Kan economy hi a derthawng hle. Zep thu a cheng lo, state sum hnar ber chu sorkar laipui atanga dawn a ni a, chutiang tho chuan kan ram chhunga sum leng vel hi sorkar hnathawk hlawh leh sorkar sum hman chhuahah a innghat a ni. Sorkar hnathawkten hlawh an lak har chuan sumdawngte an inhralh thei lo a, thawhlawm a nghawng a, thil dang dangah a nghawng kal zel thin. Thar chhuah leh siam chhuah tih tham kan la neih loh avangin sorkar laipui atanga sum lokal tam ber hi phai lamah a liam thla leh duak a, kan rama sum leng vel hi rei lo teah a tlem rawk thin a ni. Thilsiam chhuah leh thar chhuah hmun danga thawn chhuah turte hi neih teuh ila, sum luang chhuak aiin lo luang lut hi tam zawk se, sorkar hnathawk hlawh leh sorkar sum hman baka innghahna tur hi nei ila chuan kan economy pawh hi a ngel nghet sawt dawn a ni. Hmanni lawka finance minister-in budget a pharh takah pawh khan sum hman tur (hmuh tur) Cheng vbc 8800 chuangah khan kan state sorkar thawh chhuah ve tur chu Cheng vbc 700 chuang hret a ni. Budget a hman tur atan sorkar hian Cheng vbc 597 vel puk a tum a, sum indaih lohna (puk belh ngai tur - fiscal deficit) Cheng vbc 139 a awm dawn bawk. Chumai a ni lo a, kumin chhunga leiba tlingkhawm hi Cheng vbc 7178 a tling tura chhut a ni bawk. Kan dinhmun hi a chhe zawnga ngaihtuah chuan chhe tak a ni a, thuneitu tan chuan mut mawh hnar mawha neih tham a ni. Mahse, a vei tur bera ngaihte hian an vei tak tak loin a lang bawk si a. Engpawhnise, kan ram economy hi siamthat a ngai a, kan sum leh pai chet vel dan pawh hi kalphung tha zawka her a ngai khawp mai. Economy derthawng takah hian mi hausate hausakna pawh a tlo thei lo. Ram chhung siam chhuah leh thar chhuah zawrh tham nei ve ta lo chu ram pawna mi chawk luh a ngai zel a, sumdawnna khawvelah thil a inlumlet chak bawk si a. Sorkar a inthlak rualin contractor an inthlak a, ruling party bel fuh, minister hnaih deuhte an hausa thut a, eiru leh kuttling lo a la lutte an hausa em em bawk. Mahse, sorkarin sum hman tur a neih loh vang te, sorkar inthlak vang te hian rei lo teah sum nei tak takte kha an tlachhe leh mai thin. Chutiang chu kan dinhmun a nih avangin kan inven thiam a tul a, pawn lam atanga sumdawnna leh politics hmanga kua rawn hreuh a, min tichhe theitute kan lo do let thiam hi a tul hle a ni. Kan hnam hi kan la tam lo a, kawng hrang hranga chhut pawh kan dinhmun a la sang lo. Kan inven thiam loh chuan rei lo tea ral mai thei, ho te a tluchhe mai thei kan ni. Sumdawnna khawvelah kan cheng tawh a, tawktarh itawm tak tak nena min nektu thiltithei tak tak an lo chhuak zel dawn a, kan retheih avang te, kan rualawh avang te, kan inngeih loh thin avangte hian fimkhur a ngai leh zual tial tial dawn. Ram hrang hranga inzarpharh sumdawng lian 'multinational company-te' hi khua reiah an sumdawnna ramte tan hian hlawkna thlentu ni loin harsatna/hlohna thlentu an ni zawk, an ti. India sorkar pawh hi a inhawng zau viau tawh na a, ram chhung sumdawng/dawr liante ven him an duh vangin ram dang dawr lian (mega store/chain store) lian lo luhna tur erawh an la dang tlat. Ram changkang US ngeiah pawh khaw thenkhatah chuan Walmart leh dawr lian (Retailing corporations) te hi an tual chhung sumdawnna a tichhiat hlauh vangin an lo dodal tawh a. Heng dawr liante hian dawrkai dangte aia tlawm zawkin an zuar a, chi hrang hrang an zuar hnem bawk a, mi pawh an hip a, dawrkai dangten an tlak hniam phah thin. Kan rama sumdawng bank