Thukhawchang

Khawpui bawlhhlawh buaipui a hun

Lalthlamuana Ralte - Oct 12, 2014

Khawpui bawlhhlawh buaipui a hun

Aizawl hi India rama khawpui fai pawl tak a ni mai thei a, zing kara kawngpui phiah fai thin a nih avangin chawhma lamah thleng hi chuan kan khawpui hi a fai thawkhat viau thin reng a. Hnam dangte pawhin fai an tiin fakna thu pawh an sawi ve zauh zauh thin reng a ni. Dik tak chuan faina kawnga inzirtirna hi sorkar hmalakna mar tha ber pawl a ni hialin a rinawm a. Fai turin kan inzirtir reng a, kan infuih a, fai lawmman siam a ni kumtin bawk. Hmalakna a awm reng vang hi a ni maithei, tunhma lam ngaihtuah chuan mipui pawh kan zia tawh viau a, fai hi changkang leh changkang lo tehna angah kan ngai ve ta ni pawhin a lang. Mahse, a lehlam zawnga thlir chuan hetia khawpui faina leh thianghlimna atana hma kan lak dan hi a pawn lang riauin a lang. Entirnan, khawlaia bawlhhlawh bawm langsar taka awm thluah hian thianghlimna kawnga hmabak kan la ngah zia tilangtu a ni a, awlsam taka bawlhhlawh paihna bawm awm thluah hian khawpui a titawp zawk mah a ni. Kan khawsak a awlsam zel avangin mamawh kan ngah tial tial a, ei ral leh hman ral a tam tial tial bawk a. Chungte avang chuan a kum telin bawlhhlawh kan ngah telh telh a. Khawpui hmel lan dan a fai viau lai hian bawlhhlawh paih dan leh sawngbawl dan erawh a changkang lo tial tial em aw a tih theih thung si a ni. A tlangpuiin kawr hnaih deuha awmten kawrah bawlhhlawh an paih mai thin a, tuichhia pawh kawr remchangah kan luan hlawm a. Vawk in pawh, a ek paihna tur ngaihtuah lem loin hmun remchangah kan sa tawp a, vantlang zun in pawh kawngsir kawr (side drain) a luang tura siam kan ching hle bawk. Chungte chu kawrah a lut khawm leh vek a. Bawlhhlawh paih dan leh tui chhe luantir dana kan fimkhur loh em avang hian Aizawl khaw chhung (leh a chhehvel)-a kawr zawng zawng hi a tawp em em vek a, a rimchhia a, bawlhhlawh chi hrang hrang a inchap kawi zui hlawm a ni. Fur ruahtui kan dawng tha hlauh thin a, kan vannnei mai mai zawk. Thal laia bawlhhlawh tinreng kawra inchhek khawlte chu fur ruahtui baw hawkin kawrah a len lut a, khawpui tawp zawng zawng chu tuihawkin a len bo duak thin a ni. Mahse, kan hriat tur chu kum tluana khawpui thli kawra luang lut hi a bawlhhlawh mai a ni lo a, oil leh chemical thil chi hrang hrang a tel avangin nungchate tana hlauhawm tak a ni thei. Natna chi hrang hrang leh tlang hri leng lo thleng thinte pawh hi khawpui bawlhhlawh/tawp atanga insiam a ni maithei a, kan boruak hip te pawh hi a thianghlim lo viau thei bawk. Aizawl khaw chhung kawrte hian Tuirial emaw Tlawng emaw a fin vek hlawm a, heng lui pahniha Aizawl bawlhhlawh leh thli luang lut hian kan hriselna thui tak a nghawng let thei a ni tih hi ngaihtuah fo a tha awm e. Chuvangin, kawr tawp tak takte then fai beihpui thlak hi a hun tak zet a ni. Mi ram khawpui chhunga lui tui fim tak tak luang kan hmuh thin ang hian kan tum tak tak chuan kan khawpui kawra tui luangte pawh hi a fim ve thei ngei ang maw le, a then faina tur project siam te hi a hun viau awm e. Khawpui bawlhhlawh tawih ral thei lo (Solid waste) sawngbawl dan chungchangah hian inkaihhruaina dan mumal tak a awm tawh a. Mahse, Aizawl bawlhhlawh sawngbawl dan hi chu danin (Municipality Solid Waste Rule) a phal loh anga kalpui mek a ni thung. AMC executive councellor pakhatin a sawi dan ni khata Aizawl bawlhhlawh paih zat hi metric ton 20 vel zet a ni a, UD&PA website-ah chuan 800 quintals vel tih a ni thung. Sorkar department pakhat website-a a lan dan chuan Aizawl bawlhhlawh hi January 15,1973 atanga khawn tan a ni a. A tirah chuan heng bawlhhlawhte hi Bawngkawn khamah paih mai thin a ni a. Hemi hnu hian khawpui daifem leh khawpui pawn lam hmun hrang hrang - Bung Bangalow bul, PTC peng (Sairang road), Buichali kai, Muthi tlang, Sakawrhmuituai tlangah te paih leh a ni a. Tuna sorkarin bawlhhlawh a paih dan leh a sawngbawl dan hi chu veng hrang hrang bawlhhlawh lakkhawmte motorin Tuirial a halralna hmunah an paih tawp thin a, engtik lai pawha kang reng a nih avangin bawlhhlawh tlingkhawm tluk zetin a kang khu hi a kiang hnaia chengte (leh Aizawla chengte) hriselna atan a hlauhawm ang tih a chiang reng bawk. Kumin kum tir lam khan Mizoram Pollution Control Board (MPCB)-in bawlhhlawh hâl hi an duh loh thu leh, Aizawl khawpuia veng hrang hrang 82-a bawlhhlawh piah dan kalpui mek chu an duh loh ber a nih thu an sawi bakah SIPMIU-in bawlhhlawh sawngbawl dan thar an hman hun an nghak mek tih an sawi a nih kha. SIPMIU hi khawpui hmasawnna leh hamthatna tura ruahmanna tha tak tak nei a, puangzar thin an ni a, mahse, an hnathawh lian tham hmuh tur erawh a la vang khawp mai. Engpawhnise, Aizawl bawlhhlawh sawngbawlna atana an hmalakna tak tak hmuh thuai beisei phawt ila. Vai rama bawlhhlawh sawngbawl dan chungchang zir chianna Supreme Court-a an theh luh (Report of a Committee for Solid Waste Management in Class 1 Cities of India) ah chuan chaw nawi leh thlai lam chi, tawih ral thei ho hi chu chhungkaw tinin a dah khawlna siam mai a, chu chu lakkhawm a, lei tihthatna tura dah tawih ral thin tur a ni. Keini chuan bawlhhlawh tawih ral thei leh tawih ral thei lo kan thliar hrang lem lo a, vawkchaw atana tlak loh chu kan dah khawm tawp a ni ber a, chung chu bawlhhlawh paih motor lokal hunah kan paih tawp mai thin a. Hmun dangah chuan bawlhhlawh tawih ral thei lo chi hi thil danga hman tangkai leh turin an sawngbawl leh thin a, mihring tana hlauhawm lo tur zawngin an tiral thin. Chutiang anga kan bawlhhlawhte hi sawngbawl a nih ve theihnan sorkar pawhin hma a la ve thuai turah ngai ila. Aizawl hi khawpui fai, thianghlim leh hrisel a nih theihnan sorkar leh mipuiin tan i la zel ang u
Share now