Thukhawchang

KAN BUAINA BUL ‘GOVERNANCE’

Lalthlamuana Ralte - Aug 02, 2014

KAN BUAINA BUL ‘GOVERNANCE’

Tunlaiin thil thleng rapthlak pui pui kan hre zing malh malh hle mai. Sar thihna chi hrang hrang - lirthei accident, tharum thawhna leh tualthahna/tualthihna leh a dangte a thleng zut zut a; dan kalha sumdawnna chi hrang hrang - kep (detonator) tawlh ruk te, ruihhlo leh ruihhlo siamna tur damdawi (pseudoephedrine) tawlh ruk te a hluar hle a, chutianga inhnamhnawite zingah chuan mipui vantlang chung lama ngaihte an tel leh nawlh thin bawk. Heng bakah hian kumin chhungin Aizawlah bomb vawi ruk tihpuah a ni tawh bawk a, mahse, mak tak maiin a titute hi man chhuah an la ni lo thung. Chutihlaiin, Ningani (July 31,2014) a police hotuten kum chanve chhunga dan bawhchhiatna/suahsualna thil thleng an thlirletnaah nikum aiin kumin hian thubuai ziah luh nasa takin (21% laiin) a pung tih an sawi ta deuh deuh bawk. Heng zawng zawng ngaihtuah hian kan ram hi a ralmuang chiah em? Mipui nun hi a him ta lo hle em? tih te hi inzawh theih tak a ni ta. Ngaihtha tak leh thlamuang taka kan awm mek lai hian a rukin kan lo him lo hle mai a lo ni zawk lo maw? Mi thenkhat lah chuan kan ram hian chhiatna rapthlak tak 'Hun thim thuah hnih' a tawng dawnin an la sawi tak deuh deuh bawk, tunlai kan hun tawn mek avang hian chutiang mite thu leh hla chuan ngaihven a hlawh phian leh nghal a. Lehlam zawngin thlir ta ila, kan hun tawn meka chhiatna leh buaina lo thleng avanga political party thenkhatin sorkar an dem mek lai hian sorkar inrelbawlna tha (Good governance) kan mamawh zia a lang chiang hle a ni. Ram leh hnamin harsatna a tawh apiangin mipuiin sorkar kan thlir lo thei lo a, kan beisei anga a vei tawk lo emaw a che chang duh lo emaw hmalak a tum lo emaw a nih chuan mipui phun thawm chu ring tur a ni reng a ni. Hman deuh khan kan rama sar thihna chi hrang hrang - accident, mahni intihlum, tualthah, etc., thlen nasat zia titi phunglengin kan sawi a, heng zawng zawngah hian mawhphur ngam leh a tireh tura hmalak tum sorkar kan nei lo a vanduaithlak zia te kan sawi a. Kan bula awm ve sorkar lai MLA pakhat chuan, kawngpui nei tha leh inrelbawlna tha nei USA ah pawh road accident a thlen tam zia te, an sorkarin mawh an inphurhtir bik loh thu te a sawi ve thung a. Mahse, ram changkangah chuan dan rorelna an ngai pawimawh a, zurui chunga lirthei khalh phal a ni lo a, an man hmak zel a, mipui himna an ngaihpawimawh avangin pawikhawihna thleng tur pawh an veng nasa a, an rama cheng zat atanga chhutin kan ram ang hian tualthahna/pawngsual/ accident/mahni intihlum te hi thleng ve ngat se chu mipuiin an sorkar an dem luai luai anga, hma an lak loh phei chuan an mualpho ang kan ti ve thung. Chhiatna lo thlenga mawh inphurhtir ngamna (Accountability) hi sorkar tha zia chu a ni a. Kan ramin harsatna a tawh hrang hrang vei miah lo sorkar kan nei a nih chuan kan vanduai hle tihna a ni. Kan ramah hian kumtin fur laia leimin leh thal laia kangmei chhuak tuar ziah tura in ngaihna hi kan nei nghet viau tawh maithei. Chutiang rilru chu kan hotute leh mipui hian kan pu a nih chuan kan rilru put hmang a hniam zia a lang tihna a ni ang, a chhan chu kan rama chhiatna thleng tam tak hi chu pumpelh theih reng, kan inpuahchah that loh vang zawka lo thleng a ni thin. Fur ruahtui tlak hmain leimin tur ven lawk nachang hre ta ila, sorkar hmalaknain veng tinah (khawtlang hruaitute nena tangrualin) leimin hlauhawm tur te zawn chhuah theih a ni a, lungrem leh insak him tawk lo te, tuihawk luankawr leh tui paihna siamthat ngai te then fai a, kawra bawlhhlawh inchhekkhawm te hai fai a, inpeih sa atin fur lo thleng tur hi hmachhawn ta ila chuan leimin vanga chhiatna lo thleng thin tam tak hi kan pumpelh ngei ang. Chutiang chu governance tha lanna tur pawh a ni. Mahse, kan hotute hmalak dan thenkhat han thlir hi chuan 'good governance' ziarang hmuh tur a vang viau