Zawhna: Kawthalo hi eng vanga thleng nge? A awm thut hian engtia tih tur nge ni ang? Engtia ven tur nge ni ang? Zinmi ka ni a, doctor han rawn theih lohna hmuna awm chang a tam thin a. Khawngaihin min hrilh thei em? Chhanna:  Kawthalo hi tunlaiin a leng nasa hle a, tui atanga kai theih a nih bakah ei leh in atanga a hrik kai theih a ni a. Chumi bakah chuan kut silfai that loh vangte pawhin a awm thei a ni. Zinmi i nih chuan a hnuaia mi ang hi lo zawm i tum thin dawn nia. I zin chhuahin tui mai mai in lo la, hei tunlai chuan package drinking water te a tam tawh a, a man a to lo bawk a, pai teuh la in thin la tui hriat chian loh chu 'risk' loh a tha, dam lohin inenkawlna a man a to zawk. A dang lehah chuan kut sil zin hi a pawimawh hle a, chaw ei dawna kut sil loa bar mai hnam kan ni a, zir tur kan la ngah hle. Hand sanitizer emaw dettol sahbawn emaw pai la, a tam thei ang ber i kut sil thin ang che. Hei hian i kut a hrik awm thei te kha a tithi dawn a ni. Doctor awm lohna hmun emaw medical facility mumal lohna hmuna i awm laia i kua a that loh chuan i taksaa tui chhuak aiawh tur khan tui i in tlauh tlauh a ngai a. A theih chuan ORS siam chawp tur pai sa la. I nei remchang lo a nih chuan tui um khatah chi leh chini chawhpawlhin a tam thei ang ber in la chu chuan tui chhuak bakah electolytes chhuak te kha a ai a zuk awh dawn a ni. PHC emaw khaw tin deuhthawah a awm tawh a, vawi 2-3 i inthiar tawh a a khawk a a reh mai lo a nih chuanchutiang hmun i chauh chhiat hmain pan vat la chutah chuan an lo enkawl thei ang che. I kua a that loh chuan a tlangpuiin bacteria chhia in a hneh che tihna a ni a, a that turin damdawi ei tur a ni a, daktawr rawn lawkin pai mai a, a ei dan tur te pawh in zawh lawk a pawi lo ang. Mahse anti-biotic hi chu doctor rawn lo chuan ei mai mai loh tur a ni tih hriat a tha ang.