Amah chu zeng a ni. A kut leh kê a chêt theih lohna a rei tawh—kum 17 vêl khumah a mu tawh a ni àwm e. Kum nga kalta atang khân a kutzungtang a rawn chêt ve thei tan hlauh; chu pawh chêt thei chè chê chauh a ni. Cell phone a khawih ve thei chu a lãwm teh a nia! Chû a cell phone-ah chuan thu a ziak thin a; tûnah chuan lehkhabu a ziak a, tlángzarh a ni ta. Kan sawi mék zeng hi, a hming chu David Zonunsânga Tlau a ni.

A lehkhabu ziah, “Ka Zin Kawng Isua Nên” tih, phêk 249-a chhah chu August 9, 2022 khân, an mahni inah, tûnlaia ziaktu chawrnote vulhtu lian ber, Lalrammawia Ngênte chuan a tlângzarhsak ta a. He lehkhabu hi Gilzom Offset kut chhuak niin ` 200/- man a ni.

A thian tha kawm phâk ni zui ta a cell phone hmangin David Zonunsânga hian thu a ziak thin a. “Thu” han tihah Pathian nêna an inpâwlna “Thu Nung” chu a phone-ah a dah khâwl thin a; mi dang chhiar theih tùrin WhatsApp group hrang hrangah a theh darh thin a ni zâwk mah. Chûng thu tawi tê tê-te chu a thian thaten lehkhabua khàwr pum tûrin thu an ràwn a. Ani lah a insit hle si. Tin, sum leh pai han theh chhuah tûr a nei bawk si lo.

A harsatnate hriain a thiante chuan a mamawh leh a tûl ang ang thawhsakin a thu ziahte chu a bu-in an khàwr pumsak ta a. Pu R Lalrâwna, Gilzom Offset neitu chuan amah David-a damlo kan nân tiin lehkhabu a chhut thinna man aia man man fé-in a lo chhutsak lehzêl a. A thian thate leh a chhutsaktu Pu Ráwna chungah David-a hian lawm thu a sawi mawlh mawlh mai.

David-a hian nu leh pa a chán hma hle mai a. Hetia khum-beta a damloh hma daih hian a pa, Lalrindika chuan kum 1993 khân a lo boralsan tawh a. A nu Lalthanpuii paw’n kum 2002 khân chatuan ram a lo pansan ve tawh bawk. Tûnah hian Tuikual North-ah a nute-i’n a enkawl mék a ni.

Kum lama naupang tê a nih laiin David-a hi mi nungchang zawiawi tak nia sawi a ni thin. A’n tleirãwl chhuak a—páwl 10 a zir lai a ni—chu chu kum 2004 chho kha a ni. Sawi tâk angin hmangaih taka enkawla zilh hautu nu leh pate a neih tawh loh vàng nge ni dawn ni, khawvêl lamah a’n tlãn tan a. Mahse, chu lam kawng chu Pathianin a din chhan leh a siam chhan a ni dèr mai si lo a; a tlàn zêl a phal lo pawh a ni ang! A tlãn ve tan dáwn chauh tihah damdawia inchiu a tumna lamah a che sual palh ta hlauh mai—a inchiu sual! Damdawi in panpui niin thla khat vêl enkawl a nih hnu paw’n a kut leh ke leh a taksa bung chêt theia enkawl theih a ni si lo. Nihna thar duhawm lo tak leh thlanawm lo zet mai, “Zeng” nihna dinhmun nèn, ráwlthar tha za lai David-a chu in lam panin a hâw leh ta a ni!

Hetih laia ráwlthar luck khat ve tak, David-a nun hrehawm tùrzia hi ka dàwnpui fo a; mahse, ka chhui thui thiam lo chu thu hran ni se, ka ngam lo a ni! Rei lo tê-a tlangvál ni mai tùr, ruihhlo inchiu sual avàngin zeng ni ta thut mai kha a ni a. A hrehawmna nasat tùrzia hi chhût thiampui chi rual a ni lo ang. Mahnia hmai pawh phih thei lo, lu thak pawh inhiah thei lo, mahnia chaw leh thil dang ei-a in thei pawh ni lo leh mahnia inthiar pawh thei lo han nih tâk mai chu, mahni leh mahni inkhawngaihna pawh a nei nasa viau ta ve ang.

Ngaihzáwng te pawh a nei ve ngei a—hetia a awm thut lai pawh hian. Mahse, a bialnu hmangaihna meuh pawh chu, amah leh amah inthiam lohtírtu leh a bialnu laka inthlahrunna ti zualtu mai a chang zo ta si a! Hmangaihna chu hmangaihna vêka chhàn lêt a ngai ngei a. Mahse, hma lam nei tawh lo leh rilru lam pawh chawmawlh vek tawh hmangaihna chu tunge lãwm taka pawm duh ang, tih te pawh a ngaihtuah nasa thin. Taksa mai bâkah rilru lam thlenga tawrh theih natna a tuar nasat tùrzia chu!

Mahse, kan thatna tùra engkima min thawhsak thintu Pathian chuan David-a tawngtaina leh a duhnate chu a hai lo mai ni loin a ngaithla reng a. A tum loh leh a duh lohna lamah a lo kai mék a, training a lo pe mék a lo ni zâwk a. Tih tùr dang nei ta lo chuan lehkhabu chhiar a ngaina chho tan a. Thu leh hla lamah a tui chho ta. A hnuah phei chuan lehkhabu pangngai chhiar mai duhtâwk loin Pathian Thu Nung châkna nei chhoin Pathian a bèl ta a. Amah ngeiin, ‘Isua Krista Chhandamna ka hriat chian hnuin ka nun a danglam chho,’ a ti a. Hetih rual hian vawi leh khata danglam thut ni loin, zawi zawia danglam chho zêl a nih thu a sawi bawk.

Ziak mite hi a mi ngaihsan záwng an ni thin; mahse, ziak mi a nih ve chu a inring chhin ngai lo. Tûnah chuan, zíng a thawh veleha Pathian nêna inpàwlna an neih thin thu sawiin, ‘Zing ka thawh hlim leh hun ãwl ka neih apiangin Pathian nèna kan inpàwlna hi phone-ah ka chhu chhuak thin,’ tiin David-a chuan a sawi.

Ni tina Pathian nèna an inpàwlna, thu a ziah zawng zawng hi lehkhabu pakhata chhuah len chi ziazáng a nih loh thu, a lehkhabu buatsaihtu a thian te chuan an sawi a, ‘Tûna kan chhuah pawh hi kan thlang hran lo a; a ziah hmasak apiang kha kan dah lût zêl a, bu tam tak daih ziah sa a nei tawh,’ an ti bawk.

“Ka Zin Kawng Isua Nên”-ah hian thuziak 200 chuang zet a awm a. Thu tawi tê tê, vawi khat chhiara chhiar zawh nghal zung zung theih khung khâwm a ni a, chhiar a nuamin chhiar zawhpawh a sam hle. A copy hi an siam tam ngam rih loh avângin lehkhabu dàwr zawng zawngah pawh an zuar chhuak lo a. CVL Bass, Electric veng chung-ah leh Instagram lama lehkhabu zuar, deliver thei “lehkhabuk” lamah chah theihin an dah rih phawt.