Kum 1969 Vawkhniahzawnthla (thenkhatin Vawkhniakzawnthla an ti) thla dêt tìr lam, zàn dâr 12 pelh—ti ila—zíng lam dár hnih a hnaih tawh lam a ni zaw maw aw ka ti, he thu ka ziah hun hi … ka chiang ngam ta chiah lo.

Min khungna pindan tereuh tê-in tukverh a neih chhunah chuan ka dâk ve thei tâwk tâwk a. ‘Tâwk tâwk a…’ ka’n tihna chhan chu ka na êm a tin ni!

Tukverhah chuan ka dâk dá dá a. Dawlrem leh Khauchher, Chung-û chen chuan an thiam dàn ‘key’ theuh chuan an lo chiar tak chiap chiap hlawm a. Min awih mut te pawh an tum a ni fahmiang—a teuh si lo! Ka hmangaih hmasak ber Maruati—a nuih seiha Zoram buai thim mup mai leh khawvêl thim chhah hlup ti mita ti êng vek thintu kha—“Kawktu” tia puh ka nih avàngin ka chán rih a. Chu ka chàn rih ka ka chan lêt leh theih dàn ngaihtuahin mut chhuahna chuan hla te khuaah mú angin min thlawh bosan vawng vawng mai a ni!

Hrãm thei tinréng hràmte chu ka ngaithla kar tho a—nizàna Maruati’n biahthu thlum tak min hlan ka benga chám reng ang riakin. Zàn dár 11 a pèl ta. Min véngtute pawh an inmut-thlûk chhâwksan tawn sek tawh tih ka hriata ka hmuh rual chuan ka nu sangha rêp min pai rûk, ka kapa ka dah that khiau chu ka la chhuak sà sâ a.

Min mana min véngtu chahthlâksan tâk Rakzu; Rakzu tihah pawh, a Tuitling ngat no chanve nên chuan sangha rêp chu, kei—ram sipaia tang ve duh hauh lo chuan ka’n maih tak tak mai a! Chhuan thum dáwn châw fâk tawh lo tán chuan chu aia tlaia inhnangfâkna tùr dang awm theiin ka hre lo!

Chutia ka’n inhnangfâka ka ka thisen a lo lum a, ka thil in telin ka lú pawh a tih deuh chháw hnu chuan ka huaisen thar ta thut a ni ang chu—min véngtu muthlu kawlawm sin lai chu ka phawhsak hlawl a. A mutna síra ziak-loh-puan leh pencil chu ka lâksak bawk a. ‘Engtin nge ka tih ang aw…?’ tia inzawh ka ngai lo. Chutah ngei mai chuan a ni, ka duh tak Maruati tâna lehkhathawn ka ziah tâk ni:

‘To, hmangaih leh duh ber Maruati,

‘Dorál kára min véngtu Chung Pathian chuan ka duh tak, nang pawh a awmpui zêl che a ni tih ka rinna hi a chak a; kalâwm hle a ni.
‘Khatia, a chhan, a awmzia, a nihna pawh hre loa hnam pasaltha intiten dâwt thu puarpaw-léng hmanga min puha min man a, min dâwp a, min nghaisak zàn kha, nang nèna hmangaihna pár zú kan dawn dun zan hnihna tùr chauh a nih kha tirawh maw … ?‘A hma zàn, Vawkhniah-zawnthla thlâ a rawn dêt dê dê laia in bathlàra kan thu sawi sep sep te kha i la hre ve reng em?
“Hmangaihna hian engtia rei nge a daih thin le?” tih zawh-na kan khel dun lai te kha. Kei chu, khami zàn vêka kha zawh-na ka chhànnaah tho khan ka la ding reng a nia aw …
 “Hmangaihna hian a hming pawh thlâk se; hmangaih-tu pawh eng ang paw’n awm se, hmangaihna hi he leia a awm chhúng chuan, kei chuan ka Maruati hi ka hmangaih reng ang a … ka dam chhúng leh, he lei piah lam thleng paw’n … Vàna angel-te thîk tham khawpin ka Maruati hi ka hmangaih reng ang,” ka tih kha …

‘En teh Maruat, ka rilru leh ka thinlung hian, chhan nei loa hetia min nghaisatute hi “Ka MIZO-pui’ tih hi a harsat tawh ngawt ang! Vai pawh ni lo, Sâp pawh ni lo, ka hnampui ngeite salah ka’n táng mek a nia le(h)! Kei chu, i tán ka rinawm … min rawn ngaihtuah reng reng suh aw … thiam loh nei lo nafam chuan rawn chhuah ní ka hmu leh thuai ang a, hmangaihna par zu thlum kan la dàwt dun leh thuai ka beisei tlat a ni…’

Ka ziahna ziak-loh-puanin mi daih ta lo!

“Kâwktu”-a puha ka hnampuite man ka ni a. Tunge Maruati tána ka lehkha ziah pawh hi keng ta ang a, tunge a hnên thlen ang? Ka hre lo!

Maruati tána ka lehkha ziah zawh hlim ka thleh that lai tak chuan táng véngtu a rawn lût thut! A dawngtu tùr ni lo, hnamsipai inti-pa chuan ka lehkha chu min pawh thlâksak a. A chhiar ta!
 

  Aw vîn zetin, ‘I inpuang tawh dáwn em?’
    ‘Ka hre lo ka ti tawh alãwm maw le!’
    PHUNG!
    Tunge an kah? Tunge kâp? Vai nge Sâp? An ni lo ve ve!
    Maruati chuan engtikah nge a lehkha chu a hmuh ang—

Vawkhniahzawn thla thla dêt zàna an hàl ralsak tâka chu!