Kan thupui hi 'khal' kan ti viau mai thei. Sawi a tul si a ni. Mizoram ang tluka kohhran buaipui leh atchilh hi ram dang awm ve tak maw le? Kohhran hrang hrangten an kohhran an buaipui nasat ziate, an kohhran tana tha leh zung an sen nasatziate hi a namèn lo. Kohhran Denomination hrang hrang chhungril nun hahthlak ziate hi nam nul theih pawh a ni lo! Denomination hrang hrangte a ruk leh ruk lova an indona leh an inbeihnate pawh hriat tur a awm reng bawk. Kohhran dik hi eng nge ni? Pathian thu zir mite chuan Kohhran sawi dan chi hrang hrang min zirtir a.

Thuthlung Hlui leh Thuthlung Thar a Kohhran sawi dan min hrilh tel bawk. An sawifiah dan chuan Thuthlung Hlui-ah chuan Kohhran chu 'Koh' tihna emaw 'ruat' tihna emaw hmun ruat saa intâwk khawmte tihna emaw a ni a. Thuthlung Tharah chuan Kohhran chu 'Lalpa In' Kristian te Pathian biak hmun a entir a. Pathian ringtute hmun pakhata insuih khawm sawi nana hman a ni bawk. A khaikhawmna atan chuan,' Kohhran chu Pathian ringtute a huhova awm tura awmze nei taka insuihkhawm hi,' a ni a. Pentikost niah khan mumal takin a lo piang ta a ni. Kohhran din chhan chu, 'Pathian chatuan thil tum tihpuitlin nan te, Ringtute intih sawt tawn nan te, Pathian rawngbawlna hmun atan leh Chanchin Tha tihdarhna hmanrua atan din,' a ni a. A huhova Pathian biakna turin Kohhran din a ni thin. Kohhran chu Lal Isua thisen a din a ni a, chu Kohhranah chuan Lal Isuan Lalna a chang tur a ni. Chuiang Kohhranah chuan Pathian ram a thleng tur a ni a, Pathian duhzawng a awm leh Chanchin Tha puan darh chu a hna pui ber a ni. 

Kan chenna khawvel a lo danglam chho zel a  hmasawnna chi hrang hrang a thleng a 'danglamna' (change) a awm thar zel a. Chu chuan hmuh theih Kohhran hrang hrang a hring chhuak a. Kohhran thil tum leh Kohhran ze tha tak chu Kohhran tam takin an hloh mek em ni? tih turin hmuh theihin thil a thleng mek a ni. 

Kohhran ropui tak, Pathian mite inngahna chu an hruaituten anmahni hma an sial thin avangin a nih tur ang a ni zo ta thin lova. Kohhran hruaitute inkara inlung­rual lohna leh inhruipawhna avangin kohhran tam tak chu a keh chhe thin a ni. Kohhran member- te inlungrual lohna avanga kohhran hmel hemna leh Kohhran hruaitute inkara 'khi' awm chuan kohhran a tiphel thin a ni. Tuna kan sawi mek hi Kohhran mal chhung ril nuna harsatna awm thin a ni a. Hruai­tute inpumkhat lohna hi a hlauhawm ber chu a ni. Hetianga Kohhran hruaitute inkara har-satna awm thin hi a bul ber chu, lansarh duh vangte, nihna chanvo inchuh vangte a ni ber. Kohhran chhung ril indona chuan Pathian thil tum a thelh der a, 'ser' reh thei lo a siam thin a ni. 

Mizorama Mizote hian Kohhran kan buaipui hle. Kohhran a inhmang tam apiang fel leh rualpawl tura ngaihna a thleng mek a. Dik pawh a dik. Pathian telna Kohhran a inhman tluka tha leh hlu a awm lo. Mahse kohhran phuah chawp lutuk a inhman erawh a tha ber lo mai thei a ni. Mizoramah hian kohhran kan buaipui pherh erh avang erawh chuan tualto kohhran fahrah tê tê a piang chho mek zel a. Pathian thu hrilhfiah dan thar a lo chhuak zel a. Heti fakauva kohhran din kan uar avang hian Mizoramah kohhran chi hrang hrang 60 chuang fe a awm phah tawh a ni. Kan ram population nena chhut hian ngaihthat lohna tham a ni. Missionary tena an phun kohhran ziding bakah thlarau hriattirna ti a, kohhran phuahchawp din a tam ta hle mai.

Mizoramah hian 87% vel Kristian kan ni a, heng zingah hian Kohhran (Denomination) kan tam hle. Presbyterian Kohhran te, Baptist Kohhran te hi a lian zual te an ni a.Kohhran tê tak tê mimal din chhungkaw kohhran ni âwm tak zawmpui nei lo an awm mek bawk. Pathianin hriatpui tak maw? Heng kohhran te thil tih tum chu Pathian ram din a ni tlat lawi si!? Mahse, heng kohhran te hian Pathian ram an din tak meuh em? Lal Isua lalna leh chenna kohhran an din tak zet em? Mahni Kohhran Denomination âtchilh a, kohhran ruih chilh kan ni rêng em? tih hi zawhna lian tak a ni mêk. Sum tuak âtchilh kohhran, member pun âtchilh, Pathian thu aia mahni kohhran thu ngai pawi­mawh zawk kan ni em? tih hi zawhna pawimawh tak a ni bawk! 

Kohhran hma lakna kawng hrang hrang han thlir hian Pathian Thlarau Thianghlim zalenna a awm lovang tih a hlauhawm hle. Pathian ram leh Chanchin Tha aia pawl ram tih zauh kan buaipui ang tih a hlauhawm hle. Mission Field -te han thlir hian, thlarau bo vei aiin thlarau bo hruai chhuah mekte mahni pawla seng luh buaipui ta zawk kan ni chho mek zel em? Kumin chhungin mi bote Lal Isua ke bulah eng zat nge kan hruai tih ai chuan Kohhran member engzatin nge kan pun? tih chu kan vei len ber a ni ang tih a va hlauhawm em? Kohhran Denomination ringawt buaipui a, atchilhtu, a ruih a ruihpuitu kan ni mai palh ang e.