Vaiho kutpui pawimawh ‘diwali’ a hnai a, TV leh internet lamah sumdawngte infak mawina hmuh tur a tam leh ta khawp mai, kum tin an tih danin phai lamah chuan thil man an pawh a titlawm leh viau tawh a ni. India rama sumdawng liante hian an bungraw zawrh tihtlawm thin lai an nei zeuh zeuh a. A tlangpuiin tihpui lian tham - Kutpui, Krismas, Diwali, World Cup, etc., lai te hian thil man a tlawm thin a. Kutpui lawmna bakah mitinin hlim taka hun an hman theih nan leh mipui rilru inhawn lai a nih avangin sumdawnna lamah hlawkpui an lo tum thin vang niin a lang. Kum rei vak lo kal ta atang khan diwali leh puja lai hian man tlawm zawka thil an zawrh thin avangin internet hmanga sumdawnna (online retail market) lam an hlawk hle thin a. Nikum October thla chhung khan internet hmanga sumdawng (e-tailer) lian zual Flipkart, Snapdeal leh Amazon te chuan nitin an Cheng vbc 600 man vel an bungrua an hralh thin. Kumin phei hi chuan an tang nasa leh zual a, an bungraw hralh leh an pawisa lak luh pawh kum hmasa lam a khum viau dawnin a lang. Tunhnai maia a lan dan chuan Amazon hi hmahruaitu a ni mek a, Flipkart leh Snapdeal leh Shopclues-ten an um mek a ni. Amazon thil zawrh zat hi maktaduai 18 atangin maktaduai 30 ah kai a, Snapdeal hian thil/bungrua maktaduai 15 vel an zuar mek bawk. Hetihlai hian online market lian zel hian dawrkaite sumdawnna lam pawh a nghawng nasa hle a. Khawpui liana sumdawnna hmunpuiahte pawh beisei aiin thil hralh a har a, kum dang ngaihtuahin bazara thil lei an tam lo deuh niin zir chianna thenkhatah chuan an sawi. Hindu kutpui vanga e-tailer hoten an thil zawrh man an tihhniam lai hian thilsiam chhuaktu company-te, dawrkai lianhote pawhin man tlawm zawka lei theih turin offer an nei thin a, thlawhna chuan mante pawh an tihniam thin bawk. Sahmulphah thla kan thleng leh ta a, thlasik rim a nam tan leh ta a, Krismas hla sak ri pawh hriat tur a awm tan ta bawk. Krismas laia thawmhnaw leh thil thar neih ngei tum thin kan nih avangin nu leh pa tam tak chuan tu leh fate thil leina tur an lungkham tan mekin a rinawm. Mizote hian sumdawnna lama kan entawn ber vaiho ze tha lo hi kan la nasa hle a - an sum duh lutuk te, bazaar-a an au bengchheng chul thin te, an chalak/phakar zia te, thil leitu bum an chin te, bungrua/thil a nihna aia nasa a fak chiam te, leh a dang te hi vaiho zia a ni a, kan pi pu atanga kan hnam ze dik tak a ni reng reng lo a nia. Hunpui inher lai kan hmachhawn mek lai hian vaiho mai ni lo, khawthlang ramte pawhin an uar em em sumdawngten hunpui laia man tlawm zawka thil an zawrh thin ang hi Mizoram (a bikin Aizawla) sumdawngte hian ti ve se a duhawm ngawt ang. Mizote rilruah chuan Krismas leh Kumthar tluka hun ropui a awm lo a, hetih hun lai na na na hi chuan sum leh pai pawh kan hmang nasa kum tin thin a nih hi. Rilru zau tak sengin, Kristian rilru tak pu chungin ngaihtuah vang vang ta ila, sumdawngte hian an rilru put hmang hi thlak ta daih se Krismas bazarpui lai hian thawmhnaw leh thil dang man hi titlawm thin se la chuan a rethei apiang an lawm ang a, mi tin tan hlimna a thlen ngei ang. Rei lote chhunga sum hai luh teuh tum hi sumdawng tan chuan a chakawm viau ang a; mahse, uchuak taka hlep vak mai te, thil a man leh a hlutna aia sang daih a hralh tum talh mai te hi chu mi puitling zia chu a ni chiah lo deuh, sumdawnna tlo duh tan phei chuan hlawk thut hi a him lem lo, dikna leh rinawmna nena sumdawn hi a tlo ber. Kan sumdawngten lo haw lo se, tuna an tih dan phungah hi chuan Krismas bazar hun lai hian thawmhnaw lam man hi an tisang vak a (phai lam rate hre tan phei chuan chek tlawk tlawkna tham a ni thin), Khawpui pawn lam mite haw rem hnu Mas urlawk ni velah a man a tlahniam leh a, kumthar lamah phei chuan a tlahniam rawih rawih thin a ni. Sorkar lam hian sumdawngte vilna dan lek tur an nei lo a ni mai thei a, a lo nei reng a, an hmang ngai lo pawh a ni thei tho; mahse, mi mamawhna denchhena hlep uchuak taka thil zawrh te hi chu khuahkhirh theih tur chu niin a lang. Chuvangin, Krismas bazaar a thil man sang uchuak thin lutuk hi thuneitu lam hian vei ve deuh se, eng emaw chen chu tih theih an nei ngei ang. Kan ramah hian inrelbawlna tha (good governance) a awm loh vangin kawng hrang hrangin kan tuar a, mipuiin kan chanvo kan hriat loh avangin kan tawrh dan pawh hi kan hre vek lo zawk a. Inrelbawlna tha a awm chuan sumdawnnaah pawh dikna leh rinawmna a awm anga, hlep tur tawk aia sang hlep avanga mipui tawrhna pawh a bo ang. Engpawhnise, Hunpui inher lai, kumtawp bazarpui kan hmachhawn mek lai hian mitinin hlim taka Masi kan hman a, naupangten thil thar an neih theuh a, hlim taka Kumthar kan lawm theihna turin sumdawngte pawhin ngaihtuahna thar seng ta se la. Kumin Krismas chu kum dang zawng aiin bazaar-ah thawmhnaw leh thil dang man han tlawm zawk ta se la, Kristian kan nih ang leh khawvel Chhandamtu lo pian cham lawmna tur a nih ang ngeiin ‘Christmas Offer’...’Christmas Sale/Discount’ uar ta ila chuan kum dang zawng aia kan hlim ber kum a ni thei hial ang. Ngaihtuah zui ang aw...