Kamchhuak

KAMCHHUAK : NI BERIN A LANG (Matric result behchhanin)

K. Lalrinchhana - May 25, 2022

Matric kan zir lai ang renga lehkha kan zir chhunzawm zel chuan kan hma hun a eng ngei ang. Matric pass hnua taima chhunzawm a piang, thahnem ngaihna chang hria a piang an ding chang a, matric pass hnua inthlahdah a piang hi, amah Zorock hla dungthulin, an zuih ral ta mai NI BERIN A LANG.

Matric result a chhuak a, mi sing chuangin matric an pass leh ta. Hetih rual hian pass zo ve ta lo pawh mi 4,928 zet an ni bawk. Kumina HSLC pass percentage hi 70.64% a ni a, zaa 29.36% an fail tihna a ni. 

Matric exam-naa tih that hi a pawimawh a, chutih rualin HSLC exam result hi hmalam hun hriltu erawh a ni ber lo. Matric exam-naa ti tha tak, division sang taka pass, a hnua eng ni zui ta lo tam tak an awm tawh a. Hetih rual hian matric exam naa ti tha vak lo, a hnua mi hlawhtling tak ni zui ta te pawh an awm nawk tho mai. Ziaktu ropui L Keivom kha matric vawi hnih a fail a, a vawithumnaah a in ziak tling ve hram a ni. Matric exam-naa a performance en chuan a lakah beiseina tih san vak chi a ni lo mai thei. Mahse, IFS ah a inziak tling thei tlat a ni.

Kan thianpa pakhat pawh lehkha thiam thei leh thluak tha tia sawi tur a ni lo, matric pawh third division ah a pass hram a ni. Mahse, a pawl a sang tawlh tawlh a, a taima tawlh tawlh a, taima na na na chu a ti tha tawlh tawlh bawk a. Tha takin Master degree a zo a, PhD a tih chhunzawm leh a, tu duhsak vang pawh ni loin, ama thiamna leh taimakna vang liau liauin University ah a lut a, mi tam takin a hnuaiah research an ti mek a ni. A matric result en chuan chutiang dinhmun thleng tura beisei chi a ni lo. Amaherawhchu, a bultanna chu ropui lua lo mahse thawhrimna leh taimaknain a chhunzawm a, a hmawrbawkna erawh a tha a ni.

Vawi thum exam-naa matric pass hram te pawh IFS an nih theih a, matric third division-a pass te pawh University Professor an nih theih chuan vawina zirlai lehkha thiam thei tak, bright bawk si, smart bawk si, matric exam-naa distinction a pass thei ngat, subject tam taka letter mark hmu thei te hian an tum phawt chuan an duh duh (an nih tum a piang chu) an ni thei ang tih hial tham a ni. Manipur Chief Secretary hlui Pu PC Lawmkunga te, Mizoram Chief Secretary hlui Pu M Lalmanzuala te hi second division-a matric pass te an ni a, matric result ah chuan nimina matric pass thar sang engemaw zat ai khan an ti chhe zawk a ni.

Matric exam naa tha taka pass hi a hlu a, chu aia pawimawh zawk chu a hnu lama taimak chhuah chhunzawm zel hi a ni. Zofate zinga IFS hmasa ber Pu KC Lavunga (L) khan taimakna pawimawh zia hi a sawi uar thin khawp mai a, a sawi awm ber pawh a ni bawk. High School zirtirtu ni chungin leh chhangchhe pa ni chungin lehkha a zir tha leh a. Fa pasarih a neih hnuah a chhangchhiat berh lai takin UPSC exam hmachhawn turin a inbuatsaih a, IFS ah a tling thei a ni. Chhuanlam siam duh se chhuanlam tur a ngah ngawt ang. Chhunah school-ah naupang a zirtir a, tlaiah an nu feh hlanin ei rawng a bawl a, nau a awm pah a, zanah naupang mut reh vek hnuah Laltin engah lehkha a chhiar a, zingah khuantevikah a tho a, naupang thawhhmain a zir leh tlauh tlauh thin. Chutiang taka a thawkrimna leh a taimakna chu chung lamin mal a sawm a, a tum tak IFS pawh a ni ta reng a ni. Pu KC Lalvunga’n hlawhtlinna atana thil pawimawh pathum a sawi chu- Taimakna, taimakna, taimakna tih a ni tawp mai.

Matric kan pass hnu hian zin kawng thui tak zawh tur kan la nei a, kan zin khawng hi a la in tan dawn leih leih chauh a ni. Matric-a kan tih that avanga kan inthlahdah a, kan ngaih kan tih that mai chuan mi hnungah chaurau ek kan thai mai ang. High School kal lai chuan nu leh pa thlazar hnuaiah kan awm a, thahnem ngaih vang pawh ni loin nu leh pa te hlauh vang tal pawhin in lamah lehkha kan zir chhunzawm thin. Hostel-a awm te pawh chuti tho chu an ni. Zingah hun bi neiin hma takah zirtirtu te’n an kai tho a, lehkha an zir a, zanah pawh duh hun hunah an mu ngawt thei lo. Peihin peih lo mahse zing leh zanah hun bi fel tak neiin lehkha an zir char char thin. Chutiang taka khuahkhirhna leh enkawlna hnuaia lehkha zir an nih avang chuan exam-naah pawh an ti tha nge nge thin.

Matric pass hnuah erawh puitlinga ngaih kan ni tawh a, khawiah pawh awm ila chhia leh tha hriatna fim tak hmanga mahni tana tha tur leh tha lo tur thiar hrang thiam tura ngaih kan ni. Matric pass hnu chuan thenkhatin phaiah lehkha an zir a, nu leh pa te’n an hmu pha tawh lo a, High School ang diak diaka inkhuahkhirhna leh inenkawlna a awm tawh si lo, thahnem ngaihna chang hre lo tan chuan boralna khawpui a ni ringawt mai.

Matric-a kan tih that hi chhawmnung zel tura taimak kan chhuah a, zingah kan thawh hma thin dan anga kan thawh hma zel a, matric kan zir lai ang renga lehkha kan zir chhunzawm zel chuan kan hma hun a eng ngei ang. Matric pass hnua taima chhunzawm a piang, thahnem ngaihna chang hria a piang an ding chang a, matric pass hnua inthlahdah a piang hi, amah Zorock hla dungthulin, an zuih ral ta mai NI BERIN A LANG.

Share now