2021 July thlaa khelh zawh tak, Euro 2020-a Netherlands football coach Frank de Boer-a an bân hnu lawkah a hmun ruak luah turin Louis Van Gaal-a lak a ni a. Netherlands football coach atana a tum thumna tur a ni tawh nghe nghe. 

Kum 70 mi Van Gaal-a chuan, “Keima tan he hna hi ka thlang lo, Dutch football that nan ka rawn pen chhuak. Dutch football Association aiawh ni ta ila, kei lo chu pan tur dang ka hre chuang lo,” a ti hmiah a nih chu (Vanglaini, 19.8.21).

A chapo hmel viau naa a ril ka ti. Sawifiah deuh ngaiin a hre ve a niang chu, amah pawhin, “Ka thusawi duh dan chu mak pawh in ti mai thei, mahse hun kan neih tlem avangin tawnhriat nei tha a pawimawh a ni,” a ti zui. 

Nuna harsatna tawk tam tak ka hmu thin a. Rilru hnual tam tak leh mahni insit ngawih ngawihte pawh ka kawm tawh thin. Harsatna hmachhawn ngam loa tlan chhia a, bik bosan kumkhua tum ta maite ka hmu fo tawh bawk. 
Van Gaal-a thusawi dan hi zir tham a ni e. A chapo a ni ngawt lo. A indah hniam lo mai a ni. A theihna a hria a, tuna an ramin harsatna a tawh mek lak atanga theihtawp chhuah thei tur chu amah a ni tih a inhre mai zawk a ni. A nun a en a, a hun hman tawh dante a thlir a, 2000 kumah leh 2012 ah tuna a hna hi a thawk tawh a. Club hrang hrangah a thawk teuh tawh bawk. A thawhna apiangah a chungnung ber bik reng hauh lo. Chuti chung chuan a indahhniam duh lo. A tawnhriat tawh a ngaihtuah a, tun dinhmunah tawnhriat ngah tawh an pawimawh tih a hre bawk. Ama thatna a hmu ve mai a ni. 

“Kei lo hi chu pan tur dang ka hre chuang lo ang,” a han ti mai hi a mak lem lo. Amah a inhmu lian satliah a ni mai lo bawk. Amah ruaitu turte pawhin amah an hmu lian ve tho bawk. An ring tawk a, an pan bawk reng a ni. An ram harsatna tawh chu a hmachhawn tur atan an chhawpsak tlat a ni. Chu chu pawmin, “Kei lo chu,” a ti mai a ni. 

Kan dinhmun theuha kan hna te, kan tih tur inchhawp te, harsatna kan tawh mekte hi kan hmachhawn theih tura ngaiin chung lamin min chhawpsak a ni ngei ang. Chutih laia keini berin, “Ka tlin lo ang,” kan tih zel mai chuan khua a var thei dawn lo. 

Mi mal nuna buaina kan tawh chang te, chhungkuaa harsatna kan neih tum te, hnathawhna hmuna thil khirhkhan a awm tum te, ramin manganna a tawh laite hian, mahni dinhmun theuh atanga a chinfel dan zawn kawngah leh thawk tur hian “Kei lo chu an awm chuang lo,” ti ve mai ila. Mahni insit hauh loa kan phak tawka theihtawp chhuah tur kan ni e. Kan tawnhriat tawh te, kan paltlang tawhte thlir ila, kan hmaa inchhawp chu chona tharah ngai leh mai thin ila. “Hmanah pawh hetiang dinhmun hi ka paltlang tawh, tunah pawh ka bei leh ang,” tih mai thin tur a ni. Van Gaal-a pawhin a theihna te, a tawnhriat te, a lo beih tawh dante a en a, a hmaa inchhawp chu a tlanchhiatsan lo satliah mai ni loin, “Kei lo chu,” a ti ngam mai a ni. Mahni hna leh harsatna hi, mahni hmachhawn tur, mahni chinfel tur a ni ve bawk reng alawm! Mi dang pek chi a ni lo, ‘kei lo chu’ tih mai reng thin tur a ni. Mawhphurhna hi lak ngam tur a ni.   

"Ka harsatna hmachhawn tur hian kei lo chu pan tur dang ka hre chuang lo,” tiin mahni inring tawk ve ila. Tlanchhe loin pawm ila, hmachhawn ila, hneh turin kan bei ve ang chu. Mahni theihna hriain insit bik lo ila. Finna leh chakna min pe theitu hre tlat bawk ila aw!