Kum 2014-a Narendra Modi prime minister a nih hnu, kum tawp lamah khan Agra khawpuia mi retheiho veng Vednagar-a cheng muslim-te chu hindu pawl pakhatin an sakhaw serh leh sang chi khat, halral thil hlanna ('Havan' an tih) a an tel chuan Modi-a sorkarin ration card leh khawtlang mamawh thilte a pe dawn tiin an thlem a. Mi 250 laiin an chhim ta a, serh leh sang an khawih zawh chuan chuta tel zawng zawngte chu hindu sakhaw zuitu an nih tak thu an hrilh ta mai a. Tihluihna leh an remtihna pawh la lo a sakhaw danga inleh luihtir hi dan kalh a nih avangin he thil thleng chungchang hi Parliament-ah sawi zui a ni a, inhnialna nasa tak a chhuah avangin rorel hlei thei loin hun engemaw chen a awm phah a nih kha. Hindu firfiak pawl hrang hrangte hian India ram hi hindu sakhaw zuitute chauh chenna ram a siam an tum ruh hle a. An inchhun khawmna RSS (Rashtriya Swayamsevak Sangh/Rashtriya Seva Sangh) hi kum in 1925 a Keshav Baliram Hedgewar-a din a ni a. Hindu leh Muslim te inkar buaina chhuak thin vanga din a ni nghe nghe. RSS hi politics lam hawi pawl a ni lo a, an sakhuana chawisan a, hindu-na (Hindutva) chawilar hi an tum ber a ni. Hindu sakhua la firfiak pawl an ni a, India a zalen tirh lamah phei kha chuan national flag (tricolor) hi an pawm lo a, an sakhaw rawng pawimawh serthlum rawng (saffron) an hman loh avangin nasa takin an sawisel a. India ram hi hindu rama siam an duh avangin constitution pawh hi an pawm lo reng a, nasa takin an losawisel tawh bawk. Tun hmain sorkar pawhin RSS pawl hi an kal firfiak thin em avangin a lo khap fo tawh thin a. A vawi khatna chu British hun lai kha a ni a, India sorkar pian hnuah hian vawi thum lai tihtawp a ni tawh. Kum 1948 a Mahatma Gandhi thattu Nathuram Godse kha RSS member thin a ni a, chuvang chuan he pawl hi dan pawna hnawhchhuah a ni a, tunlai thleng hian hindu firfiakho zingah he pa chawimawi duh hi an la awm. Emergency lai leh kum 1992 a Ayodhya-a Babri Masjit an tihchhiat tum khan he pawl hi tihtawp/hnawl a ni tawh bawk. RSS pawla inpe, an mi leh sate hi 'Swayamsevaks' an ti a, maktaduai nga chuang zet an awm niin an sawi a. Prime minister Narendra Modi pawh hi hi RSS activist (Swayamsevak) thin a ni nghe nghe. Sawi tawh angin RSS hnuaiah hian hindu sakhua la firfiak pawl hrang hrang an inchhung khawm a. BJP leh RSS hi an inzawm tlat a, a nihna takah chuan BJP hi RSS political wing a ni. Tun hnaiah hian India rama hindu ni lo sakhaw dang zuitute ngaihtheih lohna a lian zual hle a. A bik takin kum 2014 May thla a BJP leh a kaihhruai party-ten sorkarna an chan chiah atang khan hindu kal fawr pawlte an pawng zual hle a ni. Sakhaw dang zawng aiin Kristiante chungah hlei lenna a thleng nasa zual bik. Kum 2015 chhung khan sakhaw (zuitu) tlem zawk (religious minorities) te beihna leh an chunga tharum thawhna a thleng tam hle a, chanchinbu lian pali - The Hindu, The Times of India, The Hindustan Times leh The Indian Express ten chutiang thil thleng chu vawi 228 ngawt an tarlang a. Kum 2013 khan chutiang chu