Khawvela khawl awm tawh zawng zawng zinga vawiin thlenga la changkang ber leh, hriat chian kim sen loh, computer/information technology mai bakah modern science pawhin a hrilhfiah kim theih reng reng loh chu mihring taksa hi a ni. Damlo na khirh tak takten Pathian tihdamna an chan hi a ropui em em mai a, a saptawng takin miracle kan tih hial khawpa Pathian thiltihtheihna te pawh hmuh tur a awm fo mai. Chutih lai erawh chuan he thilmak miracle hi medical field-ah chuan doctor-ten ni tin an hmu reng mai a ni. Surgeon-ten damlo an han zai a, vun an han zai kak a, kawchhungte an hai fe hnuah an tih tur an tih zawh hnuin dul vun khar nan an han thui leh a, hetia an thui pin hian an zai hawn laia vun leh thisen zam an zai chahte kha a thuina suture hmang hian an han insiktir leh mai a ni a, engtin nge khang thisen zam te kha a lo inzawm a, engtinnge vun te kha a lo inzawm leh tih te hi hrilhfiah thiam dan a awm hauh lo; miracle ngei chu a ni.

Kan taksaa kan ei leh in leh eng thil pawh kan lakluhte hi kan taksa peng organ hrang hrang hian a mamawh tur a lo thliar hrang a, hlauhawm tur tam tak kha hlauhawm leh hnathawk thei lovin a lo thiat darh a, chutah kan taksa mamawh zawng chu la hrangin kan mamawh lohte chu kan thlanah te, zunah te, ekah te paih chhuah leh a ni. Thau (fats) te hi kan mamawh aia tam kan lakluh hian a then chu kan taksa mamawh tur dang atan te a lo thet darh then leh mai thei bawk. Kan taksa khawl hrang hrangten hnathawk turin energy an mamawh a, chu energy kan neihna ber chu carbohydrates te an ni a. Kan mamawh zat aia tlem kan lakluh chuan kan taksa mamawh energy siam nan protein leh fats te hi a lo tangkai leh zel bawk.

Kan taksa peng hrang hrangten mumal taka hna an thawh theih nan energy petu kan ei leh in hi a pawimawh hle mai. Chutih rual chuan kan taksa mamawh bak kan lak luh hian chutiang extra atanga kan taksa mamawh loh bawlhhlawh toxins insiamte chu paih chhuak turin kan organ pawimawh zual kal (kidney) leh thin (liver) te hi an hah rim zual hle thin a ni. Chutiang avang tak chuan kan taksaa thlum tam lutuk hian a sem zai tura khawlte kha a tibuai a, zunthlum an lo neih phah ta thin a, thau lam kan lakluh hnem lahin kan liver-in a theh darh theih thin aia tam a lo inkhawlkhawm a, chung thau extra te chu kan liver-ah a lo châm bâng ta mai thin a, chu chuan thau thinbawh tia kan sawi mai Fatty Liver hi a lo thlen fo mai a ni. Zu in nasat hian thin a overload a, Fatty Liver hi an nei duh em em mai a, chu chu Alcohol induced Fatty Liver kan ti a. Zu in ve chuang lo; mahse, ei leh in lam ti nasate hian Fatty Liver an nei ve fo a, chutiang chu Non-Alcoholic Fatty Liver Disease (NAFLD) kan ti bawk.

Kidney hi kan taksa bawlhhlawh paih chhuah nana organ pawimawh ber zinga mi a ni. Kidney function a buai chinah tawh chuan a serious a ni tih kan hriat a pawimawh. Kidney hi tha taka function tur chuan tui kan lakluh tam a ngai a, BP sang leh Zunthlum te hian Kidney a ti buai hma a, chuvangin kan control that a pawimawh hle. Kal pahnih kan nei a, pakhat chauh pawh hian kan taksa bawlhhlawh a thianfai tha thei em em a. Chutiang khawpa organ ropui chu a ni. Kan enkawl uluk a tha hle. Kan thlan (sweat) pawh hi taksa bawlhhlawh paih chhuah nan a tangkai hle bawk. Kan taksa ei leh in a tangkai lo paih chhuah nan hian kan ril a pawimawh leh em em. Ril te leh Rilpui kan nei a, an hnathawh dan a in ang chiah lo chungin an pawimawh danah nep zawk a awm hauh lo bawk.

Hetiang hi kan taksa awm dan chu a ni. Chuvangin hriselna kawnga kan hriat tur pawimawh tak chu kan taksa hi engtik lai mai pawha chawl lova hnathawk reng a ni a, kan enkawl uluk hle tur a ni. Zuk leh hmuam, ei leh in kawngah te, zu in mi kan nih pawhin engkim hi a mawi tawka tih dan kan zir a tha hle. Kan taksain a dawl zawh loh khawpa ei leh in, zuk leh hmuam leh zu te thlenga tih kan chin chuan kan la tuar ngei dawn a ni. Kan thiante Japan zin min hrilh ka hriat reng chu tumah thau (overweight) an hmuh loh thu hi a ni. Ei leh in an uluk a, an fimkhur a, kein an kal nasa bawk. Chutiang avang chuan an hrisel a ni tih a chiang a, mihring tam zawnga chhut pawha damrei ber hnam an ni. Chuvangin mahni hriselna ngaih pawimawh nachang kan hriat a hun hle. Hnam hrisel lo hi a changkan theih loh!