Hmanni chu Aizawl atangin ka zan chhuah a, Muallungthu ka then chuan khua a thim viau tawh a ni. Chu a chhapah ruahpui vanawn a sur tluk tluk mai a, midum kham chhoa ka tlan lai phei chuan rilru a nuam duh lo khawp mai. Ka rilruin, ‘Kawng chhak atangin lung rawn tla thut se, min delh mai ang a’ tih mai mai te ka ngaihtuah a. Hmuifang ka thlen chuan chhum a lo zing phui chuai mai a, motor darthlalang a paw chuai a, ruah a sur reng bawk nen thaw a veng lo khawp mai. 

Muangchangin ka tlan a, Darzika road-ah ka peng a, khua a thimin chhum a zing nasa bawk nen, kawng pangngai zawh zel ta lo chuan Chawilung khaw panna kawngah ka peng ta daih mai. Ka tlan zel a, ka rilruin, “Hei chu ka kal tuma kawng a va ang lo ve maw le” ka ti a. Ka tlan thui tawlh tawlh a, ka ngaih a tha lo tawlh tawlh a, ka rilru a hmanhnawh tawlh tawlh a, ka tlan chak tawlh tawlh bawk a. A tawpah hlauh ruk ang ngei ngeiin Chawilung khuaah ka chhuak ta hlawl mai a. Rang mangkhengin ka in her a, ka tlan let leh vang vang a, tul lo takin darkar khat dawnin ka khawtlai phah ta a ni.

Ka bo tan tirh, kawng bo nia ka in rinhleh tirh te khan kir leh thuai ila, chuti takin hun ka khawhral tam lo ang. Mahse, engin nge maw min mawlh ni, inringhlel chung chungin kawng dik lo kha ka zawh lui zel a, ka tlai phah ta duai reng a ni. 

Hetiang deuh hian he kan hringnun zin kawngah hian mi tam tak chuan ngaih tha lo chung chungin, rilrua inthiam lo chung chungin, a tawpna tur hmu tlang sa deuh roh chungin kawng dik lo kan zawh lui ngar ngar a, kan rilru chhungril erawh a nuam chiah lo. Chuti chung chuan kan kal lui zel a, kir leh a, kawng dik zawh leh mai nachang kan hre lo fo thin. Kan kal thui tawlh tawlh a, kan kal chak tawlh tawlh a, kan bo thui tawlh tawlh bawk a. A tawpah chhiatna khurah kan in barh lut a, a sawp chu na tak a ni thin. Chutih hunah chuan inlamlet a theih tawh loh a, kawng dik zawh turin phengphehlepa khua a tlai tawh thin a ni.

Mihring hi tih atin kan awm a, mahni leh mahni kan in bum fo thin. Kawng diklo kan zawh pawhin nakinah kan la sim ve ang a, nakinah kan la insiamtha ang a, nunphung pangngaiin kan la nung ve mai ang kan ti a, mahni kan in thiam chawp a, tuna sim duh si lo hian nakinah sim kan tum a, khua kan tlai thin a ni. AC/DC rock band-a manager thin, Michael Browning khan a tia lawm, “Nuam tawlin zu leh sa nen hun kan hmang a, zu vangin kan thian te an thi a, mahni ngei pawh thia kan luak barh barh hnuah pawh, ‘Kei chu ka in control thei a lawm, hetiang reng hi ka ni lo ang, ka tha leh mai ang’ ka’n ti lui tlat a, mahse khua ka lo tlai tep a ni” a ti a, inngaihtuah harhin hawi kir hlauh lo se a thian te hnung zuiin mual a liam ve ngei ang.

Bible-a Pathian mi ropui tak tak te pawh hian kawng bo chang, dai pelh rap rap chang an nei ve tho mai. ‘Rinna pa’ ti hiala koh Abrahama pawh khan Aigupa lal a hlauh vangin a nupui Sari kha ‘Ka farnu a ni e’ a ti ngawt mai a, tlema tlemah a nupui a chan lo chauh a ni. A changin a bawihnu lakah fa a nei thul. Mahse, a kotu lak ata a bo hlen lo. A tul hunah chuan Pathian thu ang zelin bawihnu leh a fapa pawh thlalerah a hnawtchhuak mai a, a fapa pawh Pathian tan halral thilhlanah a hlan ui lo.

Pathianin ‘Ka thinlung ang pu mi’ a tih Davida meuh pawh khan a dai pelh ve rap rap mai. Mi nu a uire a, a pasal a thah sak bawk a. An chhungkaw chungah chhiatnain ro a rel a, a fate an in that a, amah ngei pawh a fapa Absaloma-a hlauin khawpui a chhuahsan a, a tlanchhe zar zar mai. A tlanchhiatna kawngah a hmelma te’n an diriam a, anchhia an lawh bawrh bawrh a. Mahse, Davida chuan a rap pelh hlen lo a, a bo hlen hek lo. ‘Ka hmelma, mi diriam mai suh, tlu mah ila ka tho leh dawn si a’ a ti a, inngaitlawm leh thuhnuai rawlh takin Pathian hnenah a tlu lut a, tawngtaina hla thu mawi tak a chhakchhuak a, “Aw Pathian, thinlung lungchhia leh inchhir ngawih ngawih te hi i hmusit lo ang” tiin Pathian a au a, he inngaihtlawmna aw mai tak hian Pathian ngeng a chhun ngei ang.

Mi fing chuan kawng dik lo a zawh pawhin a in lamlet thuai a, kawng dik a zawh leh vat thin. Tluk pawha thawh tum lo, kawng bo tih in hre chung pawha kal lui tlat, kir lehna remchang a awm pawha kir duh lo te hi mi vanduai ber te an ni. Tisa thil chang lo, thlarau lam thilah pawh mahni pawl tih dan leh awmna pawl thlamuan pui ringawt, chatuan khawvar huna bo nih inhre chauh tur hi kan awm thluah mai lawng maw?