Kum 10 hma lam daih, kum 2000 leh 2009 inkar (kum 10 chhung) a Mizorama thil thleng langsar zual, mipui nawlpuiina kan buaipui langsar zual deuh deuhte sakhi chul ram fanin i han hrut thuak thuak teh ang.

2000: Kum sangbi thar (new millennium) kan chuang kai a, MNF chuan inthlannaa an sangawi zawnpui, MPC nena an thawhdunna an chhu chat fel awrh a, anmahni pual liau liauin sawrkarna an siam ta. Zing lamah Chief Minister leh Minister te bangla a lun thin hle. Tuk pumin an mahni hmuh tum party mi leh sa an inse hmur tuau tuau thin. Pu Zoramthanga kaihhruai MNF sawrkarah mipuiten beiseina an nei sang hle niin a lang. Hemi kum hian ‘Switzerland of the East’ tih te, ‘Kum thum chhunga ei bara intodelh’ tih tawngkamte chu kan hre zing hle mai bawk.

Kum sangbi thar kan chuangkai hlim awrh tihin Mizoram chhim lamah Mizoram pum nghawr nghing dawt tham thil a thleng tlat mai. January ni 17, Thawhtanni tlaiah Lawngtlai khawpuia State Bank chu rawk a ni a, bank rawktute hian cheng vaibelchhe nga chuang an la chhuak a. Chanchinthar ngaichangin mi tinin beng kan chhi a, radio kan ngaithla thup mai. AIR, Aizawl Station zan chanchintharah bank rawktute police-in ramhnuai ngawpuia an hual chep thute a rawn puang ulh ulh a, ‘I hi le, an man ngei dawn e’ kan ti a. Mahse, vawin ni thlengin Lawngtlai bank rawktute hi man an ni ta lo.

February thla laihawlah Zemabawkah CKTP General Conference neih a ni a, thil dang zawng aiin Durtlang KTP-te vai thuama an inthuam a, ‘Phatsan lo ang’ tih hla an sak chu a lar ta ber a ni.

Kum tirah AR Ground-ah kum sangbi thar lawmna ropui tak neih a ni a, hranghlui zaithiamten an hla thulkhung an sa a, mipui lawm an la hlawh viau mai.

2001: Hemi kum hian Mizoramin kan la hmelhriat ngai loh ‘Khawihthluk rawngbawlna’ a lar hle mai. Mimi-i leh Faktea te chu he rawngbawlna kengtu ber hi an ni a, Faktea crusade neihna biak inah chuan thutna chan loh hlauin darkar khat aia hmaah kal a ngai thin. BDA hla, ‘Tihdam kan ni ta, aw halleluiah Amen’ tih leh ‘Khaw thianghlim Jerusalem’ tih te chu sak lar ber pawl a ni. Traffic tizam khawpa Mualpuia Vantirhkoh inlar hmuh tuma kan inhawr khawm chiam kum kha a ni.

Hemi kum hian keimahni pualin Mizoram University kan nei ve ta a, thil lawmawm tak a ni. Vice Chancellor hmasa ber chu Professor AK Sharma a ni a, Registrar hmasa ber chu Pu PC Lawmkunga, IAS a ni.

2002: Hemi kum hian Mizorama thil la thleng ngai lo a thleng tlat mai. Revd Chuauthuama’n Nilai zan thupui a ziah, ‘Thuthlung hluia Pathian thil tih mak te’ tih chu Pathian thu tih dazatnaa ngaiin mi pakhatin a hal hluai mai. Hei vang hian Presbyterian chang lo Kohhran dangte pawhin he lehkhabu hi an ngaihven phah hle a, Synod Press-ah chhut nawn a ni a, an hralh zo leh vek bawk. Nilai zan thupui bu hralh hnem ber leh mite ngaihven hlawh ber a ni ta hial mai.

Mizote ngaihven World Cup khelh kum a ni a, Japan leh South Korea-in an inthlen tawm a, khawvel rin phak bakin a thlengtu, South Korea an che tha a, semi final an thleng hial a. Final-ah Brazil-in Germany hnehin an champion ta. Ronaldo a lar hle.

Fiamthu thiam Mapuia (Zephyr drama) lar tan kum a ni a, KTP General Conferenve vawi 48-na, Ramhlun, Aizawla neihah ‘Hmangaih ram nuam’ tih hmangin drama hmuhnawm tak an rawn chang a, mipuiin an lawm kher mai. Mapuia’n a hming a chher kumkhua dawn ta a ni. Zaithiam Vanlalsailova lar tan kum a ni bawk.

Hemi kum October 15 hian Mizo hla kungpui miril Zirsangzela Hnamte chuan mual min liamsan ta.

