Inneihna ka kalnaah inneihtirtu Pastor chuan a sermon-ah nupa tuak a lo inneihtir tawhte chu inneih hma counseling a neihpui dan leh zawhna a zawh dan a sawi a. Fa engzat nge neih an duh tih zawhna chu a tam berin ‘pathum’ tiin an chhang tih a sawi a. An duh dan indawt a han zawh lehnaah chuan a tam ber bawkin an chhan dan chu, a hmasa berah hmeichhia nise an ti a, a dawttuah mipa, a pathumna chu eng pawh – mipa emaw hmeichhia an lawm tawk tur thu an sawi tih thu a sawi a. Chuta a sawi chhunzawmnaah chuan a hmasa bera hmeichhia an duh chhan ber chu nu an chhawk hma theih vang niin a sawi a. Mipa neih ngei an duh a, chutih laiin pathumnaah chuan eng pawh an lungawi theih chhan chu a “spare” anga an ngaih tawh vang ni bera a hriat thu a sawi. A sawi zelnaah chuan nute hian nu mawhphurhna inchhung enkawl leh sekrek khawih kawngah hian chhawk thuai thuai an duh a, awl hma an duh vang nia a hriat thute a sawi zui a, ka ngaihtuahna a kal thui viau mai.
Issue hmasa lamah ka lo ziah tawh angin fa neih chungchangah hian mihringte hi kan thu lo khawp mai a. Nu hrisel tak tak, awm thei tak takte han hmuh hi chuan mihring taka thlir chuan fa nei teuh atan hian an itawm phian zel a; mahse, fa nei tlem zawkte hi an lo ni duh leh lawi viau a. Khawsak harsa zawk, fa enkawl kawngah pawh buaipui ngai tur awm tak tak te hi fa ngah ngah an lo awm leh fo bawk a. Kan ram dinhmun veituten an sawi fo lah chu kan hnam kan tlem si a, thi kan tam a, a bik takin kum naupang a thi kan tam a, fa kan nei tlem leh bawk si a, kan dinhmun a tha lem lo, fa neih tam inzirtir a ngai tih hi a ni. Presbyterian Kohhran pawh hian a vei viau niin a lang; fa neih tam lama tan lak a ngaih thute pawh a sawi fo reng a ni. Kan statistics han en hian nau piangah mipa an tam zawk a, Voter ID nei pha chinah hmeichhia an tam zawk leh tlat maite hi ngaihtuahna a tibuai viau bawk. CYMA lam pawh hian an vei khawp mai a, an sawiho fo tawh niin a hriat.
India ramah kan awm a, mihring an tam avangin sorkar laipui chuan population growth control nan Family Planning program lamah nasa takin hma a la a. Kan ram ngeiah pawh fa neih tlem leh chhang khât te kan lo inzirtir a, kan hlawhtling mah mah emaw ni a tih theih. Mi thiamte chhut danah chuan ram mipui awm zat hi a ngai renga maintain tur chuan nuin nau a neih zat (Fertility Rate) hi 2.1-3.0 ni se a dik tawk angah an ngai a. Hemi rate-ah hian Zero Population Growth (ZPG) an tih mai chu thleng thei angah an ngai (nau piang zat leh mitthi zat an inang vel turah ngaih a ni). 2017 statistics kan en chuan India ramah 2.2 a nih laiin Mizoramah chuan 2.3 a ni a, kan chhe hran lo tih chu a hriat a. North East State zingah Nagaland (2.6) leh Meghalaya (2.9) te kan pha lo va, a bak chu kan hnuai an ni (Assam nen kan inang thung). Mizo mipui zat hi pung tur chuan tuna kan fertility rate ai hian kan san a ngai dawn tihna a ni thei ang.
Fa neih chungchang hi ngaihtuah ngai a tam khawp mai a. Nu hriselnain a tlin leh tlin loh te, enkawl kawngah tlin leh tlin loh te ngaihtuah a ngai viau. Hmeichhia hi an fertile period (nau pai tura an taksa inpeih ber hun lai) san ber hunlai chu kum 20-24 a ni a, kum 30 an pelh hnu hian nau pai an harsat tial tial. Khawpui kan en chuan zirchianna awm chiah lo mah se kan hmeichhiate pasal neih kum hi chawhrualin a tam tial tial niin a hriat a, tunhmaa kum 30 hnu lama pasal nei kha nei tlai kan tih viau laiin tunah chuan kum 30-35 inkar hi a awm tawkah kan ngai tan deuh em aw a tih theih. Thingtlang lam erawh an la nei hma deuh zawk niin a lang thung. Hmeichhiain pasal an neih har chuan fa an neih theih zat a tlem tial tial dawn tihna a ni thei a (an nei tlem vek e tihna ni chuang lovin). Tin, nau neih kawngah pawh neih pangngaia neih aiin zai chhuah kan tam tial tial niin a lang bawk. Nau vei na tawrh kan peih loh chu thuhran nise, neih pangngaia nei turin doctor leh nurse lamin kan tlin chiah lo a ni thei ang em tih te pawh a ngaihtuah tel theih bawk ang.
Chhangkhât kan han duh leh a, chumi atan chuan naupai venna damdawi (OCP-oral contraceptive pills) leh chhul chhunga dah chi intra-uterine device (copper T kan tih te) kan hmang nasa viau bawk. OCP leh Copper T te hi naupai venna atan tha em em mah se fimkhur taka hman ngai an ni a, doctor-te chawh ang thlapa hman tur a ni. Chhangkhât tura kan campaign danah “a u zawk sikul a kal hunah le” tih kha Family Planning Campaign au hla thin kha a ni a, a thatna lai tam tak awm mah se hmeichhe fertile period a tihzim phah ang em tihte pawh a ngaihtuah theih awm e. A u zawk sikul a kal hun kan nghah chuan kum 4 vel zen zawn a tla zel dawn tihna a ni a, a tam berah fa 4-5 bak chu neih a har phian mai thei. Fa neih thuai thuai a thatna lai sawi dawn ta ila, kan chhangchhe rei lo a tih theih awm e, a kar a rei erawh chuan chhangchhiat chu a rei duh phian. Chutih rualin inzawn lutuk a fa neih chu nu in a lo tuar ve leh thei bawk a, buk thiam a har hle dawn a ni.
Tunlai kan khawvelah chhungkaw tin eizawngin kan buai hlawm ta hle a, nu ber pawh hnathawkin kan buai tlang ta hle. Eizawn kawngah phei chuan mipa aiin hmeichhiain an thawh hlawk ta mah mah emaw tih tur a ni. Hmeichhe tan pasal fanau neia chhungkaw din hmain eizawnna nghet neih hmasak kan vei zawk tawhte pawh a ang hial. Chutih rualin chhungkaw chawm thei an innghah ngamna mipa an hmuh mai loh vangte pawh a ni thei bawk. Mizo kan la tlem a, kan mikhual cham reite an pung chak viau lawi si tih thu kan hriat fote hi ngaihtuah ngun a ngai viau mai. Kohhran leh YMA lamin kan vei a, eng nge a solution hriatthiam a har hle. Fa nei tam tura infuih ngawt hi heng ka rawn sawi tak issue hrang hrang te hi kan ngaihtuah tel loh chuan a fuh ber lo thei ang. Kan population growth hi mumal taka zir a tha hle mai a, mithiam research lam tuimi te hian rawn zir chiang thei se, kan pung chak lo anih pawhin hmalak dan tur scientific evidence-based ngeiin rawn duang chhuak thei se tiin vei zawng tak chu famkim lo takin, thahnemngaih vang thungin ka han ziak ve a ni e.