Min hre chiangtu
    Ani chuan min hre chiang asin! Ka nu’n min pawm hma atang tawh khán min lo hre daih tawh. Hmäna nausén mai ka nih lai atang leh vawiina tlangvál—aw, “tlangvál ú tak” ka nih thleng thleng hian min hre khiau nia! Kan chhúngkuaah mai ni loin, ka mihring khawsakpui leh ka hmél hriat leh hriat lêm lohte zíngah pawh—ani aia min hre chiangtu hi an awm kher lo ang—tlatina!

Ka thil chìn rûkte pawh a hre vek—ka sim leh dàn lam lam thleng paw’n! Ka lu meh hlim pawh a hria. Kawr thar ka neih hlim paw’n. Ace hair cream ka hman thin lai leh, tùna Gatsby ka hman tâk dàn thleng hian a hre fai vek! A awmzia chu Ace rim leh Gatsby rim a hre hrang ve vek, ka tihna a nih chu!

Ka zíng thawh peih loh tum leh ka tih tauh tum pawh a hre vek nia! Min va’n hre chiang tak!

Kum 40 chuang zet chu he pindan, ka mimal pindan, he tlangvál pindan hi ka lo luah lum ve tawh a. Nula eng zât nge ka chhúngte awm loh laia ka hruai luh tawh le…? Ka hre séng lo. Nula hrim hrim te; bawh chhiat bawhpuia ka mutpui tâkte pawh an ni ang … a lo hre ve vek zêl tho nia! Ninawm zâwkin!

Khami tumte kha a hre ve vek ang—ka nupui rûk lek lek nèna kan inhauh chiam tumte kha. Thinrima min hauh natzia thute nèn khân!

Thingkûng

Thingtlánga sei lian tih takah thingkûng hi ka làwm nek a. A rah chî a ni emaw a pár chi a ni emaw, ni lo emaw—ka làwm vek. An nel emaw an duap emaw pawh ni se, ka làwm tho. April thla vêla Khiang thing pár rimte hi ka rimtui tih záwng tak a ni a. Enga ti nge aw perfumer-te hian perfume atán an siam loh le? te pawh ka ti thìn. Siam se, ka lei ngam tùr nèn—chéng säng chuang man pawh ni se! Sáng taka Fartuah a’n pár thìnte hi, kei chuan lawh ka châk tlat thìn!

Tum khat chu, ka pa’n Shillong vêlah min zinpui a. Thil dang zawng aia hmuh nuam ka tih ber mai chu, far thing a ni. Enga ti nge kan ramah a awm ve loh le, tiin ka inzâwt ru reng thìn.

Kawlthei kûng zára làwnte hi ka nuam tih záwng a nia, a nel si; mahse, Khiang thinga làwn erawh ka ti thei dêr lo. Hmáwng thinga làwn ngat phei hi chu, a nel si, nuam ka ti thìn tha! Ka tleiràwl lai phei chuan a zárah ka mu dèr dêr thìn. Chutia Hmáwng thing zára ka mut dèr dêr cháng chuan, “Sialton Official” ka chhiar pah thìn a; a ngaihnawm zual duh ka ti. Ear phone hmangin Walk-man-ah The Eagles Unplugged album te kha ka’n ngaithla pah ngei thìn a …  

Tu phun nge?

Ka pindan síra thing ding chu Hmáwng thing a ni. Tú phun nge a nih tù mah ka la zâwt ngai lo—upa tawh tak a ni a, ka pú ai paw’n a ú fé zâwk ang. Ka pú chu ú fé tawh a nia!

Fùr ruah tlâk tan tirh laiin, tum khat chu ka pa’n kan huan mawng, lei min laka a him nán tiin Hmáwng thing min phunpui tawh. Chu chu naupang të, kum riat mi âwrh ka nih lai a ni ang. A zungin a kai tha bawk a, kan huan a véng ve tlat te paw’n ka hre ve thìn. 

Mahse, zawhna ka la nei fan—ka khum síra Hmáwng kûng saw tu phun nge?

Ka pian hma lam thil

Ka pian hma khán mi tam takin he thingkûng—Hmáwng te, Búng te hi an lo phun thleh thluah tawh. Thlànmualah kal ila, râpawm khawpa Búng ding ka hmu fo. I ni ve em? Mahse, ka hlau ngai lo!

