Thingtlang pa, Aizawla kal ngai zen zen lo hi a chhung te damlo hruaiin Aizawlah a kal a. Civil Hospital atang chuan Aizawl tlak lam veng hrang hrang chu a han thir vang vang a; Tuikual veng hrang hrang, Dinthar, Vaivakawn, Kanan leh Luangmual thlengin a lang ut mai si a, ropui a ti khawp mai a, “Aizawl nge nge, ruam khat lekah pawh Chawngtui tiat lek leh a tam mang e” a ti e, an ti. Thingtlang khaw te tak te, in za nufa emaw lek nena khaikhin ralah chuan Aizawl chu a ropui em bawk a ni.

Hetiang deuh hian, zan khawthiang tak hnuaiah van lam han thlir ila, chhiar sen loha tam arsi kan hmu ang. Thlasikah phei chuan bawnghnute bua ang maiin thlasik kawng a in kham paw ruih thin.  Khing thlasik kawng, sapin milky way an tih te khi chhum puarpawleng inhlawm khawm an ni lo va, kan khawvel aia lian arsi tam tak awmkhawm an ni zawk. Kan Lei (earth) atanga an awmna a hlat em avangin awmkhawm angin kan hmu a, a tak takah chuan mel sang tam taka inhlat te an ni. Scientist te chuan van thengreng (universe) ah khian kan khawvel aia lian arsi maktaduaih tam tak, chhiar sen loh khawpa tam a awm an ti.

Van thengrenga Pathian kutchhuak tam zia leh ropui zia ngaihtuah chuan khawvel te lek lek tih ve mai tur a ni. Lal Davida’n, “I van, i kutchhuak te, thla leh arsi i ruat ho te khi ka ngaihtuah chang chuan, mihring hi enge maw a nih a, i hriat reng thin ni? Mihring fapa pawh hi enge maw a nih a, i kan thin ni?” a lo ti te kha a awm viau mai. Pathian kutchhuak ropui zia ngaihtuah chuan mihring chu sawi loh, kan chenna khawvel pawh hi a te tham em mai.

Hetih rual hian, van thengrenga Pathian thil siam ropui tak leh chhiar sen loh khawpa tam arsi te ai khian kan chenna Khawvel hi a nep bik hauh lo. Arsi leh planet dangah te khian nunna nei thil siam dang te pawh an awm ve mai thei a, chutih rualin khawvel erawh Pathianin a anpuia a siam mihring te chenna tura a siam a ni a, khawvel sik leh sa hi mihring leh nungchate tan hian a tawk em em a ni. Scientist te chuan kan awmna Lei hian tun ai hian Ni (Sun) khi hlat hret emaw hnaih hret ta se, leia nungchate leh thing leh thlai te tan hian dam khawchhuak ngaihna a awm lo ang an ti! Tin, eng (light) kal chak zawng hi second khatah kilometer nuai thum a ni a, Ni khi kan awmna lei atangin mel maktaduaih 93 a hla a ni a, Ni eng khian kan awmna lei thleng tur hian second 499 a mamawh a, second khat lek pawhin tlai emaw hma ta se, leia nungcha tam tak nunphung hi a danglam phah ang a, an mang phah hial ang an ti bawk. Chuvangin, kan awmna leh hi Pathian hian a siam special em em a ni.

Siamtu hian thil hi a rel fel khawp a, kan nunna atana kan mamawh, a loa kan awm theih loh thil te chu leilungah hian awlsam tak leh a thlawna kan hmuh theih turin min dah sak mai a. Tui tel loin kan nung thei lo a, a thawnin min pe a. Boruak tel loin kan nung thei lo a, a thawnin min pe mai a. Tu emaw tih dan takah vawksa kg khat hi cheng sawmthum man nise, antam tel khat hi cheng zali man ni zawk se, a tlawm em e tih vangin kar tluanin vawksa hmeh ta tluk tluk ila, reilo teah thisen sang leh zunthlumin kan tlu phung mai ang. Mahse, vawksa tel loin kan nung thei a, vawksa ei lo hian kan hrisel zawk mah bawk a. Hei vang tak hian a man pawh a to a, ei tling tura an than len chhung pawh rei tak a ni. Thlai erawh kan nunna a tan a tangkai a, kan hriselna atan a pawimawh bawk a, a man pawh a tlawm a, thla hnih khat chhung lekin an puitling zung zung thin. Kan mamawh bak a liam kan chhek khawl a, kan thinlungin nawmsakna a awn chinah chiah hian kan khawsak man (cost of living) hi chawp leh chilhin a lo sang mai thin. 

Tin, mihring te bakah leia nungcha zawng zawng, chung-leng sava te leh tuifinriata nungcha zawng zawng te hian an dam khawchhuahna atana an mamawh tur hi Pathian hian leilungah hian a dah vek a, anmahni enkawl tura a siam mihring te hian kan tichereuin, kan tichingpen nasa em mai pawh a. Pathianin a duan ang tak hian khawvel hi awm ta zel se, mihring te hian heti tak hian khawih chungpen lo bawk ila, he planet hi a va mawiin a va nuam dawn em! Mahse, mihring te duhamna leh hmasialna avangin khawvel pawh a chhe zo ta. Kan duham luatah ramngaw kan ti chereu a, boruak kan ti bawlhhlawh a, kan lui dung kan ti bawlhhlawh a, nungcha tam tak an mang ta. Leilung leh a chhunga thil siam dang te tan hian mihring te tluka chimawm leh tawrhhlehawm hi an awm chuang lo ang. Keimahni avangin rum leh na tuar chungin Pathian fate lo lan hun hi nghakhlek takin an thir mek a nih hi.