Damlo enkawl kawngah hian a enkawltute kan pawimawh em em a, Doctor, Nurse leh health worker lam te chu a medical zawnga taka enkawltu an nih laiin damlo hun hmanpui tam ber chu a awmpuitu, a enkawltute an ni. Khumbet rei chi natna hrang hrang, zeng te, terminal disease (cancer ang te), kâng (burn) case te leh accident ruh lian tliak te hi a enkawl kawngah hriattur pawimawh tak tak a awm a, chungte chu engnge i lo ngaihtuahho dawn teh ang. Chuap lam harsatna (Pulmonary congestion): Damlo taksa chet tlem vang bawkin chuap lama tuihnang insiam hi a inkhawl duh a, chu chuan chuap a boruak luhna aircells a block a, pneumonia bakah thawk harsat an nei duh hle. An thawk luh a lo tlem hrim hrim bawk nen, chuap lam harsatna an nei duh hle a. A enkawltute pawh hritlang awmna nei chuan enkawl loh theih nise a tha hle (natna hrik an kai hma hle a ni). Chubakah chuan air circulation (boruak chevel) a awm that a ngai a, kan enkawlna room chu cross-ventilation tha thei ang bera buatsaih nise duhthusam a ni bawk. Thawk puitu an tih mai, breathing exercise lakna a hip chi te hi a tangkai viau; a to lova, hman theih chuan chuap lam harsatna lakah hian thui tak a veng thei a ni. Thisen che vel tlem vanga harsatna: Tihrawl te hi kan thisen pump tu ber an ni a, an chet tlem chuan an chhunga thisen zam Vein lianhovah hian thisen a tling khawl duh a, chu chuan thisen zam tichhahin (thrombosis) thi khar insiam (embolism) a siam thei bawk a ni. Chutiang a insiam chuan thisen zam peng a dang chat a, tisa thi lai gangrene te thlengin a thlen thei a ni. Chuap lama a luh phei chuan (pulmonary embolism an ti) thihpui tham a hlauhawm a ni. Damlo khumbet, mahnia che thei lo ang chi reng rengah chuan BedSore hi a awm duh hle a. Taksa chet a tlem hian thisen che vel (circulation) a lo tlem a, khum dep lam apiangah thisen leh taksa tuihnang a tling khawl a, ruh pawnlang awmna laiah a ni lehzual a. Chu chu pressure a lo insiam a, vun a pilh a, reilote ah pân a rawn insiam ta mai thin a ni. He pân (bedsore) hi a insiam laklawh tawh chuan a dam mawh em em a, chu mai nilovin a zau tial tial duh bawk. Zunthlum nei nasaah phei chuan a awm duh bakah a darh zau duh hle bawk a. Chuvangin, bedsore a awm loh nan hian doctor leh nurse te hnenah hnungzang enkawl dan (back-care) te zawh nise, taksa awm dan thlakthleng ngun a pawimawh a, thenkhat chuan mattress awm dan siam danglam theih (alternating pressure mattress) te pawh an hmang fo bawk.   Tihrawl hman tlem vanga chak lo leh sâwng (muscle weakness.disuse atrophy): Taksa che vel a lo tlem chuan tihrawl hi a chak lo hma em em a, a rei phei chuan a sawng a, ngaiawh leh tur chuan beih fet a ngai thin. Zeng natna nei ah te a awm duh zual hle. Hemi rual hian ruh mawih (bone demineralization/osteoporosis) a awm tel duh hle a. Chutiang ruh chu a tliak hma bawk a. Rei tak khum bet hnua an han din leh te hian taksa rihna kha an ruhin a zo tawk lova, a tliak duh viau bawk a ni. Ek khal leh ril chet fel lo: Taksa a lo chet tlem chuan ril lam a lo effect a, ei leh in digest pawh a har nge nge thin. Ek khal a awm deuh ngei ngei a, zun pawh a buai a, tam tak chuan an zun pawh an control thei lo fo reng a ni. Zun siakna catheter vuah ngai an awm fova, hetiang ah chuan kar hnih dan tala thlak thin a tul a ni. Ei leh in lam hi uluk a ngai hle a, dietician thiam tak tak an awm tawh bawk a, rawn thin nise a tha hle. Kan sawi takte hi a enkawltu lamin kan ngaih pawimawh theih chuan thui tak a inven theih a, physiotherapy tih dan te, massage pek dan te, breathing exercise tih pui dan te, an damdawi a hunbi thlapa pek te leh ei leh in lam thlenga a mithiamte rawn tam a pawimawh hle. Hetiang tur hian doctor emaw nurse or health worker ni kher lo pawhin thui tak a inzir theih a ni. Sawi tur tam tak a awm anga, duh tawk phawt ila. A tawpah han belh leh hram ka duh chu damlo enkawltu caregiver te hian stress nasa tak kan nei tih kan inhriat a tha a; chuvangin, intihthawven nachang kan hriat a pawimawh hle. Enkawltute pawh inchhawk hun mumal taka insiam a pawimawh hle a ni.