Mizoramah hian consumer kan nih anga kan dikna chanvo hi palzutsakin kan awm fo a, petrol pawlh dal a ni a, MRP aia sangin bungrua kan lei chamchi a, buk tling loin cooking gas kan khul a, heng zawng zawng hi consumer-te dikna chanvo rahbehna vek a ni a, a tuartu tupawhin Consumer court-ah thubuai kan theh lut thei vek a ni.

Sawrkar laipui hian Consumer-te dikna chanvo humhalh hi a ngai pawimawh em em a, mi tu pawhin awlsam taka thubuai kan thlen zung zung theih nan district tinah hian District Consumer Court (tunah chuan Consumer Commission an ti tawh) a din vek a, District Consumer Commission-ah chuan thubuai ngaihtuahtu tur President pakhat leh member pahnih zel an awm a ni. Consumer Commission-a thubuai theh luh hi a awlsam em em a, pawisa chawi a ngai lo a, a hautak lo a, ukil rawih lah a ngai hek lo. Tin, Consumer Commission that vena riau chu thubuaite hi reilo te chhungin a ngaihtuah a, a ching fel zung zung thin. Consumer Commission/court-in a rel tawh chu high court-ah emaw, Supreme Court-ah emaw pawh appeal theih a ni tawh lo. Chuvangin, a tul phawt chuan kan dikna chanvo humhalh tur hian Consumer Commission-a thubuai theh luh hi i hreh lo ang u.

A hmingin District Consumer Commission-ah hian kum hnih emaw lai member ka ni ve ta a, thubuai hrang hrang (tam tak phei chu a ni law) kan ngaihtuah a, thil pakhat chauh han sawi ila. Hmun pakhatah chuan dawrkai pakhat chuan ran damdawi hi MRP aia cheng 12-a toin a lo hralh a, Consumer court-ah an rawn in khing ta a. Court chuan damdawi zuartu chu cheng sangthum a chawitir a, a khingtu (petitioner) chu a pe hmak mai a ni. Rs 12 kir kim loh vang khan cheng sangthum an chawi ta a nih chu. Chuvangin, MRP aia toa thil thil lei leh hralh reng reng hi dan kalh a ni tih i hre thar leh ang u.

Tin, kan bungraw leite warranty period chhunga shock vang emawa a chhia a nih loh chuan a zuartute khan an siam tha leh ngei ngei tur a ni. An siam tha thei lo emaw, an siam tha duh lo a nih chuan a tharin an thleng leh mai tur a ni. An thleng duh lo a nih chuan Consumer Commssion-ah zualko mai tur a ni a, Consumer Commssion chuan a thar man a chawitir bakah a leitu rilru tihnat man (mental agony) a chawitir tel thin. Dawrkai thenkhatin an dawr kawtah, ‘Thil lei tawh a thleng theih loh’ tih an tar thin a, hmun 10-ah pawh lo tar se Consumer Court-a kalna a dal chuang reng reng lo, an lo tar mawi ve satliah mai mai a ni. Chuvangin, a fing apiangin (ti ila tawngkam mawi lo ni lo se) Consumer Commssion-a zualko nachang an hria a, dawrkai leh sumdawng fing apiangin Consumer Commission pawimawhna an hre bawk.

Tin, Mizoramah hian eirawngbawlna gas hi khawi chingpen a ni nasa a, mipuiin kan tuar nasa khawp mai. Gas bur ruak hi a rih zawng a inang lo thluah a, a bur ruak rih zawng hi a bur pangah a inziak thin. Entir nan, a bur ruak chu kg 15.3 a rit ni ta se, chuta tang chuan 14.2 kg kan belh ang a, a khat chu kg 29.5-a rit a ni tur a ni.  Gas an sem a, hmanhmawh takin, chan loh hlau em emin kan in tlar a, a changin a leak sate kan la a (a leak chuan kawng lakah an khawih chingpen tihna a ni mai), kan rin aiin a lo zang fo thin. Kan ringhlel a nih chuan a semtute kha buktir mai tur a ni. Bukna an keng lo emaw, an buk duh lo a nih chuan Consumer Court-ah khin theih an ni. A chhan chu LPG Marketing Discipline Guidelines, 2018-ah hian a zuartute chuan a leitute hmuh lai ngeiin an buk ngei ngei tur a ni tih a ni a, an buk duh loh chuan dan an bawhchhia tihna a ni mai. 

Mahse, mi tam tak hian han buktir buangbarte kan peih lo a, kg hnih khat leka a lo zan avang khan court-a kal buangbarte kan peih lo a, ‘ni mai mai teh se’ kan ti a, kan phun lungawi leh mai thin. Hetianga kan tih hian mi pamhamte sahmim kan tipuar a, thil sual ti turin an ngampa tawlh tawlh mai thin a ni. Tunah hian gas bur pakhat hi cheng sangkhat chuangin kan khul tawh a, bur khatah kg khat lek pawh kawng lakah lo ru chhuah se, a khawih chingpentu khan bur khatah cheng 77 zel min eisak tihna a ni a, motor lian trip khatah chuan an va eiru nasa dawn em! Tin, gas kg khat lek pawh khan vawi tam chaw chhumna a daih a ni.

Veng pakhatah chuan Branch YMA-ten buk thlap thlap lo chuan hralh chhuah an phal lo a, a rih dan tur (standard weight) aia a lo zang a nih chuan a zanna kg zat kha pawisaah an chantir a, a phurtu driver kha an chawitir nghat nghat mai a, chumi venga sem tur gas chu an khawih chingpen ngam tawh ngai lo. He mite veng anga kan tanruala kan chimlim peih phawt chuan reilote ah gas khawih chingpen hi a reh duakin a rinawm.

Sawi tak ang khan Consumer Commission thutlukna hi high court-ah emaw, Supreme Court-ah emaw pawh appeal thei a ni lo a, miin ngawhngawl chhuahin Consumer Commission thutlukna kha ngai pawimawh loin zawm duh lo se, cheng nuai khat thleng chawitir theih a ni a, kum thum thleng lung in tantir theih a ni bawk. Chuvangin Consumer Commission tih avang hian hmuh hniam tur a ni lo a, court dang ang bawka pawimawh a ni.

Consumer kan nih anga kan dikna chanvo humhalh tur hian i pen chhuak zel ang u.