Kum 1966 February 28 zan lai atangin zalenna sual hnam sipaiten Mizoram chhunga India sipaite an kap tan a. Mizo pasalthaten ralthuam an lek hnu March ni 5,1966 chawhma lamah chuan Aizawl chungah India indo thlawhna rual an lo lang thut mai a. Jet fighter em chu India sorkarin a rawih kha tumahin an ring pha lo a, pa thenkhat phei chuan, “Kan lam ta”, te an lo ti hman hial a ni awm e. Mahse, rin loh deuhin chu'ng thlawhnate chuan khawpui chhung an duh lai lai an rawn kap ta thut mai a, bomb an thlak a, an leidote chauh bitum loin pawisawi lote nen lam an rawn hawl zui ta mai a. Reilo teah Zofate Jerusalem chu a kang ta duai duai a, mipui an vak darh chum chum a, bomb thlaktuten ‘nunau e, MNF e’ an sawi si lo a, lei lam atanga lo kap buai tur an awm loh bawk avangin sumdawnna hmunpui Bara Bazar te chu an kap alh zur zur mai a. Mizoram pumpui ei leh bar, sum leh pai innghahna hmunpui ber chu chhutchhiat a ni ta a, Zofate khawpui chu a tlu a, hmelma lakah a tlawm ta. Ziaktu pakhat sawi dan chuan thlawhna hmanga Aizawl beihnaah hian lainatna leh zahngaihna tel miah loin an duhna lai laiah silaimu an surtir a. Mipui an darh chum chum a, nun a ralmuang lo a, sa him nan thingtlang lam an pan ta sup sup mai a ni. Khatih laia politician langsar Ch. Saprawnga chuan India sorkar leh sipai chet dan bawraw zia kha chiang takin a lehkhabuah a ziak lang a, “...tahrik ni 5 zing dar 10 velah chuan thlawhna chak ber chi a vir lut ta a, a duh lai lai a rawn kap ta chiam mai a. In tam fe a kap alh a. Khatla dawr phei pawh a kang ral vek a, hmun tam takah bomb a thlak bawk a. Chumi zan chuan AR-ho chuan Bara Bazar phei an kap alh ve thung a. Khawpui laili leh hausa lai ber chu a kang ta mup mup mai a,” tiin. Indonaah chuan khawpui ber a tluk chuan hnam pum tawrhna a thleng zui chawk. Aizawl khawpui a tlawm atang chiah chuan Zofate history a hun thim ber a intan zui ta nghal reng a. India sipaite rawva takin an rawn che zui a, khua an hal a, hmeichhiate an pawngsual a, biak in an tibawrhbang a, an duh duh an sawisa a, an that a, ran ang maiin mipui an khalhkhawm a, an nghaisa a. Tuma hriat lohin he hnam hian hliam na tak a tuar tlawk tlawk mai a ni. Hman deuh khan news channel lar CNN dintu Ted Turner-a’n, “Kum 1940 bawr chhoah khan CNN hi awm tawh se la chuan Holocaust (German Nazi-hoin Juda maktaduai 6 an thah) kha a thleng lo ang,” a ti a. Chutiang deuh chuan 1966 khan tunlaia print media leh electronic media hi awm se la chuan Mizo mipui tawrhna rapthlak tak kha a thleng kher lo ang. Khawvel hriata puanzar a ni lo kha India tan chuan vanneithlak tak a ni, chuti ni lo se a mualpho dan tur hi sawiin a siak lo. Rambuai hun thim ber lai a vai politician langsar leh mi ropui tak takte zingah pawisawi lo mipui rum thawm hre pha an awm lo khan tun thleng hian ngaihtuah a tithui a, India ram chhunga Zofate baihvai zia a tilang chiang hle a ni. Ram dang chanchinbu mi pakhatin Mizoramah indo thlawhna an hmang em, tiin prime minister Indira Gandhi a