2003: Mizoram tan kum duhawm tak a ni a, kum duhawm lo tak a ni bawk. Mizoram dung leh vangah Vanlalsailova a lar hem hem hle mai. Concert a nei awl lo va, mipuiin an bawr hut hut a ni ber. ‘Aw hmeltha, aw hmeltha’ tia zai paha a bân a’n vai a, a han insawi nghar nghar tawh chuan nula leh tleirawlte chu an khek rawih rawih a, an thidang lo chauh a ni ber e. Hemi kum hian Skylink Studio, Tuikhuahtlangah Joseph Zaihmingthanga’n a album hmasa ber ‘Tah chuan a leng’ tih a release bawk a, a lar viau mai bawk.

Thil lawmawm tak chu, Under 16 National Football Championship-ah Mizoram kan champion hlauh mai! Final match hmuhnawm tak, AR Ground, Aizawl-a khelhah Mizoram chuan 2-0 in Meghalaya kan hneh a, kan champion ta! Vanglaini Sports columnist Tetea Hmar-in Mizo thalaite min fuih phur thiam bawk a, Lammual chu kawr sen hlirin a khat a ni ber mai.

Kum laihawlah Vincy Hotel, Chanmari-ah hmeichhe naupang pawngsual a ni a, Mizote kan va thinrim kher em! Hemi thu kal zelah ‘Burma mi zawng zawng hnawh chhuah’ thu, thu rum tak mai kan han puang a, kan Burma unaute kan han hnawt chhuak chum chum a, Bawngkawn leh Zemabawk phei velah nunau mangang, hawnna tur motor nei si loa an han thu nghuk mai chu an va lainatawm kher em! Mi pakhat pawi khawih vanga mi fel tam takin an tuar ve thin hi a pawi a ni.

MLA inthlan kum a ni a, district thar ngiattuten thawm an rawn nei thar leh a, inthlan a hnai tial tial a, Saitual, Khawzawl leh Hnahthial khuate district demand thawm a ring tial tial mai. Police-te nena innawr buainaah thisen chhuahna hialte pawh a thleng a nih kha. Kut hnathawktute lungawi lo thawm pawha ri ring hle mai bawk.

Kum tawpah MLA inthlanpui neih a ni a, Suangpuilawn bialah thil duhawm lo tak a thleng ta! MLA candidate pathum - Laltanpuia (MPC), Dr Ngurdingliana (INC) leh Vaninmawia (MNF) te chu ruk bo an tlat mai le. He kidnap drama (?) hian Mizo mipuite min tiralkhel em em a, mi tam tak an chiai a ni.

Result puan a ni a, rorel lai MNF party chuan hnehna changin sawrkarna an siam leh thei ta. Hemi tum hian ZNP leh MPC te chu an thawk dun a, bial 20-ah candidate intawm an siam a, bial 20 dangah candidate hran ve ve neiin ‘free zone’ an ti thung a, thawhho dan mak tak a ni. A thena nisa, a thena ruah sur tih ang mai lah ni.

2004: MP inthlan kum a ni a, opposition party pathum tangrual chuan Dr Laltluangliana Khiangte an vawrh chhuak a, MNF-in MP ni lai, Pu Vanlalzawma an vawrh chhuak leh a, ruling party candidate hi a chak leh ta a ni.

Hindi serial film, Kasauti Jindagi Ki lar vanglai a ni a, a bikin nuhoin an atchilh nasa hle. Prem-a chah chhuah an tum uaih uaih kum kha a ni.

Mobile phone kan hmelhriat tan a, a nei pha chinte chu tlem tê an la ni. An awrh deuh ngei thin bawk. SimCard chan loh hlaua BSNL Office kawta insual buaina pawh a then chiam tak kha maw le.

Zaithiam rual intel khawm, Daduhi, Sailoa, Joseph-a, Eli leh mi dangten Valzotea Hla sain Audio Casettee an siam a, a hit khawp mai.

Kum laihawlah Vanlalsailova a piangthar daih. Thalai titi a tling.
Kum tawpah khawvel pum huap pawha rock band lar, Petra-in AR Lammuala-ah concert an rawn nei a, entu mipui an tam khawp mai.

2005: MLA inthlan vawi hnihah a zawna hnehna an chan zawh loh avangin Mizoram Pradesh Congress Committee chhungah lungawi lohna thawm a ring sawt hle a, Pu Lal Thanhawla duhkhawp lohna a nasa tial tial a, a tawpah a puak keh ta. Pu J.Lalsangzuala hoin Congress party-a an mi lawk tak tak te chuan party thar, Mizoram Congress Party (MCP) an din ta rup mai. He party thar hi a ding rei lutuk lo. A hnu kum hnih emaw lekah MPCC-ah bawk an inchhung lut leh a, ‘Belh ngai Laldanga ka then thei lo’ an ti a ni ber e.

Hemi kum hian Korean serial film lehlin, Green Rose, Full House etc. a lar hle a, mobile phone nei pawh an tam ve ta khawp mai bawk.