KA HRALH PHAL LEH LO Thingtlang khaw pakhat hian khawkhen kum an tawng a, an tam nasa hle mai a. Mi tam tak chu khawpui lamah ei tur leh hna thawh tur zawngin an pem chhuak hial a. Pa pakhat tan phei chuan a manganthlak lehzual a ni. A nupui chu sikserh avangin a tho kang peih der lo mai a. Ei tur lah an tlachham tep tawh a ni si. Thawpik takin a huanah a lut a, lungngai takin thing hnuaiah a thu a, a indawm kun a. Sum eng emaw zat chu nei se, a nupui leh fate hruaiin khawpui a pan ve ang a, a nupui damdawi turte a awm ang a, hnathawh tur pawh a awm mai ang a tihte a ngaihtuah a. A bul lawka a bawngpui, hnim lo pet mek chu a va hmu ta a. “Tu emaw chuan an lei duh ngei ang a,” ti rilru chungin hralh mai a rilruk ta thut a. A tuk zing vartianah chuan a bawng chu kaiin dawrpui lam a pan ta a. Thing kung pakhatah chuan a bawngpui chu a thlung ran a, mi lo kal vel chu leisak tura ngenin pawisa a mamawhziate chu a lo hrilh hlawm a. Mahse, tuman an uksak hauh lo. Tlai lam a lo ni a, ni pawh a tla dawn ruai tawh mai si. Khaw lum leh rilru hah avangin a thlan thlain a kawrte pawh a tihuh zo tawh a. Nimin lama a beiseina neih ve chhun pawh chu a thamral tan ta a. Sumdawng mi pakhat hian a dinhmun chu a hmuhin a bawng chu zawrhpui a rilruk ta a. Chu pa bulah chuan thuin, eng eng emaw an zawt ru hmasa ser ser a. Tichuan, dawhsanah a chuangkai a, phur zetin a au ta lung lung a. “Thiante u, tun ang hun remchang tha hi in hmu fo lo ang. He bawngpui hi a tha asin! Tuk tin leh tlai tin a hnute tin hnih a sawr theih ziah a. A cher deuh avang hian hrisel lo emaw ti ngawt suh u, no nei hlim a nih vang mai a ni e. Bawng chi tha chi, nikumah pawh thenawm khuaa bawng entirsiaknaah lawmman pakhatna dawng pha ngat a nih hi. Hei, a neitupa hian harsatna a tawh thut avangin, kei phei chuan tlawm uchuak mah maha ka ngaih khawpa man tlawmin a tiral duh a ni. Hetiang hun remchang hi in nei fo lo ang,” tiin ring zet main chu bawngpui chu an zuar ta a. Reilo têah mi an lo pungkhawm a, lei tumin an rawn inhawrkhawm tan ta a. Sumdawngpa chuan a neitupa chu an en a, “Le, thianpa, engzat chiah maw i chhiar a, hei lei duh an tam mai,” an ti a. Thingtlangpa chu a lo ding chhuak a, dak deuh vah chungleh chapo hmel pu tak hian, “He bawng hi ka ta a ni. Hralh atan chuan a uiawm lutuk. Ka vulh zel rih dawn,” ati ta daih a. Mi tam tak hian kan thil neih mek hlutzia leh thatna hi kan hmu thiam lo fo. Harsatnain min tlakbuak deuh hian engkim mai hi chhe ta vek, khawlo zo vek hian kan hria a. Beidawngin kan indawm kun a. Buaina kan tawh lai leh eng emaw kan hloh changte hian thil thlir zau hi a har bawk a ni. Kan hloh ve loh, kan la neih chhunte pawh hi engmah loa ngaih mai a awl khawp. An hlutna kan hmu thiam lo fo. Hriselna kan la neih te, kan nupui fanaute, chhungte, thiante, in leh lote hi hlu tak an ni. Kan la neih chhunte hi hlu tak an la ni hlawm asin! Tam tlain harsatna han tawk ve rap rap thin mah ila, bawngpui chi tha chi, ni tin a hnute tin li zet la sawr chhuah theih kan la nei alawm! Ka hralh phal leh lo. Hralh atan chuan a uiawm lutuk, ka vulh zel rih dawn!