Keimah vângin ka lungngai fo a, ka rilru hrisêl tâwk loh avângin ka tûm bûr thin. Ka ngaihtuahna leh ka suangtuahna avângin ka ngui nghuai thin a, ka lo inbeisei sân ‘over’ thin avângin chauin ka tlu hnawk thin. Mi dang puhmawh tûr ka zawng fo a; mahse, a tâwpah chuan, keimah bawk a ni dik lo bera chu,’ tih hi a thû maia zir chu a awlsam viau thin a; mahse, a taka nunpuia in-‘train’ chhuah erawh thil harsa tak chu a ni. Ka bul tan thatzia leh chu chuan rah tha a chhuah dân ka hre thei hle a; mahse, a tâwpa a zuih ral chângin a chhan berah mahni inpuh ka harsat ngang thin si a … tihte hlei hlei hi!
Company hotu thu chhuak: Company lian tak pakhata an hotu lû ber, an Chief Executive Officer (CEO) thu chhuak chuan hnathawktute chu a barakhaih ngei mai. A barakhaih rualin zawhna tam tak an rilruah a tuhsak bawk. A thu chhuakah chuan:
‘Kan company-in chhiat kan tâwk a; kan thawhpui duh tak pakhat chu a boral hlauh mai. Vawiin hian vui liam a ni dâwn a. Keini, he lai headquarters-a a thawhpui zawng zawngte chu amah thlahna hun tawi, vawiin chhûn dâr 12-a Conference Hall-a hman tûrah tel vek tûr a ni. Amah hi kan company-a hun rei tak a châm chhûngin hna pawimawh leh tûl tak tak a khawih thin a, a theihtâwp a chhuah thinnaah lâwm thû ka sawi a. Mahse, dik taka sawi chuan kan company-in hmâ sâwn loa ngai a awh rengna chhan bera pawh “amah” tho hi a ni tih erawh i hre tlâng ang u,’ tiin.

Tunge ni ang le?’: Mi an thih chuan an mahni sûn nân emaw tal an hna thawh chhuna an thawh that lai leh an chanchina chhuanawm lamte an sawi duah zêl a ni ngai a. Chutia an company hotupa berin a staff ngei ngei lo boral ta chanchina a duhawm lo lai a’n sawi tel zauh chuan hnathawktute beng chu a ‘tivir’ ngei mai. A hming leh a nihna emaw a hna vawn lai emaw a sawi lang dêr si lo a. ‘Tunge ni ang le?’ tiin hnathawktute chu an inzâwt ta sup sup hlawm a.
Tin, a thu hrimah, an hotupa hian hetianga an company-in hma sâwn loa ngai an aw thû emaw tlâk chhiat lam a pan thû emaw hi an meeting-ah pawh a sawi lang ngai miah si lo a; tin, a chhan berah mi mal hming phei chu a lam ngai lo hrim hrim a ni si a. Chutia an thawhpui boral ta, an company hmasâwn loh chhana a’n puh ngawt mai chu mak an ti hlawm ngei mai. Chhûn dâr 12-a vuina inkhâwm hun nghâkin, hnâ pawh thawk mûmal loin, tunge boral chu tih hriat châkin an hawi tang hrû vek hlawm mai a ni.

Ruang chu le!: Chhûn dâr 12-ah chuan Conference Hall khat tlatin hnathawktute chu an rawn pung khâwm ta a; an headquarters building-a hnathawk tel lo rêng an awm lo. Dawhsân hmâah chuan kuang a inhûng rûn a. Hnathawktu pung khâwmte chu theh hmeh reh takin reh thiap hlawm mah se an rilruah ‘Tunge thî chu ni ang le?’ tih zawhna erawh a ri ring hle. An hotupa ber chu a rawn ding chhuak a. Thu tawi tê a rawn sawi a:
‘Vawiina kan sûn mêk hi in hriat theuh angin kan company-a hnathawktu hlun tak, headquarters office-a thawk thei khawpa senior tawh a ni. A hnathawh tawhah te lungawina hmuh tûr tam tak a awm ngei a. Amaherawhchu, mi tu pawhin hmâ a sâwn loh chuan a hnung tawlh a ni si a. A hnathawhah hmasâwnna hmuh tûr a awm si lo a; chu chu, company pumpuiin a tuar ta a ni. Amah thlah nân a mal tê têin ngawi rengin kuanga a ruang hi kan en theuh ang a; kan en zawhah mahni hna thawhna hmun theuh ngawi reng thoin kan pan leh zêl dâwn nia,’ tiin.
An hotupa ber chuan kuang chu a zu bih hmasa ber a. A dawtah company hotu dang, Board of Directors-ten a indawtin an en ve zêl a. Chutiangin tlar hmaa thu pha chinten zui lehin hnathawktuten an zui zêl a. A en zo apiang ngawi rengin pâwnah an chhuak zêl a. Tu mah tap an awm lo! An hmêlah chuan mak ti hmêl a hmuh hmaih theih hauh loh thung. A chhan chu, an mi vûi, kuanga awm an zu hmuh chu ‘anmahni’ zêl a nih vâng a ni! Kuang chhûngah chuan dârthlalang mai a awm si a!

Keimah vek!: Hna thawhhona a ni emaw pâwl emaw pawh ni se, ka tel ve a nih chuan a chhiat a thatah mawh ka phur ve a ni tih hriat hi ka harsat fo thin. Sorkar ngat phei chu, ka thlan tlin an ni tih inhre duh loa an hnathawh sawisêltua tan hi nuam ka tihzâwng tak a ni si. Ka siama ka din, ka mawhphurhna a ni tih hriat hi harsa ka va’n ti thin tak!

‘Ka va’n nalh êm! Ka va’n thawk tha êm! Ka va’n sawi tha tak! Ka va’n ziak tha êm! Ka thil post chuan like-tu a ngah lehpek ang chu aw… Ka thil ngaihtuah dân chu ka thawhpuiten tha an ti leh dâwn mang e!’ ti zâwnga rilru put thin hi a tha e. Mahse, tlu phut thei, sêlna tâwk thei, tha lo min titu tâwk thei, min ngeia min ‘ten’-tu tawng thei reng kan ni tih kan inhriat tel thin erawh a ngai hle mai. Beiseina te, suangtuahna sâng takte chu kan nei tûr a ni a; mahse, kan beisei ang kan thlen phâk loh pawha lungawi taka awm zui thei kan nih tel a ngai bawk thin a ni.

Hlimna leh lâwmna a ni emaw lungngaihna emaw vuina pawh ni se la, keima inpêk, keima insiamchawp, keimah atanga chhuak hi a lo ni deuh vek mai, tih te hi ka lo dâwn ngai lo reng reng mai a…

Ka hmêl leh ka taksa chauh hi ni tin dârthlalanga inena lungawi mai lo hian, ka rilru put hmang pawh hi ka inen tel ziah a ngai thin a nih hi!