Kumin hi tun kum zabi thara Mizoram kawng chhiat nasat ber tum a ni hial awm e. 'Kawng a chhia' kan tia, kan phun a, kan ang a, mawhphurtu sorkar kan sawisel a, thenkhatin a lo ti-politics mek bawk a. Eng ang pawhin inpuh nasain lehlam lo insawi thiam mahse kan ram chhung kawngpuite hi a chhe miau si a, insawifiah tumte thusawi hian mipui a hmin zo tak tak lo. Kawng chhiat chhan pawh hi a mawhphurtuten an ngaihsak loh vang a ni mai. A chhan dang leh chu an sum duh lutuk vang a ni bawk ang. Mizoram PWD hian hnathawh pathum an nei a, chungte chu Chief Engineer pathumin an vil a. Sorkar building sak te, state sorkar enkawl kawngpui (kawng tur zawn, a sial, enkawl) te leh kan ram chhunga national highway te hi Mizoram PWD mawhphurhna liau liau a ni. Heng bak hi hna dang an nei lo ti pawhin a sawi theih ang, engineer rualin an enkawl department lian tak an ni a. Sum hmang tam department an ni thin bawk. Kumin budget speech (2017-18) ah khan finance minister-in, "Tun dinhmunah kan kawngpui thenkhat ten duhthu an sam tawk lo hle tih sorkarin a hria a, chuvangin a siamthat hna nasa zawka kalpui nan 2017-18 chhungin sum tam zawk dah tum a ni. Kawngpui awmsa chei that nan 2017-18 chhungin Rs 239.50 crore ruahman a ni a, hei hi nikum lama kan sum dah aiin 259% laiin a tam a ni. Tin, kawngpui siam mek leh a thar siamna turin Rs 657.64 crore ruahman a ni a, hei hi nikum lama kan sum ruahman Rs 387.65 crore aiin 70% laiin a tam bawk a ni," a ti. " Hei hi chhiar chiang ila, kan ram kawngpui chhiat chhanah hian puh tur dang an vang, sum harsatna lam a ni lo, a mawhphurtu hian a ngaihthah vang a ni. PWD hi sum hmang tam department a nih avang pawh a nianga chief minister-in a chang a, MNF hun lai pawh khan a ni tho a. CM chan department an nih avang hian department dang aiin an indah sang deuha sawi a ni fo nghe nghe. Chu lam chu thuhran ni ta se, a changtu chief minister ber hian a vil tha vak lo ni berin a lang a, chu chiah chu kawngpuiin a tawrh phah a, mipuiin harsatna kan tawh phah ta bawk a ni. A kaikuang hi mipuiin kan hai lo ang. Kum 2007 khan Mizoram Road Fund Act siam a ni a. Mahse, a taka kalpui a ni lo a, kum 2010 ah a Rules hi peih fel a ni chauh a. State thenkhat chuan Road Fund Board an din a, an state chhung kawngpui an buaipui fe tawh hnuah sorkarin a ngaihthah reng a. MRF Act hi nikum khan siamthat (Amend) a ni a, he dan tlawh chhan hian Mizoram Road Fund Board (MRFB) din a ni ve a. A vawi khatna atan Road Fund Board hi kar kal ta September 13,2017 khan an thukhawm ve chauh a ni. Kawng siam leh enkawla mawhphurtu lu ber hian kumin a kawng chhiat chhanah hian ruahsur a chhuanlam a, amah leh department lam ngaiah chuan chhuanlam tling a ni ngei ang. Mahse, kan ram hi fur ruahtui tamna ram, ruahtui tlak hun bi pawh hriat sa na ram a ni a. Hnathawh hun chhung pawh hriat sa a ni a, inruahman lawk theih a ni a. Vei tak takin vei se, thlasik leh thal lai pawh khan hna engemaw zat chu a thawh hman chiang a. Mahse, an thawh loh chhungin ruah a sur hman ta a ni ber. Good governance nihphung pawimawh tak pakhat chu hruaituten an tihsual/tihdik loh leh tih thatah mawh an phurh ngamna (Accountability) hi a ni. Hei hi kan sorkar hian a tlakchham lam tak a ni, a hmaa MNF sorkar pawh kha a ni tho. An tih thatah ‘sorkar vang,’ ‘Pu Hawla hmalakna’ an tia. Sorkar hmalakna ni miah lo Mizote tana hmingthatna tur thilah pawh tim miah loin sorkar hmalakna vangah an puh thin a. Mahse, thil dik lo awm chang te, sorkar hmalakna dik lo ah te, thuneituten thutlukna an siam sual chang te, pawi lian tak a thlen chang te hian mawh an phur ngam leh lo a, puh tur an zawng chiam zel a. Hruaitu puitling zia a ni lo a, sorkar tha ziarang a ni bawk lo. Mawhphur ngam se, siamtha turin hmala bawk se a tha mai a, mipui pawhin kan ring mai tur a ni a. Sorkar website-a tarlan danin tun hnaia Mizoram Road Fund Board thutkhawmah PWD Secretary tarlan dan chuan tun dinhmunah Mizoram chhunga National Highway Km 1465 chu Chief Engineer-Highways kaihruaina hnuaia MPWD chuan Ministry of Road Transport and Highways(MORTH) atanga sum a hmuh in enkawl mek a. Aizawl khawpui chhung kawngpui te, World bank leh Asian Development Bank project hnuai kawngpui leh Kolasib Division tih loh zawng chu Chief Engineer - Roads kaihhruaina hnuaia enkawl a ni. Chief Engineer - Roads enkawlna hnuaiah hian State Budget hmangin kawngpui Km 4662 a thui leh Lei 105 enkawl mek a ni a. Kawng enkawlna ah hian hnim samfai, kawng chhelai khuh that, kawngkhuar hnawhkhah, tuihawk luankawr thenfai, culvert siamthat leh lungrem thawmthat leh kawng a thing leh mau tlu thenfai te thlengin a tel a. Heng senso atan hian kum 2015-16 khan Cheng vaibelchhe 33.50/- dah niin 2016-17 atan Cheng vaibelchhe 36.70/- dah a ni a, 2017-18 atan cheng vaibelchhe 39.50/- dah a ni. Sorkar laipuiah hian kawngpui siamna tur sum (Road/highway fund) hi non-lapsable fund a ni a, kum khata hman zawh loh pawhin hman zawm zel tur chi a ni. Lirtheiin an hman petrol leh diesel atanga chhiah tlingkhawm chu he fund atan hian dah a ni a, chumi zar chu state sorkar pawhin kan lo zo ve thin. Kan sorkar pawh hian Road tax te, vehicle tax te, petrol leh diesel tax te a tisang fo a. Hengte hi kawng siamna atan te hian zuat ta se. Kan ram kawngpui siam that hi kan sorkar kutah a awm tih hi mipuite hian kan hria a, a mawhphurtute hian an hre tawk lo a ni. Engkim hi politics khelh nan an hmang tawh a. Kawng chhia lah MNF in an ti-politics a, chutiang bawkin congress pawh hian inthlan hun thlir ranin kawng hi an la buaipui duh lo pawh a ni mai thei asin. Nakkum hi MLA inthlan kum a ni a, budget-ah kawng siamna tur an dah belh ngei anga, kumina budget pawisa kawngpui siamna tur hman loh a la awm bawk anga. Kawngpui siam that kum a ni ngeiin a rinawm. Mizorama kawng that ber kum pawh a ni maithei e. I lo thlir ang.