lo lutte hian an hnena mipui sum dahte hi Mizoram chhunga loan pek nan an hmang tam duh lo a, an hmunpui lamah an thawn zel a, kan sum hmangin khawpui dangah an intuak hausa thin. Chutiang deuh chuan, hnam dangten sumdawnna lian tak an rawn din chuan kan sum tam ber hi an nei dawn tihna a ni. Chutiang zawnga hnam rilru taka thlir chuan kan sumdawngte tichhe tur leh kan sum luang chhuak tur ui vang pawhin lo dodal hi tihawm tak a ni. Hmun dangah pawh an ti thin tho. Chutihlaiin, kan sumdawngten thil man an chhiar to uchuak lutuk avang hian man tlawm zawka thil lei chak tan chuan dawr lian, thil man tlawm bawk si chu lawm taka lo dawnsawn awm tak a ni thung. Kum zahnih vel kal taah khan French sipai hotu lu ber leh ram hruaitu ni bawk Napoleon-a'n an thenawm ram England chu "Dawrkai tamna ram" (A nation of shopkeepers) tiin a sawi a. Europe khawmualpuia finna leh thiamna lama harh tharna a thlen lai vel a sumdawnna lam lo tuipui tak English-ho a deusawhna anga ngaih a ni a. Mahse, English-ho hi an lo fingin an lo huaisen fal deuh chu a ni ang Europe awm tum Napoleon te, Hitler te pawh an hneh zel a, sumdawnna leh politics an kal kawptir thiam a, ram ni tla seng lo a roreltu an nih phah a ni. Aizawl pawh hi ‘Dawr tamna khawpui’ (city of shopkeepers) tih hial tlak a ni. Kawng dunga dawr awm zat hi chhiar ka tum thin a, mahse, chhiar sen mai mai chi a ni lo. Khawi vengah pawh hian, veng mawng deuh a ni emaw ni lo emaw dawrte a tam em em a, veng chuan chung deuh veng thenkhatah phei chuan kawng dung in 3/4 dan zelah dawr te a indawt zut a. Dawr tam ber hi nepnawi dawr a ni hlawm a, kawng sirah thil zuarte, dawr nei lem lo a thawmnhnaw leh thil dang zuarte nena chhut phei chuan a zuartu leh a leitu hi kan inzat thuak mai awm asin. India ram khawpuiah a zuartu leh a leitu intam hleihna a tlemna ber kan ni hial ang. Kum zabi 19-na tir lamah khan French economist, J.B. Say chuan thilsiam chhuah hi kan mamawh chawp zel a, leitu tur an awm zel (Supply creates its own demand) tiin a sawi a. Heti khawpa dawr te leh nepnawi dawr a tam chung hian a leitu an awm ve zel a ni. He khawpuia retail revolution thleng mek hi research bei a, zir chian tham a ni. A nawlpuia lak chuan Mizote hi sum khawl keuh keuh ai chuan hman ral awlsam chi kan niin a lang a. Khawpuia chengte tan phei chuan lei tur hi a tam khawp a; thil leina sum leng vel (urban consumerism) hian kan ram economy ah nghawng lian tak a nei a, khawpuia sum lengvak a tam hian hmun dangah pawh a zar an zo thin. Khawpui chhung leh Mizoram chhungah hian sum hi leng kual tam se, state pawna luang chhuak tur hi a theih chin chinah veng ila, chu chu kan economy insawhnghehna atan leh hmasawnna atan a pawimawh hle a ni. Kan economy derthawng leh nghet lo tak mai leh kan hnam him la him lo tak mai tan hian ngun takin ngaihtuahna seng ta ila. Inrelbawlna tha (good governance) tha tak hnuaiah chuan zu zawrh te hian buaina leh harsatna a thlen nasa lem lo, sorkar inrelbawlna tha lo hnuaiah chuan zu zawrh phalna nei an awm avangin zurui an zalen a, zu vanga chhiatna leh thilhna a thleng tam thung. Chutiang zelin, mipui (consumer-te) lungawi lohna ber dawrkaiten thil man to takin an hralh thin chungchang te pawh hi inrelbawlna tha lo hrin chhuah a nih hmel. Kan ram tan hian a leitu atanga thlira thil man tlawm a zuar thei apiang lawm taka dawnsawn nge fuh anga tualchhung sumdawngte venhim a, sum leh pai luang chhuak tur ven bawk?