Zawhna: Ka pu, hmeichhia kum 16 mi ka ni a, tun hnaiah hritlang damdawi, Cetirizine leh Solvin Cold ka ei a, nizan online class ka kal laiin ka taksa hi thunun thei lovin a rawn khur chiam mai a, hei hi engvanga lo awm nge a chhan min hrilh thei em? Min hrilh theih chuan ka lawm hle ang. Thil dang insawiselna ka nei hran lo e.

Chhanna: I insawiselna hi hritlang mai a nih hmel a, SolvinCold hi chumi control nan chuan a tawk viau a; mahse, Cetirizine i ei belh leh hian he insawiselna hi a rawn siam a nih duh hmel viau mai.

Cetirizine hlang hi allergy (thil huat) atan kan hmang ber a; tin, antihistamine damdawi a nih vangin hnap tui insiam tur te leh hnar leh hrawk vela vung emaw, hritlang vanga tisa vung tur te a control tel ve a, chu mai piah lamah chuan mut chhuak a siam fo bawk.

SolvinCold-ah hiandam dawi chi thum – Chlorpheniramine, Phenylephrine leh Paracetamol inchawhpawlh a awm a. Chlorpheniramine hi allergy control zawnga thawk chi a ni a, phenylephrine hi hnar vungtiziaawm tura thawk chi a ni thung (nasal decongestant).

Taksa khur chiam i rawn sawi hi phenylephrine side effect a nih duh hmel viau mai a. Damdawi chi li lai inchawhpawlh i ei vang hian he side effect hi a rawn awm a ni thei ang. Insawiselna dang inei lo tih i sawi a. Online class kal regular i nih chuan taksa chak lo i nei tel hrim hrimte pawh a ni thei. I Hb hniam vangte pawh a ni thei a, a chhan tak hre tur chuan thisen test te pawh ti thei la a tha viau mai. Engpawh nise, kan sawi tak angin damdawi hi ei pawlh loh a tha viau mai a, hritlang damdawi tam zawk hi combination chi 2/3 a ni deuh zel a, chutah chuan antihistamine damdawi a tel deuh vek bawk ang. Chumi avang chuan Cetirizine lam chi ei leh kher hi a tul lo va, allergy eng emaw tak i neite a nih loh chuan ei pawlh loh kha a him. A hlauhawm lo turah ngai phawt ang.

Damdawi kan ei hian hmelhriatte sawi hmuh ei ve ngawt hi a him lo viau mai. Chhawk thuai/rang chi te hi damdawi tha ah kan lo ngai mai thin a, taksa chak loteah chuan heng damdawi chawhpawlh hi a pawi thei a, side effect-te pawh a lang hma duh fo bawk. Chuvangin, doctor-te rawn hmasa zel thei ila a him ber a ni.