Zawhna: Ka pu, hmeichhia kawng na reng, kawng vei lam chauh, a na a chhuah tawh chuan taksa hi a sa vek zel a, khawsik tur angte hian ka awm thin. Engnge a chhan ni ang le? Khawngaih takin min pui thei ang em?

Chhanna: Kawng na hrim hrim hi mipa aiin hmeichhiaah a tam deuh hmel a. A chhan ber pawh hmeichhe thi neih leh a kaihhnawih – chhul, chi bawm leh a bawr vel fel lo a awmin kawng na, kawng kham a siam fo thin vang a ni. Hmeichhe thi neih lama fel lo, a bikin thi neih hmaa na nuam lo (Pre-Menstrual Syndrome) te, thi neih vanga kawng leh tai na vak vak (dysmenorrhea) te, chhul lam fel lo (endometriosis), chi bawm bawk (ovarian cyst) leh bawk inherh thin (torsion) vang te, infection vang te (PID an ti mai) hian kawng na an nei duh hle.

    Hmeichhe thi neih leh a kaihhnawih kan tar lan takte zinga eng emaw ber hi a chhan a lo nih chuan hre chhuaka enkawl turin ultrasound tih hmasak a pawimawh viau ang. Tin, zunkawng lam fel lo, a bikin infection (UTI) kan tihte a lo ni palh thei bawk a, chuvang chuan urine test (routine exam R/E leh culture) te pawh tih tel a \ul thei bawk ang. Zun test atanga infection eng emaw tak a awm a nih chuan antibiotic hmanga enkawl a ngai ang a, a hrik thah kha a tul dawn tihna a ni. Chutih rual erawh chuan PMS leh Dysmenorrhea te hi thenkhat chu enkawl dam a har phian bawk.

    Kawng nat chhan dang lehah chuan kawng ruh fel lo, inrem dik lo te, thazam rawn chhuahna lai tawt vang te (chung zingah chuan Sciatica tia kan hriat lar hi a common viau bawk), kawng herh vang te, kawng bawr tha/tihrawl tawm vang te, nerve lam fel lo hrim hrimte a ni thei bawk. Hetiang lam vanga kawng na a nih chuan X-Ray, CT Scan emaw MRI te hial pawh tih a tul thin. Hetiang lam fel lo a nih chuan Orthopedic Surgeon-te enkawl an mamawh tihna a ni bawk.

    Taksa awm dan (posture) dik tawk lo vangin kawng na hi a awm fo bawk. Nilenga office thutthlenga thu thinte hian an nei duh viau mai. Ritchawi nasa, hah lutuk, kun chunga thil rit chawi fote hian kawng na an nei duh hle bawk. Heng vanga kawng na a lo nih chuan PMR (Physical and Medical Rehabilitation) Specialist-te inentir a tul thei bawk ang.

    Engpawhnise, i kawng nat chhan hi hriat hmasak a pawimawh phawt a. Chumi a chhan azir chuan ka rawn tar lan tak doctor – Gynecologist, Orthopedic Surgeon emaw PMR Specialist te lo inentir thei la, i harsatna hi an pui thei ngei ang che.