Zawhna: Ka pu, tleirawl kum 17 mi ka ni a, ka vun hi a nung lo ti ila ka sawi sual lo vang. A dum em em a, Whitening Cream vun tieng tur engpawh hi ka hmang deuh vek tawh a; mahse, ka êng thei miah lo va, engtin nge ti ila tha ang? Khawngaih takin min pui thei ang em?

Chhanna: I zawhna atang hian hmeichhia i nih ka han ring hmasa ngawt phawt a. I kum ang rualah hian vun rawng hian ngaimawh a hlawh hle mai. Kan society mai pawh ni lovin, India ramah hian ngo châkna thlarau hian mi tam zawk rilru a luah a. Chumi chu an hriat avangin cream lam siamtu company tam ber hian an product-ah pawh “Whitening Cream” tih hi an telh phah fo reng a ni. Vun ngo ngaihsanna hi kan hnam nunah pawh hian a bet nghet hle mai a, chu mai ni lovin khawve lhmun dangah pawh he rilru hi a lian a, chutiang avang chu a ni pakhat ang a, tun hnaia US-a mihang thihna avangin #blacklivesmatter tih tawngkamte pawh a lo chhuah phah hial reng a ni.

Kan vun rawng siamtu hi kan taksaa pigment chi khat, Melanin-ah a innghat a, he pigment (rawngsiamtu tihna a ni ber) hi kan vuna timur melanocytes siam a ni a. Ni ênga kan han awm khan kan vun timurte hian he pigment hi an lo siam ta thin a ni. Hnam/chi hrang hrang azirin he pigment hi a tamin a tlem a, mihang kan tih, blacks-hoah chuan he pigment hi a tam bik a, chuvang chuan an vun rawng pawh a lo thim ta thin a ni. Vun rawng “Hang leh Ngo” hi kan duh vanga thlak danglam mai theih a ni lo va, kan pianken (genetic) a nih vangin kan nih ang ang kan pawm thiam a pawimawh hle. Nang ngei pawh hi i han avanga hrehawm tihna i neih hi a hriatthiam theih viau; mahse, ngo lo chi i nih chuan cream tha ber ber pawh hmangmah la i inthlak danglam thei chuang lo vang.

Vun nung lo i tih lai tak zawk hi ngaihtuah chian a ngai a. Hrisel tha pangngai i nih a, ruihtheihthil emaw, zuk leh hmuam lam chi te i ti thin a nih loh chuan vun nung lo (a saptawng takin DULL Skin) han intih ngawt chhan tur a awm hran lo vang. Vun mai ni lovin taksa peng hrang hrang hriselna atan chuan ei leh in uluk te, zan mut that te, taksa sawizawi tamte hi a pawimawh hle mai. Kan vun rawng hi kan duh vanga kan thlak danglam theih loh zinga mi a ni a, hrisel lohna dang i nei lo a nih chuan pawm thiam zir zawk la, rilru hrehawm nan hmang lovin confidence neih tum zawk la, hma i sawn phah ngei ka ring.