va’n lâwm tak—tin, a mi sâwmna kha ka hnar phal ngang lo a ni!

Kum khat dâwn ka thawh hnû, zai thiam te pawh ka interview ve nual hnû, kum 2006 kum tìr lam khan SP-i (B. Malsawmtluangi) album hit zet mai, ‘Ka ngai êm che’ kan tlang zarh nî kha ka la hre reng. Khami nîa ka chêt chhiatzia kha.

Pu C Dina khan ‘Shillong atangin zai thiam ka chah chhuak a. Lou Mojo te nên pawha zaiho thin a ni. Vawiin Spi album release programme-ah a zai dâwn a. A hnuah kan inah i interview tûrin a rawn lêng dawn bawk. I lo chiau-au dâwn nia,’ tiin function tan hmain min hrilh thlap a.

Chu nula chuan zai thiam ka tih leh an hla ka ngainat êm êm thin, 4 Non Blondes hla, ‘Whats Up!’ ngei mai kha a rawn sa pek a. Linda Perry zai thiam ka tihna reh vek khawpin a rawn thlawh fuh a ni.

Function zawh chuan Pu Dina car hnungah chu nula nên chuan Lelte office (Pu Dina te in) panin kan thu dûn ta vâng mai. Kawng tluanin Linda Perry leh Khasi guitarist, India ram puma lâr pha (Zorock-a ‘Zoram Ngaih Hla’ intro leh interlude zawng zawng perhsaktu) ka ngaihsânziate kha English hlîrin ka hrilh ta pel a. Ani, nulai pawk pawn saptawng vekin min chhâng zui ta zêl. Mahse, U Duha (driver) leh Pu Dina, seat hmaa thute chu an nui dun leh tet tet thin—a chhan erawh ka hre lo!

Pu Dina khan, ‘Shillong lam mi, Mizo hla sa ngai lo a nia. ’Bâkah tun tum hi Mizorama a vawi khat rawn kalna a ni hial mai thei,’ a tih vânga thiam zawng zawng zo dâwn dâwn thlenga saptawnga be lui ve hrâm hrâm kha ka ni a.

In kan thleng ta. Motor atangin kan chhuk. Pu Dina nupui, an kawta pangpar tui lo pe mêk Nu Mangûri chuan, ‘Awiii… Tete! A tâwpa tâwpah chuan kan inhmu ta nge nge alawm tiraw?’ tih pahin a lo kuah.

Ani nula-i lah chuan, ‘Awi, Nu Mangûr! In lo dam tha zâwk maw? A taka hmuh ka châkna che rei tawhzia hi,’ tiin Tetei Ralte chuan Mizo tawng pai map loin a ti lêt zui ta mai!

Khami tuma ka zahzia leh chhan awm miah loa bathroom ka pan ranzia kha aw… Mahse la, Tetei Ralte nên khan a hnû thleng kan innêl zui phah ta zêk a!