Ka article chhuak hnuhnung berah khan Kohhran (denomination) tam lutuk kan buaipui nasatzia ka ziak nial nual tawh a. Chhiar pawh a hlawh viau tih ka hria. Hetiang thu ka sawi chhan hi Pathian thu tak buaipui si lo hian Kohhran ringawt kan buaipui ang a, kan atchilh lutuk ang a; Pathian ram a zim phah ang tih ka hlauh vang a ni ber. Ringtute hlauh ber tur chu Pathian ram hloh hi a ni a. Pathian ram a thlen lohna hmun apiangah hmangaihna a dai zo thin a ni. Hmangaihna a awm tawh loh chuan remna te, inlungrualna te, induhsakna te hi a awm tawh thin lova. Huatna leh khâkna ten ro an rel tawh thin a ni. 

Kohhran phuahchawp ngial ngan tak nia ngaih theih Kohhran tê tak tê tê, tum mumal pawh nei lo, Pathian ram aia mahni Kohhran ram ngai pawimawh zawk hi sawi tur an awm a ni. Kohhran chi hrang a tam avangin ram mipui inpumkhatna a tla chhia a, ram mipui lungrualna leh inremna a awm thei thin lo a ni. Chutiang ramah chuan hmasawnna leh changkannain nasa takin a tuar  phah thin a ni. Ram theihna leh chakna pawh a nih tur ang a ni thei lo a ni. Chung chu Tualto Kohhran thalo hrin chhuah a ni a, chhiatna zakhua a thlen thin a ni. Pathian chatuan thil tum pawh hlen chhuah theih a ni ngai hek lo ang. Chu'ng kohhran phuah chawp ngial ngan tak chu mimal intih-lalna Kohhran a ni thin. Mi pakhatin Lalna leh thuneihna zawng zawng a pum hmawm thin a. Chu Kohhran member-te thawhlawm tling khawm tam zawk chu an Kohhran dintu kutah hlan a ni bawk thin âwm e. 

Member- te thil tum ber chu an Kohhran hotupa ber tihlâwm a ni. An hotupa tihlawm chu an hnapui ber a ni a, an hlauh tlawn fo thin bawk a ni âwm e. A hming mai maiin Pathian an be tâwk emaw tih tur a ni. Khua leh tui dik tak, mihring tung chhova kalte tan chuan heng pawl phuah chawp lutuk Kohhran  zinga thut ve ngawt chu a rem teuh lovang. An zing ata inthiarfihlim thiam apiang an him ngei ang. Pathian Kohhran dik tak din hi a har lova, chuta tel pawh chu a harsa hek lo. Mahse, Kohhran phuah chawp lutuk tak mai pop thlarau chhia va hian nghet takin zung a kai a, kua a hreuh thin si a nih hi! Ringtute min titlu setana hmanrua hi hnawl ngam turin chakna i nei e. 

Kohhran Programme hi a tam hle mai. Programme hi kohhran innghahna a ni. Programme chu a tam tur a ni a, a tam lutuk tur erawh a ni lo. Chhungkaw Programme aia kohhran programme len zawk hi tha kan ti em? Chhungkua aia thil dang pawimawh zawk neihna hmun hi a him em? Kohhran prog­ramme hi a tam ta lutuk a, member te kan buai phah lutuk ta, mahni in leh lo pawh kan ngaihsak hman ta meuh lo. Kohhranah kan inhmang tam lutuk a, tu leh fate, chhungte pawh kan inngaihsak hman ta meuh lo. Kan Kohhran programme leh activity tam kan chhungkua kan felin kan thatphah em? Kan kohhran programme avang hian Pathian ram a zau em? Thlarau faten Lal Isua an neih phah em? Ngaihtuahna sen a hun ta kan ti em? Sawi ho a ngai a, thlirho a tul a nih hi. Kan society tiphuisui zawnga programme siam tur pawh kan hawi a pawimawh. Kohhran programme hian kan Kristian nun a kaihruai nasa a; kawng dik lamah min hruai tih hi agenda pawimawh tak a ni. 

Mizoram hi Kristian ram kan inti a, mahse 87% awrh chauh Kristian kan ni. Kohhran bel leh atchilh tlattute hi kan tha hnem hle bawk. Kohhran programme hi siam kan awlsam hle a, tihpuitlin ngei pawh kan duh thin. Thil dang zawng aiin Pathian nung Kohhran programme a nih avangin kan dah pawimawh. Thla khat chhunga kan hun ruatte han thlir hian kohhrana hruaitu tan zan awl a vang hle. 

Heng Kohhran Hunpui Pathian­ni Zing, Chawhnu Inkhawm/Sunday School leh Pathianni Zan, Nilai Zan te leh Inrinni Zan te hi Pathian Biak inkhawm nghet tak a ni a. Kohhran a chanvo pawimawh tak tak nei leh mawhphurna lian tak neite chu heng, Nilai zan, Inrinni zan, Pathianni zing, chhun, zan hun­ahte hian inkhawm kim tura ngaih an ni. Thla khat chhungin Pathian Biak Inkhawm mumal tak vawi 20 zet a awm bakah Kohhran hnuaia Pawl hrang hrang Fellowship /Inkhawm vawi eng emaw zat a awm bawk. Heng Inkhawm leh Inpawlhona bâkah hian Meet/Assembly/Conference a awm bawk. 

Committee meeting thla tin neih a ni thin a. Heng hian hun a heh leh zual a ni. Kohhran hian hun a heh em em a, kan ngai pawimawh hle bawk. Heti fakauva Kohhran programme kan hlut hi thil lawmawm tak a ni. Hetih rual hian kan programme siamte hi phurrit a tling ta em? Kohhran programme kan ngah ta lutuk ta kan ti em? Kan programme te hi phurrit a tling ta em? tih ngaihtuah a tul ta a ni lo'm ni? Kohhranhote hian kan Kristian in chhung khur kalsanin pawn lamah rawng kan bawl nasa ta lutuk lo maw! In chhung khur boruak tha lo tak nei reng chunga Kohhran programme phurpui hluai Kristian kan va tam ta em? Programme atchilh kohhran nih te, sum tuak Kohhran Pawl nih te hi thil awl ai a ni hauh lo. Thlarau bo man lo, mi bote Krista hnena hruai lo kohhran nih pawh thil awl ai a ni lo. Pathian telna programme Pathian chatuan thil tum tipuitling tu kohhran pawl nih hi tum chuan a theih a, a harsa hek lo. Kohhran Programme  chu a tam emaw, a tlem emaw, Pathian ropuina leh A thlarau telna a nih phawt chuan a thain a hlu êm êm a ni.