(Kum 2000 leh 2009 inkar thil thleng langsar zual)
(… kar hmasaa mi chhunzawmna)

2006: Tualchhung zaithiam te’n music vedio siam a, second hnih dan lek leka thawmhnaw an thlak chhen laiin ngai teh! Churachanpur atangin zo hnahthlak nula Lalruotmawi a rawn lang ta phut mai. A aw a nalh a,a zaithiam emem a, a incheina a simple a, pa ho duh zawng takin a nu hnap mai bawk si. A hmel a lo tha bawk nen, a va thawk na kher em! Zoram pavalai an nghing suau a ni ber mai. Chhun zan zawmin demand channel-ah Ruotmawii hla an thlang tluk tluk mai a ni. Hemi kum thal lai hian amah Lalruotmawi ngei mai chu Mizoram-ah a rawn kal ta nge nge a, Lengpui airport-ah a maka maka tamin(Pu KL Liana meuh pawh telin)an lo hmuak a, khaw lian bawhbel zawn ang maiin an ri hulh hulh mai a ni. Thalvaekchar laia thang hmuna mei si lut fuh ang maiin Ruotmawii boruak chuan zoram pumpui hi kar loah a tuam chhuak ta duai duai mai a ni.

World Cup kum a ni a, Final inkhel hmuhnawm takah France thiampuipa Zinedine Zidane chuan Marco Materazzi chu a awmah a tauh thal tawp mai a, red card hmuin hnawh chhuah a ni a, Italy an champion zui ta a ni.

Hemi kum kumtawp hian LPS leh UNO DC Charka tangkawp chuan reality show hmuhnawm leh ngaihnawm tak mai ‘Youth Icon’ thlanna an buatsaih a, Vanlaiphai tleirawl Zoramchhani chu ‘Youth Icon’ ah thlan a ni ta.

October ni 14 hian kawng tinrenga zonu chhuan awm Pi Lalsangzuali Sailo chuan mual min liam san ta bawk.

2007: Hemi kum hian Mizoramah thil la thleng ngai lo, thil duhawm lo tak a thleng tlat mai. October ni khat a ni a, chanchin lungchhiat thlak takin zoram a tuam ta. Rev Chanchinmawia, Khatla Pastor Bial vawngtu chu Khatla Pastor Quarters-ah thia chhar a ni. ‘Mahni in that nge tual thi’ tih thuah inhnialna nasa tak a chhuak zui a, Mizoram Presbyterian Kohhran chuan mahni inthat a an ngaih theih loh avangin mitthi vui dan pangngaiin Biak inah an vui a ni. Rev Chanchinmawia thihna hian politics ah pawh ngawng a nei hle niin mi tam takin an ngai.

Zonet TV-in reality show, ‘Mizo Idol’ thlanna an buatsaih ve thung a,intihsiakna a tel te an zai thiam tlang bawk a, host Zonuni a zei bawk a, mipuiin an hlut hle. Intihsiakna a tel zaithiam te’n Rosangliana (Zo Rock) hla ‘Zoram ngaih hla’ an sa lar hle bawk.Champhai tlangval Lallawmpuia chu ‘Mizo Idol’ a thlan a ni ta.

2008: Chiahpuam sum a puak keh dur mai. A nghawng pawh a na teh e. Mi tam takin an awm an chum a, an rum tlawk tlawk mai.

MLA inthlan kum a ni a, kum tir phat atangin politics-a inchirhthehna thawm a ri ring nghal hle. BAFACOS sum hman dan dik lo tih te, mawza man to tih te, OPD chhawng bo tih te, Ekin kal thei, a hlui lei tih te chu eptu lamin ruling party MNF an beihna lang sar a ni. Congress lamin NLUP tha mi an lo zuar ve bawk a, cheng nuaikhat sem an sawi uar hle mai bawk. MPC leh ZNP te an thawk dun leh a, party pahnih tangrual hian Brig.T Sailo chu Chief Ministerial candidate atan an vawrh chhuak bawk.

Hemi kum hian Pu Lalthanhawla kaihhruai Congress chu hneh taka thlan tlin a ni a, Chief Minister Pu Zoramthanga chu Champhai North leh South-ah a ding kawp a, a tling zo lo ve ve a ni. MNF lam hian an tlak chhanah EVM an mawh puh deuh niin a lang.

2009: MP inthlan kum a ni a, Congress in CL Ruala an theh chhuak a, opposition tangrualin Dr H Lallungmuana (Ex MP) an theh chhuak thung a, result puan a nih meuh chuan Congress candidate hi hneh taka thlan tlin a ni a, Mizoram MP inthlana inhnehna nasa ber a ni hial mai.
Mipuiin NLUP cheng nuai khat sem an nghak hlel hle. CM lah chuan, ‘A hun takah kan sem ang’ a ti nghut nghut mai bawk.