thin. Sorkar inrelbawlna tha neiin thuneitute hian mipui himna tur hi ngai pawimawh tak tak se la chuan zu khapna dan kha an hlip thutin a rinawm loh. Mi tam ber duh dan kalh a MLTP Act an hlip kha democracy palzutna a ni hrim hrim awm e. A hlip an duh a nih rau rau pawhin khatia hmanhmawh taka hlip thut lo khan a nghawng tur ngaihtuah lawkin, bar an hawn hmain zu ngawlvei (an pung thut thei a) enkawlna tur te buatsaih lawkin, (Sethawn a De-Addiction Centre-te hi thuam that a, a dang pawh siam belh a) dan hmanga zu thlah zalenin khawtlang nuna harsatna a thlen lohna turin ruahmanna hrang hrang fel taka siam awm tak a ni. Zu khap bur hnu lawka dan hmanga zu zawrh a nih chuan lang thei leh lang thei lo lamah mipui a nghawng ngei dawn tih chiang sa a ni. Mi thenkhatin an sawi fo thin USA in kum zabi 20-na tir lam (1920-1934) a zu khapna dan khauh tak an hman kha politics zawnga chhut chuan a hlawhchham chiang viaua mahse, mipui hriselna lam zawnga chhut chuan dan hlawhtling tak a ni an ti ve tlat. Zu an khap hma 1911 chho velah khan US a mitthi 100,000 zel a 29.5 chu zu in nasat vanga thinro (Cirrhosis death) an ni a, zu khap lai 1929 chhoah khan 10.7 chauh an ni thung; an khap hma kum 1919 velah khan zu in nasat vanga rilru lama harsatna neite enkawlna hmuna dah luh zat pawh mi 100,000 ah 10.1 an ni a, 1928 chhoah kha chuan 4.7 ah a tlahniam duai a ni. Dan hmanga zu zawrh hunah chuan a tha lo zawnga khawtlang nun inthlak thleng hi kan tawng chho ve thei tih hriain lo inrinlawk nachang hriat ve awm tak a ni. Mahse, sorkar inpuahchahna hmuh tur a awm lem loh avangin zuruiten khawtlang an tihbuai zia hre chiangtu veng hrang hrangten an vengah zu a zalen lohna turin hma an lak nghal a ngaih phah a, mahni venga zu zawrh phal lo an pung zel a nih hi. Lo inpuahchah lawk a tul zia an ngaihtuah hle tihna a ni a, khawtlang nun siamthatna tura a taka beitute an nih avang ngawt pawh hian an hmalakna hi dem ngawt theih a ni lo ang. Sawi kai ta zel ila, zirna siam thatna tura hmalakna tur pawimawh dang tam tak kal pela sorkarin school tan hun tih danglam a ngai pawimawh zawk hi thil mak tak a ni ang. Sum tam tak senga Education Reforms Commission report leh chumi an thlit fim leh te kha bawhzui tak tak a hun tawh hle mai, sawiselna kara school tan hun tihdanglam an tum ang hian hmun hrang hranga zirtirtu inkhai rual lo nasa lutuk te hi huaisen takin siamtha phawt ta se, zirtirtu an indaih loh vanga zirlaite mangang au thawmte hi ngaihpawimawh ni ta se a duhawm khawp ang. Huai taka hmala pawp lo hian an hmalaknain a nghawng tur te, dinhmun te hi zir chiang hmasa phawt thinin, a that dawn leh dawn loh ngun taka buk hnuah chauh thutlukna siam ni thin ta se khua reiah kan thatpui zawk ngei ang. Leiba rulh theih loh tling khawm Cheng tld 54 vel lai sorkarin a nei mek a, a rulhna tura hmalakna mumal a awm bawk si loh laia minister leh parliamentary secretary-te hman tur (an mamawh em em lem loh) Cheng nuai 341 chuang man car thar engemaw zat an lei ngawt te hi sorkar tha zia a ni lo bawk. Mi retheihten lei rem an rah hleih theih loh laia ram hruaituten nawmsakna lam hawi ringawt an ngaihtuah a nih chuan kan hmabak a pui lo ngawt ang. Hman deuha Mizoram MLA inthlan dawn hnaiah sap tawng chanchinbu pakhatin candidate-te sum lei pai neih zat an tarlannaa 'The region is poor and backward but not its politicians' an tih kha ka la hre reng. Africa leh Asia khawmualpui leh hmun danga ram rethei em em, leiba ngah bawk si te hi corruption hluarna ram a ni deuh vek a, an ram dinhmun dik tak hi an hruaitute in leh lo leh an lirthei neih atanga hmuh theih a ni lo a, khawpui dai fem leh veng tlabirh deuha chengte dinhmun atangin a hriat a, an thingtlang khaw dinhmun atang phei chuan a hriat leh zual. Chutiang ang ram rethei tak tak inrelbawlna tha (Good governance) awm lohna ram dinhmun leh kan dinhmun hi a inang sawt viau mai lo maw?
Share now