Isua pian hma kum zanga velah khan Chinese mifing Confucius-a chuan, “Ram hi sorkar tha takin a hruai chuan retheih hi thil zahthlak tak a ni a. Chutihlaiin, sorkar tha lo tak hruaina hnuaiah chuan hausak hi thil zahthlak a ni thung,” tiin a lo sawi a. Chumi awmzia chu sorkar tha tak a awm chuan mitin tan hamthatna leh hausakna kawng a inhawng a, rethei taka awm bik a zahthlak zawk a. 
    Sorkar tha lo hnuaiah chuan mipui dinhmun a chhiat avang leh mi tam berte an retheih avangin hausa bik nih a zahthlak, a chhan chu inrelbawlna (Governance) a that loh avangin hlemhletna a hluar a, mi hausa fal bikte pawh kut tling lo a sum la lut an nih thin vang a ni. Tuna kan ram dinhmunah hian Confucius-a thusawi hi darthlalangah hmang ta ila, kan zinga mi hausa tam takte hausak dan hi inrelbawlna (sorkar) that loh vang a ni mai lo maw? Mipui chanai eiru thin te, hlep ruk ching te, thamna la thin te, kut tling lo a sum la lut thin zahpuiawm tak takte chungah hremna lek a nih ngai loh chuan sorkar inrelbawlna chhe tak kan nei tihna a ni ngei ang. 
    Mi ram leh mi hnam tih dan zui a kan ram inrelbawlna kan kalpui avang hian kan hnam tana tha ber tur leh kan hnam ze mil tur inrelbawlna hi kan ngaihtuah thleng pha lo fo thin niin a lang. Hmanlai Mizo khawtlang nun kha han chhuikir ila, an phak ang tawka khawtlang inrelbawlna that zia kha zir chian tham a ni a, thuneihna leh chanvo an insem rual thatzia te, khawtlang inawp dan fel fai tak mai an neih dan te kha zir nawn leh ta ila tunlai hun atan pawh hian tangkai zawka hman theih a awm nual ang. 
    Tunlaia good governance ziarang hrang hrang an sawite leh kan pipute hun laia khawtlang inrelbawlna (Mizo traditional governance) hi khaikhin tham a ni. Chuvangin, thil pawimawh tak chu Mizo ze mil zawng taka inrelbawlna kan pipute hun laia mi kha tunlaiah hian kan chhawm nung thei ang em, tih hi a ni. Hmanlai chuan Lalte an lal em em a, lal thu chu thu tawp a ni. Mahse, lalin ama thuin thutlukna a siam ngai lo a, eng hunah pawh, eng thu pawh nise a upate a rawn zel a, an relho thin a, lal tlukin upate an pawimawh tihna a ni. 
    Lal leh khawnbawl upate kutah thuneihna pumhlum a awm laiin kawng thenkhatah chuan Zawlbuk thuchhuak a pawimawh leh em em tho a. Zanah paho an lut khawm a, an titi ngaithla tlangvalho nen sangha tlangvuak, sai ram chhuah, lo vah, hnatlang, sapui beih te an sawiho a. An titi chu lal leh upate beng a thleng a, rel ngai a awm chuan mumal zawkin an rel fel a, a khawtlangin hma an la ta thin a ni. Zawlbuk hi nungchang inzirtirna hmunpui a ni a, paho hnen atangin tlangval leh rawlthar rualten pipute thurochhiah leh pasalthate chanchin te an ngaithla thin a. 
    Tunlaia Zonunmawi kan tih tak, tlawmngaihna te, aia upa zahna te, rinawmna te, huaisenna te, tawrhchhelna te, mi dangte tana inpekna te, taimakna te hi Zawlbuk atanga an inhlan chhawn zirlai pawimawh tak a ni. Chutiang chuan kan pute hunlai khan khawtlang inrelbawl dan inkhaihdiat tha tak mai an lo nei thin a, sawi tawh angin thu tawp siamtu leh thuneihtu ber chu lal ni mahse a hnuaiah a rorel puitu upate an awm a, anni hi roreltu leh thuchhe remtu an ni a. Chutihlaiin, khawtlang venhimna lam, dan leh hrai kaihhnawih thil thenkhatte chu zawlbuk a chuangkai paho leh thalaite chan a ni thung. 
    Ram chhuah leh tihpui nikhuaah thalaite kilkawitu leh a tul anga kaihruaitu Val Upa an awm leh bawk a, anniho kaihhruaina hnuaiah hian pasaltha te, nula tlangval rualten khawtlang tan an thawk thin. Tunlai sorkar inrelbawlna nena khaikhin dawn chuan rorelna lam te, invenhimna lam te, ei leh bar lam te, khawtlang inenkawlna leh thil dang dangte inkhaidiat fel tak neiin, mumal takin an lo kalpui ve thlip thlep a ni. A nihna takah chuan tunlai hun ai hian an inrelbawlna kha a mumal zawk a, governance tha ber pawl an lo nei tawh a tih theih hial ang. Sorkar inrelbawlna tha hi ram din chhuahna hnukpui a nih avangin ram hruaitute pawh hian vei berah nei se. 
    Danpui zul zuiin kan hnam mil zawnga tualchhung sorkar inrelbawlna kalphung te hi siam that ni ta se, village council-te hi khawtlang hmasawnna tura thuneihna zau zawk pek a ngai, politics thila a hlawk lo a nih pawhin ram tan a hlawk thung dawn si a. Thuneihna sem zai (Decentralization of powers) hi hmasawnna a kai rual theihna a nih avangin ngaihpawimawh a ngai hle a ni. 
    State sorkar hnuaia mipui thlan sorkar te zawk - village council, local council, municipal corporation, autonomous district council te hi tun aia tha leh tangkai zawka hma an lak theih dan tur te, chumi atana an thuneihna leh an kalphung siamthatte hi a tul khawp mai. Hengho tana sum ruahmansaktu tura din Mizoram Finance Commission pakhatna report-ah khan rawtna tha tak tak a awm nual a, tihhlawhtlin ni se a tha ngawt ang. 
    Kan pipute kha a huho veka thil ti thin an ni a. An lo neih danah pawh mimal leh chhungkaw bila thawk mai loin a huho vekin an thawk thin. Chutiang ang khawtlang nun (Society) nuam, inpawhtlang taka an awm theihna chhan chu an inrelbawlna an that vang a ni. An eizawnna pui ber lo neih a ni a, chhung tinin hawp khawp an thar vek a, harsatna engemaw vanga puih ngai an awm pawhin an inpui mai thin a, chhuanchham an awm palh chuan puitu tur ramhual an awm bawk. 
    Chutiang anga inrelbawlna tha tak chu tunlai milin kan her rem thei ang em, tih hi ngaihtuah ngai ta chu a ni. India rama awm kan nih avangin sorkar inrelbawl dan kalphungah pawh phai vaiho mil zawng tak, mahse Mizo zia nena inmil vak lo tam tak a awm a. India danpui bawhchhe chuang lo a kan inrelbawlna hi Mizo ze mil taka her rem thiam chuan kan hlawhtlin ngeiin a rinawm. Ngaihtuah zui ta ila.