Tleirawl pakhat hi a chhungten rilru lam daktawr hnenah an hruai a. Thuawih takin a zui ve mai a. Chu tleirawl chuan a mizia a thlak a, a harh thar riau a, a lerh reuh riau a, a inchei hlerh hlerh a, thawmhnaw thar a ngen reng mai a ni awm e.

A chhungte chuan thawmhnaw thar leisakna tur an nei reng lo. A titau ber ber mai si a. Tihngaihna an hre lo a, puitu an zawng ta ngawt a ni. 

Daktawr nen chuan an inkawm ta a. Eng eng emaw inzawtin tleirawl nunphungte an sawi dun a. Engvanga thawmhnaw thar duh reng nge a nih tih a zawh chuan, chu tleirawl chuan, “Kan lar tawh si a.. thawmhnaw ngai reng chu chi loh alawm!” a ti ta a.

Daktawr chuan chu tleirawl chu a lar tih a hre si lo. “Ngawi teh, nula, kei hi ka mawl khawp a, kan upa ve ta deuh bawk nen, mi lar chu ka lo la hre ve hauh lo mai che. Min ngaidam teh. Engtin nge i lar? Eng lam nge i lar pui,” a’n ti a.

Tleirawl chuan, “Facebook-ah likers ka ngah tawh lutuk a!”zuk ti a. Fb celeb a lo ni reng a nih chu!

Daktawr tar lam tawh tan hriat sen an ni lo reng a ni. Mahse, chu tleirawl chu a thinrim lem lo, daktawrin a lar tih a lo hre lo pawh kha a haw lem lo. Fb-ah thlalak dang, likers tam tak hmuh lehna tur kha thawmhnaw ngai nen a lan fo a rem tawh lo tlat a ni ber!

Lar tawh laklawh si, thawh chhuah nei bawk si lo, thawmhnaw thlak zin ngai tawh si chu buaithlak tak a ni! Ama tan chang a buaithlak lo, a chhungten an tuar pha tlat! Lar man chu a to duh awm mang e aw tihte ka ngaihtuah ta a.

Lar hrim hrim hi a eng emaw ti nawm ve phian mai thei e. Mi hriat loh nih ai chuan mi hriat nih chu a chakawm ngei e. Mi ngaihsak loh nih ai chuan mi ngaihsak nih hi a nuam ngei bawk. Mi hriat hlawh nih theih nana thil maksak tak tak ti tate pawh an sawi thin. Miin ‘a awm ve’ tih an hriat nan a che ta chiamte pawh a awm theih a niawm e.

La lar lo hian lar kan châk a, lar tawhten lar leh lohte an châk kual vel mai mai a niawm e! Tu sawi ber nge ka hre ta lo a, “Celeb chu – mi hriat hlawh nana theihtawpa thawkrim a, miin an hriat hlau leh em em sia tarmit dum vuah leh site hi an ni e,” tih lam pang ka chhiar fuh tawh.

Mi rama celeb-ho chu an thawkrim phawt a, lar chu a lo ninawm thei leh si tih an hriat avangin an inthup leh si ni tur a ni. Keini ramah chuan tarmit dum vuahin hmaikawrte vuah lem lo mah se, mi lar an ni tih kan hriat lem loha kan kal pelh mai mai zingah hian ‘mi lar’ an lo awm teuh dawn a nih hi a!

Lar nawm leh nawm loh lam emaw, lar \hat leh \hat loh lam emaw chu sawi tur ka nei lem lo. Mahse, lar kan teh dan te, lar kan tum dan te, lar nia kan inhriat hnua kan nun dante erawh hi chu kan inennawn fo a ngaiin ka ring.

Thawh chhuah nei mang si lo, thiambik nei chuang bawk si lo, chhungkaw tan leh khawtlang leh ram tana contribution nei hauh si loa lar tum ve ngawt hian min tikhawlo viau thei dawn. Lar nia inhriat tak avanga nungchang zawng zawng danglam tate pawh hi miin an ngaisang viau lo!

He tleirawl chanchin hi hmanah titinaah ka sawi chhuak tawh a. Tuten emaw ni whatsapp-ah an vawrhdarh a. A hria apiang an nui thu zel a. Mahse fb velah hian he tleirawl (la fingtawk lo) nuihzat thei bik miah lo tur hi kan kuh tul awm asin! Nutling patling lungfing zingah pawh hian!