Kamchhuak

K.Lalhruaia thihna leh a behbawm

K. Lalrinchhana - Sep 26, 2021

thla khat chuang zet population a\anga teha ni tin hri kai hmuh chhuah tam ber kan ni ta zel mai te, population a\anga teha hri vei mek (active case) nei tam ber kan ni te leh, recovery rate hniam ber kan nih avang te hian kan hri do dan kawngah hian ngaihtuahna thar kan hman a, ko kan thlak hi a hun ta viau mai

Kar kalta Thawhtanni zan dar 7:20 khan kan thianpa, K Lalhruaia (45), Government Aizawl College-a Assistant Professor hna thawk chuan Covid-19 vangin ZMC ah min boral san a, a pawi tak zet a ni.

Pa Hruaia hi harsatna tam tak paltlanga lehkha zir chhuak a ni a. Pa inngaitlawm, pa tumruh leh pa sehhel tak a ni a. Eng harsatna pawh tawk se huaisen takin a hmachhawn a, a su tlang leh nge nge thin. Pawl 10 a nihin a pain a boralsan a, a naute enkawl chungin lehkha a zir tauh tuah a, morning college-ah a kal a, class bân veleh chaw pawh ei tawh chuang loin inhlawh turin a chhuak nghal a, atta kan ro a pai mai thin. A naute enkawl chung leh mahni inchawm chawp tak meuha lehkha zir a nih avangin a zir kawng hi a bumboh hle a ni. College a kal lai hian mi ban khur laiin a inhlawh nasa hle a, lei pawh a lai hnem thawkhat a ni ang, amah ngeiin, “College ka kal laia ka lei laih zawng zawng hi football field tiat a ni tawh ang,” a ti hial a ni. 

BA a pass hnuin Shillong-ah MA zir turin a liam thla ve rawih a, hostel seat a chang lo a, hostel corridor chu silpaulin-in a ping sauh sauh a, a invawm lut ve tawp mai a ni. Corroidor-ah kum khat dawn a awm hnuin hostel seat a lo ruak ta a, room pangngaiah a insuan lut ve leh ta a ni. MA a zir kar lakah chawlh hmanga a hawn ve tum pawhin ban khur lai bawkin a inhlawh leh nghal mai thin. MA a zir lai hian NET a through a, ATS, Jowai-ah zirtirtu hna a thawk lawp lawp a, chumi hnuah Government Aizawl College-ah contract lecturer-in a lut a, kum 2015 khan Contract Regularization Scheme hmangin dah ngheh (regularize) a ni a, in leh lote dinin lei rem a rap ve dawn tan tihah a boral leh ta mai si a, a lainat awm tak zet a ni. Harsa taka a din a in leh loah pawh a ruang chawlhpui theih a ni ta lo a, a nupui fanaute an lainatawm tak zet a ni.

Pa Hruaia hi a boral hma kar tir lam khan a khua sik a, hritlang khawsik satliahah ngaiin nachhawkna a ei a, dam ve leh mai turah a inngai a. A khawsik a reh tak mai loah chuan in lamah RAgT hmangin a in test a, a lo positive ta ngei a. Amaherawhchu, sawrkar hriatpuina a ngaih avangin Greenwood Hospital-ah RAgT hmang bawkin an chhungkuain an in-test leh a, mi dang zawng zawng an positive a, ani erawh a negative leh tlat lawi si. A tukah Greenwood Hospital-ah bawk RAgT hmang thoin a in test nawn a, a la negative ta zel mai. 

In lamah ni thum emaw vel an inenkawl leh hnuin a khawsik a reh thei chuang si lo a, Trinity Hospital-ah admit a ni a, RAgT hmang bawka endik leh a ni a, a la negative ta cheu mai. Hetih lai hian a BP a hniam a, a thawkte a hah tak avangin RT-PCR hmangin test a ni a, Covid-19 positive a ni tih nemngheh a ni ta a. Enkawlna tha zawk beiseiin ZMC lamah phurh phei a ni a, ICU-ah dah luh nghal niin ventilator hmanga thawktir a ni a. Amaherawhchu, a natnain a lo chiah rei deuh tawh avangin ventilator nena tangkawp chung pawhin a taksa mamawh tawk oxygen a hip lut zo ta meuh lo a, Thawhtanni zan dar 7:20-ah khawvel a lo chhuahsan ta a ni. 

Hmeichhe thu dawnin, a tirah khan Pa Hruaia kha RT-PCR hmangin test ni se, Covid-19 positive a ni tih kha a tir teah hriat chhuah nise, thihna meuh chu a chungah a thleng kher ang em? RAgT hi kan hmang nasa a, rinrawl berah kan neih a, hetih lai hian RAgT test result hi a rintlak lutuk lo nia sawi a awm bawk a. Mi thenkhat chuan RAgT hian 50% laiin negative result a pe dik lo niin an sawi a, chuti a nih chuan RAgT test a negative, a ruka lo positive reng si hi an awm teuh thei dawn tihna a ni a, hei vang hian he hri hi nasa takin a darh chho ta a ni mai lo maw? Prof. JV Nunchunga’n America rama RAgT test result a rintlak loh dan, Amarican Journal pakhatin a tarlan dan a sawi dan chuan, RT-PCR test-a positive an ni ngei a ni tih nemngheh tawh sample 100 chu RAgT hmanga ennawn leh a ni a, RAgT chuan Covid-19 vei ngei mi 100 zinga 48-te chu vei lo (negative) angin a chhuah hem mai a nih chu!

Duhthusamah chuan RAgT-a negative result-te hi RT-PCR-a endik nawn leh zel ni se, RT-PCR-in negative a tihte chauh chhuah zalen nise, tun aiin he hripui leng mek hi a darh nasa lo deuh zawk ngei ang. Amaherawhchu, RAgT-a negative sample-te RT-PCR hmanga endik leh zat zat tur chuan RT-PCR khawl pakhat chauh kan nei bawk si a, khawl pakhat chauh chuan tih sen rual a ni lo ang.

Kan hri do kawngah hian frontline worker-te an hahin an rim tlauh tlauh hle mai. Hetih rual hian thla khat chuang zet population atanga teha ni tin  hri kai hmuh chhuah tam ber kan ni ta zel mai te, population atanga teha hri vei mek (active case) nei tam ber kan ni te leh, recovery rate hniam ber kan nih avang te hian kan hri do dan kawngah hian ngaihtuahna thar kan hman a, ko kan thlak hi a hun ta viau mai. RAgT rintawk lohna leh duhkhawp lohna thawm ring tak hi thuneitute pawhin beng khawn se, test khawl tha leh rintlak zawk mamawhna a sang ta hle mai.

Share now