vawi 75 chiah tarlan a ni thung. Delhi khawpuiah chutianga sakhaw zuitu tlem zawkte beihna chu a thleng tam ber a, a dawtah Uttar Pradesh leh Maharastra te an ni. NDA sorkar leh hnu hian chutiang thil thleng chu a tam zual hle a nih chu. Sorkar laipui hmalakna thenkhatah pawh hian Kristiante nek zawng ni a ngaih loh theih loh hmuh tur a awm nual mai. India ramah hian Kristiante hi maktaduai 25 vel kan awm a, ram chhunga cheng zaa 2.3 (2.3%) chauh kan ni. Kum 2014 khan Modi-a sorkarin Kristiante ni pawimawh ber pakhat Krismas Ni (december 25) Good Governance Day atan a puang a. Hmarchhak state sorkar thenkhat leh Kristian pawl/kohhran hruaituten an duh loh thu an sawi chung pawhin sorkarin a kal tlang pui lui ta tho a. Chumi hnuah Yoga day an puang leh a, tihluihna rawng kai deuh a kalpui te an han tum a, mahse, dodalna nasa tak karah an tilui ta chiah lo zawk a nih kha. Kumin pawh hian April 14,2017 - Good Friday tak hian Digi Dhan Mela neih turin thu a chhuah a, India constitution duangtu Dr. B.R Ambetkar-a pian champha puala he hun hi ruat a ni nghe nghe. Mahse, hmun hrang hranga Kristianten ni pawimawh a sorkar laipuiin hetiang hun a siam hi an duh loh thu an sawi a. Sorkar laipui pawhin hun remchanga sawn mai a remtih sak ta a. Engpawhnise, sorkar laipui kal dan han en hian India rama sakhaw tlem zawkte hi kan him zel ang em, tih ngaihtuah tham a ni ta. BJP an insawhnghet tial tial a, kum 5 a vei leh chuan parliament in hnih - Rajya Sabha leh Lok Sabha hi an thunun thei tawh hialin an ring. India rama state lian ber U.P ah hneh takin an tling tawh bawk a, India hmarchhak - engtik lai maha Lotus par ngai lohna hmunah pawh BJP sorkarna state pathum a awm ta der mai. India hmarchhak leh hmun danga an insawh ngheh dan han en hian sakhuana lamah an firfiak telh telh lo ang tih sawi a har. Chutihlaiin, prime minister Narendra Modi hi hmasawnna (development) tuipui em em mai a ni a, ram hmasawnna tura ruahmanna hrang hrang a neih te han en hian Kristian sakhua nekchep zawnga kal thui a ngam kher lo maithei. Kristian sakhaw bupui khawthlang ramte kawmngeih a tum tak tak a nih chuan mihring dikna/chanvo humhalh a, sakhaw zalenna a ngaih pawimawh a ngai dawn. Mahse, sawi tawh angin hindu firfiak pawl hrang hrang hi an tam em a, chungte chu (BJP telin) RSS-ah an inchhung khawm a, an sakhua an atchilh zia en hian Pu Modi-a hnuaiah hian an pawr tial tialin a rinawm mah zawk. Tun hnai kum hnih kum thum vel kal ta chhung ringawt a vai ram hmun hrang hranga Kristian Biak in tihchhiat leh suasam a tamzia te, Kristianten nekchep leh en hran an hlawhzia te, ringtute tawrhna a nasa zia te han ngaihtuah hian India ramah hian him takin Mizo kristiante pawh hi kan awm zel ang em, tih a ngaihtuah thlen theih rum rum. Kan hnam pawh hi kan him reng ang em, tih te hial ngaihtuah thlen a ngai. Chakma leh Tuikukte hi keini aiin sorkar laipuiah an tlatlum tial tial a nih vaih chuan a la buaithlak ngawt ang. Kan sakhua a him loh chuan kan hnam pawh a him kher lo ang.