Ka pian ve hma hauh khán, kan in kiangah, kan ram tih ngheh nán tiin, tu emaw chuan Hmáwng thing a phun ve a ni ang. Tu nge phuntu ka hre lo. Hriat pawh ka tum ta lo mai. Tûnah chuan a zár a phan duar a, a zár thenkhat chuan kan in a rawn hawlh fer fur mai. Nina lâk àwm—ka chhúngte chuan, engah an ngai si lo a!

“Nina lâk loh chu a nun phung pangngai thlâk e,” ka ti ve ta mai a. A awm awmin ka awmtír ve ta mai a.

Tum khat chu, ka tleiràwl laiin ni tain ka hria, a zárin ka pindan tukverha rawn luh a tum a. A zár ka’n “cut” hmawk kha! Tùn hnu hian kha ka thil tih kha mak ka inti leh!

A zár zêl si a …

Ka pindan kianga Hmáwng kùng chu a thang duh hle mai. Zár lah a chhuah hnem tawh narawh e. Kan in chung pawh a khuh hlup mai.

Tûk tin hian ka thlír thìn—ka tleiràwl lai chuan a kùng chuan eng nge min lo melh ziaha eng nge min zirtír a tum teh fahran tiin ka ngaihtuah thìn. A cháng leh, ti te hian ka ngaihtuah a: hmänah chuan a kûng nau tê kha ka khum atanga ka hmuh theih a ni a, tûnah erawh, a kûng pui! Eng nge a chhan? Aw, Pathianin thang tùrin a duang a ni mai alâwm. Kei pawh, ka têt lai ka an reng loh hi!

Nau te piang hlim hian, ‘Ka nu, khawnge ka pa hi? In lo dam tláng maw? Ka pí leh púte, ka Ní te leh ka Nutei te hi, eng nge an chanchin ni a?’ rawn ti nghâl zuah zuah se, thingfâk emaw cooker chhìn emaw lâk lawka tuk thlûk mai kan duh ang chu!

Chutiang chiah chu Hmáwng thing pawh hi a ni. A la upat hma khán ka pindanah te khán rawn zàr luh te kha a’n tum (try) ve vêl a; ka béng châk thìn kha a nia. Mahse, nunna nei, thang tùra Siamtu’n a duan chu a nung a, a thang thìn, tihte ka ngaihtuah chhuak thiam ta.

A nih leh keimah ve hi? Sàn záwng leh rih záwng chauha thang tùr maw ka nih a? A teuhin ka ring lo. Hmáwng aia chungnung tùra duan hi ka nawi zâwk tlat a nih hi!

Nàwiin tleu fo mah ila, ani Hmáwng erawh chuan thlifímin a la chãwm fan a—a tih tùr a la thulh ve lo. Vawi eng zât nge, kei hian, ka hnaah CL ka lâk tawh a, ka tih loh tùr hi vawi eng zât fakauh nge ka tih tawh, a der paw’n, a der lo paw’n; a rûk paw’n, a lang paw’n!

Min hmu khiautu

Roos pheikhawk thar ka neih tuma ka làwmzia kha—Solomon’s Cave a mi ngat. Min lo hmu khiau a, min lo lawmpui ve—he Hmáwng kùng, ka pindan síra ding reng hian. A hnua addidas showroom atanga ka hlawh ngei maia ka Canvas pheikhawk lei tum thleng paw’n, min lo hmu khiau thìn ka tih tawh kha.

A nih leh, a khua a har ve ang em le? Chu chu ka zawhna, ka rilrua chám reng thìn a ni. A chhànna lah, ka hriat theih loh chatuan tùr a ni si!

He ka pindana nula ka kuah luh zozaiho kha, a lo hre ve vek chék ang a; min hmuhpui ve vek ang. Ka kekawrte neih zât thlenga hre vektu ni miau hek—eng rilru nge a lo put ve thin ang le?

Hei aia ropui zâwk, ka ngaihtuahna nèn lama min hretu ka nei—Lal Isua! Ani chu Hmáwng thing ang ngawt a ni ve lo; ka ngaihtuahna bawlhhlawh nèn lam min hre vek a, min hmu reng thìn. Ka khawsak dàn te, ka awm dànte hi fair a ti vek ang em? Àwm lo min ti thìn ang em le?

Hmáwng, tui pêk ngai tawh lo tán chuan tih theih ka neih a tlém hle. Mahse, min duangtu tán hian eng nge maw ka nih ve le? Eng nge maw ka tih ve ang le? Ka pindan kianga Hmáwng kùng lak pawha rinawm thei lo hian!