Naupang khawlai leng hi inah haw se, inah a nu a lo awm chuan a thlamuang thin. A nu a awm loh chuan mi dang chu lo awm bawk mahse inchhung chu ruak deuh huaiin a hria a, “Khawnge a nu?” a ti vat mai a ni. Naupang te hian an tet lai na na na chuan an nu leh pa te hi an thlahlelin an thlamuanpui em em a, pa aiin an nu te hi an thlahlelin an ngai zual emaw tih tur a ni. 

Naupang te chang an ni lo, pa te hlei hlei hian kan nupui te hi kan thlahleh ve tho mai. Pawn lamah hnathawkin kan chhuak a, chau leh ngui taka in lam kan pan chang a awm thin. Chutiang hunah pawh nupui te’n tha taka min lo dawn sawn a, hmel hlim taka min lo chiau au chuan kan hahdam sawng sawng thin. Mikhualnaah pawh hian pa ber chu ngawi deuh run mahse, nu berin min biak that a, tha taka min lo dawnsawn chuan kan ngam deuh sarh thin. Mikualnaa then in nuam kan tih te hi nu fel tak awmna in a ni tlangpui. Inchhungkhurah hian nu ai awh zo hi an awm meuh lo a ni.
    
Zirtirtu pakhat, private school-a kum tam tak thawk tawh chuan tihian a sawi a, “School ban a lo hun a, in lamah emaw school gate-ah annu te’n an lo hmuah thin naupang te hi hriat hran an awl bik. An school bang tur hi an phur a, an hlim a, chu chu an hmelah pawh a lang chhuak thin. Nu emaw pa emaw hmuaktu tur nei lo (an hmuah ve hman loh), an awmpui te emaw an driver te’n school gate a an lo hmuah thin te hi chu tlemin an zam a zal deuh a, an phur zan lo thin” a ti a, a dik hmel khawp mai.

Tunlaiah mihring kan buai tawh em em a, nupaa sawrkar hnathawk te, nupaa eizawnna thila buai nileng kan tam khawp mai. ‘Kan fate tan’ tiin thahnem ngai takin kan thawk a, kan phak ang tawkin sum kan dap a, kan ro hlu ber, kan thawh chhan kan fate chu kan awmpuite kutah kan dah leh si. Kan awmpuite chuan hlawh hmuh nan an thawk a, an tleina tur a nih phawt chuan mobile phone an chhawp sak a, computer games an khelh tir a, kan fate hmakhua an ngai tak tak lo. Nu leh pa chuan an tana tha ber tur ngaihtuah chungin hmangaihna nen kan enkawl a, a tul chuan kan thunun a, vuak pawh kan vaw mai a ni. Chung zawng zawng chu awmpuite tan tih a rem ve lo a, nu leh pa ai an awh zo tak tak lo a ni.

Tin, tunlai khawvelah awmpuite kuta fate dah tawp hi him pawh a him ber lo. Kan thiante chhungkua chuan hman deuh khan awmpui hmeichhe pakhat an nei thin a, chu an awmpui nu chuan an nupa awmloh hlanin meizial zuk a ching a, zu a lo in thin bawk a, naupang enkawltu tur atan chuan zuk leh hmuam ti thin leh zu in thin chu tih chi loh tak a ni. An hriat chhuah rualin an ban ta reng a ni. Awmpui (housemaid) ah hian mi fel tak tak awm bawk mahse thenkhat chu ruihtheih thil laka fihlim lo leh kutkem neih ching te an awm leh thin. A tha berah chuan kan rila rah kan fate, kan lei rohlu ber te hi chu an mahni hringtu an nu leh pa te ngei hian enkawl ila, chu thluka tha chu a awm lo ve.  

Hman deuh khan tlangval pakhat, Middle School zirtirtu chuan nupui a nei a, a nupui chu Nurse a ni a, nupaa sawrkar hnathawk an ni ta reng mai. Mi ngaihah chuan mi vannei, nupaa sawrkar hnathawk, hlawh tam bawk si an ni. Mahse, an inneih atanga reiloteah a pa (mipa pa) chuan, “Nupaa sawrkar hnathawh ka rem ti lo. A hlawh tlem zawk zawk in bang ang a, chhungkuaah in fate enkawl turin in inpumpek tur a ni” a ti bur mai a. Tichuan a pa thuawihin a hlawh tlem zawk chu a bang ta a, an nupa sum lakluh pawh a zahvein a kiam ta hawk mai. Mahse, he mite nupa hian an tisual lo. An fate chu mi puitling takah an chhuah vek a, zirna lamah pawh an hlawhtling tlang a, tumah ruih-theih thila buai pawh an awm lo. Chhungkaw sum lakluh lo kiam deuh mah se, kan fate kan chher puitlin phahna tur a nih chuan chu tluka hlu a awm lo ve. A lehlamah nupain tha-hnem ngai takin hna thawk ila, fate tan in leh lo tha din ila, kan fate nun kan hloh leh si chuan enge a sawtna awm chuang?

Lecturer nu pakhat pawh a hnathawhna avangin hmun dangah a awm a tul tlat mai a, an pa lah a sumdawnnaah a buai bawk si. Chu mite nupa chuan ngun takin an ngaihtuah vang vang a, an awmpuite kuta an fate dah tawp mai chu an ngaingam lo va, an nu zawk chu a bang ta tawp a, a fate tan a inpumpek ta a ni. An fate chu school-ah a thlah a, an school bang a hruai leh a, in lamah an zirlai a enpui a, a fate tan eitur a buatsaih a, an fate enkawl leh rawngbawl sak chu a mission pui ber a ni tawp mai. He mite nupa hian a man an pe phal a, sawrkar hna tha tak, hlawh tam tak aiin an fate an dah pawimawh zawk a, engtikah emaw chuan a man an pek hi a pung nen an hmu leh ngei ang.

Khawtlanga sualna tam zawk hi nu leh pa te’n kan lei ro hlu, kan fate kan hlamchhiah avanga kan tawrh a ni mai lo maw?