Zawhna: Ka pu, khawngaih taka ka zawhna hi min chhansak theih chuan ka lawm ngawt ang. Kum 60 chuanga upa ka ni a, nupui ka nei bawk a. Sex-ah harsatna ka nei a, hun rei lutuk chu a la ni lo; ka kawhte hi a khawng thei ta lo va, sawi pawh a nuamlo na chungin, engtia tih chi nge ni ta ang?

Chhanna: Sex harsatna chungchang hi issue hmasa lamah te kan ziak tawh thin a. Sex kaihhnawih harsatna reng reng hi thil sawi nuam lo, dawnsawn thiam pawh har a ni fo mai. Chutiang avang chuan harsatna nei tam ber hian an insawisel viau tawh hnuah doctor an pan chauh ta thin a, medical problem lam chi reng reng chu enkawl hma poh leh a dam hma emaw hma an sawn awlsam a, chuvang tak chuan sex lam harsatna chi reng reng pawh hi nuam lem lo mah se doctor-ah inentir thuai thei ila tiin thuhma ka han sawi a ni.

Mipa sazu a lo fuk dan hi a technical em em mai a. Kan sazu chhungah hian tube pahnih inkham a awm a, balloon sei chite pawh ti ta ila. Tisa chakna a lo chhuah khan kan thluakin trigger a rawn siam a, chu tube ah chuan thisen a in-pump lut a, a hnawh puar a, tichuan sazu kha a lo fuk ta thin a ni. Amaherawhchu, kan duh duh huna fuk emaw, zawitir e,aw ngawt theih pawh a ni hran lo, a chhan chu a control-tu kha thluak lam daih a nih vang a ni. Mipa hrisel tha ah chuan an inrin hman hmain a fuk mai thin a. |henkhat erawh chu eng emaw trigger-tu a awm phawt loh chuan fuk mai thei lote a awm ve fo bawk.

Kum a lo tam tial tial a, rilru ti buaitu a tam tial tial bawk a, stress hrang hrang avang te, natna thenkhat, a bikin thisen sang (hypertension) leh zunthlum (diabetes) avang te, mental disorder chi hrang hrang (depression hi a common zual) vang te, damdawi thenkhat side effect avang te, zu in nasat vang te, thin (liver) hnathawh buai vangtein sazu fuk tha thei lo “Erectile Dysfunction” hi a lo awm thei a ni. Chung zingah chuan a chhan common ber nia an sawi chu stress hi a ni. Sex hman kawngah hian kawppuite an pawimawh khawp mai a, nupa inkar inhriatthiamna thuk tak hian harsatna awm thei tam tak lakah a veng thei a ni.

Kan rawn tarlan tak ang hian harsatna i neih leh neih loh hi hriat a tha hle mai. Kum 60 i chuang tawh a nih chuan BP sang i neih leh neih loh te, zunthlum i neih leh neih loh hriat hmasak a tha hle mai. I lo nei a nih chuan enkawlna i dawn thuai a ngai ang a, i control that hmasak phawt loh chuan i harsatna hi a ziaawm mawh viau ang. Tin, thau lutuk (obesity) hi a chhan common tak mai a ni a, physical exercise lak uluk a pawimawh hle. Zu in thin i nih chuan i in-control that viau a ngai ang a, i liver dinhmun pawh check a ngai ngei ang. Meizial zu nasa i nih chuan i insum hle a ngai bawk.

Hnathawh kawngah i dinhmun i sawi lo va, hah lutuk vangtein a awm thei a. Tin, inchhung khur lamah rilru tihahtu i neih phei chuan i harsatna hi a zual tawlh tawlh thei bawk. In nupa inkar dinhmun lam enge i sawi lova, in inhrethiam tawk em tih te, i harsatna chungchangah hian i nupuiin a ngaihtuah tawk che em tihte pawh hriat a tha hle. Inpawh taka sawi dun te a tha hle. Sex hman kawngah hian hmeichhia hian an pasalte hnenah an rilru an sawi hreh duh viau mai. A lo dawngsawng thiam tawk lo a ni thei a, tin, in nu zawk hi tisa chakna lamah a hniam viau thei bawk. Nupa kara sex hman kawngah chuan intihphur tawn a ngai hle. Hmeichhia hi an thi a hul tawh phei chuan an sex drive a hniam duh hle. Chungte chu sawi dun theih nise.

Damdawi hmanga enkawl kawngah chuan sazu tih fukna damdawi te chu a awm ngei a; mahse, medical lam harsatna i neih erawh chuan chu chu enkawl hmasak phawt a tha ang. Duhthusamah chuan Medicine Specialist lo inentir thei la, heng damdawi ka han sawite pawh hi i taksa dinhmun a zirin a him leh him loh te pawh an lo en chiang hmasa che ang a, an puih theih ngei che ka beisei.