zawt a. “Airforce chu mihring leh ei tur (ration) thlaknan kan tir,” tiin a chhang hmiah! Prime minister dawt sawi hian kan tlangmi pui politician thenkhatte rilru a tina hle mai a. Rambuai tan tirh a Mizo mipui tawrhna thlithlaia lo zin Meghalaya M.P. Prof. G.G.Swell chuan parliament-ah na takin a chhang let a. "Heng hi maw in ration thlak chu? Engtin nge in chhum ang? Engtia chhum hmin tur nge min hrilh rawh u!!" tiin Mizoram atanga Jet fighter thlak bomb puak them leh a puak lo a hawn thlakte chu a lekchhuak nghe nghe a ni. Cherrapunji (Meghalaya) bialtu MLA Stanley Nochols Roy pawhin, Assam-a Chaliha kaihhruai sorkarin bomb thlak chungchang hi a zep avangin Assembly House-ah Mizote thlavang a hauh zawnga sawiin, “Heti em ema nasaa sipai chakna hmanga helna tihreh tum hi thil hlauhawm tawp a ni.. chief minister khan bomb hman a ni lo tiin a sawi a. Thlawhna an hman kha chu indo thlawhna ngei a ni. Chu’ng thlawhna atanga thil an thlakte chu a puak a, thil a tichhia a, he ram leh hnam tana mi rinawm tak takten an thih phah a, an thil neih hlu tak takte an chan phah bawk asin. Aizawl beihnaa sipai chakna hleihluak taka hmana Air Force hial rawih mai hi a uchuak mah mah ka ti. Tunge khua leh tui rinawm ni a, tunge rinawm lo, tunge MNF nia tunge Mizo Union tan, tunge Mizo District-a rorel lai party mi, tih inthliar hran theih loh vangin maw. Heng zawng zawng ai hian hleihluak taka Air Force chet dan leh bomb an thlak hi a rapthlak. Bomb ngei a ni kan tih hi keini chuan kan hmu a, a fiahna pawh kan nei.” Eng vanga India khan pawisawilote nen lama rawn bei chiam nge a nih le? January 11, 1966-ah Lal Bahadur Shastri a thih thut avangin chawpchilh takin Indira Gandhi chu prime minister atan lakluh a ni a. A pa Nehru anga a dinhmun sawhngheh a tum mek laia buaina lian tham a tawh hmasak ber hmet mit nghal tur hian pawisak a nei vak lo a ang khawp mai. Helho leh mipui thliar hrang loa a hnam pumpui mai hmelma beiha India sipaiten an rawn beih chiam khan a mizia thui tak a hril awm e. Shastri kha chu ni se khati em em a mipui tawrhna kha a thleng kher lo ang. A tawpna tana chuan, kum 20 chhung rambuai kan tawrh hi remna leh muanna hnuaia kan awm hnu kum 30 dawn thleng a hma kan sawn theih lohna chhuanlama la hmang zel tur hi chu kan niin a lang tawh lo. Hliam a dam thei a, ser erawh a reh thei lo angin kan hnam tawrhna rapthlak tak pawh kha history atanga thai bo theih a ni lo a, thangthar zelin kan theihnghilh tur a ni hek lo. Mahse, hnam dangte pawhin khatiang hun thim kha an lo paltlang tawh a, an tlukna hmun atangin an tho leh thin. Hmana hliampui tuara tlu he hnam pawh hi a din chhuah a hun tawh a ni. Kan hliam hluite dam rawh se. Nakum 2016 hi Aizawl bomb kum 50-na a lo ni dawn a, chumi denchhen chuan a hriat rengna thil khualzinte tan pawha tlawh chakawm, kan hnam rohlu tling tur engemaw siam ni ta se a duhawm ngawt ang. Mi thahnemngaite lo pen chhuak thei se, Aizawl leh Mizoram tana thil hlu tak din theih a chakawm hle mai.