Krismas rim a nam tan chék chék a, Tlángsàm pár leh khàm panga Bawngpupárten lal lai chen tumin tan an khawh ve mék bawk. He tih hun lai, zíng ni chhuak leh tlai ni tla tùrten tih tak zeta lung an tih àwi veng veng hun lai hian kum ruk liamtaa ka Krismas present dawn kha ka hre chhuak leh thìn.

Ka nunna hnár pakhat, ka pangkhing ang hiala ka ngaih thin, ka hmangaih ber khä nula khân ka lung a ti awi hliah hliah thìn a nih kha. A kianga ka awm tawh chuan, thlasik thlifím te pawh hi thiang bîk riau hian ka hria a; zàn thla ëng leh tlai ni tla tùrte pawh hian lung an run zual bîk ni te’n ka hre thìn. Amah chu ka ni tin nun a ni a, ka diary a ni. Amah hmu lo, si lo leh tawk loa ni lèn kha hremhmun tènau a ni hawt a; ka kham theih loh chaw a ni thìn—ni e, vawiin thleng paw’n a la ni ta reng a!

Min kalsan ní kha ka la hre reng mai—a tahrik ní thleng paw’n—December ni 16, Inrinni tûk a nih kha. Khami tûka ka mut tuizia pawh kha ka la inhria. Zíng ni chhuah hmain ka phone-in min kai harh a, a ri chàwl lo. Min rawn biak tumtu chu ka’n en a—amah a ni! ‘A va’n hun lo tak!’ ti rilru chungin ka hmet tàwp a. A rawn ri leh zêl si. Peih lo zetin ka la a, ‘Eng nge Ame! Ka la mu!’ tih pahin ka hmet tàwp lehnghâl.

Ani nèn hi chuan hming thain kan inko ngai lo. “Amelia” ti loin, “Ame” tiin ka ko a; ani paw’n “Daniel” min ti bîk lo—“Da-a” min ti ve bawk.

Ka chhíng tan leh diar diar a; Amelia chu a rawn ri leh. Ka la a. ‘Da-a, tho rawh! In gate bulah ka ding reng a nia,’ a rawn ti ta heu mai! Tho lo takin ka tho a. Ka inphih thuak a. Gate chu ka va hawng a.

    ‘… 'Nge, i la insiam loh?’
    ‘I mäwl 'mi? I ti tak tak em ni?’ ka ti lêt háw a.
    ‘Ka sawi vek tawh kha. Va inhà la, kal ang,’ mi ti leh ringawt!
    ‘Khawiah chuan?’
    ‘Nimin tlaiah ka sawi vek tawh kha maw le!’ a ti leh a … 
                ~o~

A hma ní chu Amelia te pisa kai tàwp ní a ni. Ka thianpa Maruata dàwr, The Book Café-ah ka lo nghâk a. A lo thlen hmain ka thianpa nèn a chanchin kan lo sawi chiam mai. Ka thianpa chuan Amelia chu, “Duh leh huam huam” min tihzia te sawiin chin tâwk nei tùrin min ti a. ‘Keini paw’n, mi dang paw’n ngaihzáwng kan nei ve tho … heti êm êmin tù ma’n hmeichhia kan ngaizáwng ngai lo—a ten têp tawh ang che!’ ti te’n min zilh hial. ‘A then hunah che chuan aw … i tuar leh lutuk ang a, i khaw loh phah vek ang tih a nia ka hlauh ni!’ te pawh min ti!

Ka thianpa min zilhna chu ka haw hauh lo; ka nihna dik tak a sawi miau a. Mahse, a thu sawi ka pawm theih loh leh chhàn lêt ka châk êm êm chu, ‘A then hunah che chuan …’ a tih tak mai hi a ni. Amelia nèn hian inthen thei kan ni lo! Kan thei lo ve ve ang! Ka chhàn hma-in Amelia chu a lo lût hman ka ti!

Maruata chu a tho hluai a, Amelia chu thutna a kian a. Hmel-tha-lalnu chuan tawngkam mawihnaia la thu ve rih tùra a tih hnu chuan inthlahrung àwm deuhin a thu ta tho a. Ka khawvêl chu a danglam leh ta! A hma lawka ka hmaa thu ka thianpa leh tün maia rawn thu thar chu, kàngthai leh rose pár ang vêla inang lo ni hian ka hre ta hial a!

Kan hma dawhkàna Cappuccino khu vat vat rawn dahtu kal kian hnu chuan Amelia chuan ka mitah tak min en kal mai a. A ngawi reng si; ‘Eng nge!?’ ka ti ringawt!

Thil serious tak sawi duh a nei leh tawh a ni tih hre thiam tùrin amah hi ka hre chiang tâwk tawh. ‘Kumin Krismas chu kan hmang dùn thei dáwn lo ka tih tawh kha aw … naktûka ka present pêk tùr che nèn hian in hman dun a ngai dáwn. Hrilh che ka hreh aia nasain hman dun theih loh hi ka hreh zâwk! Mahse …’ a ti chuai raih a. A bag atang chuan present báwm a rawn la chhuak a.

‘Eng a!? Eng maw i sawi a!? Amelia!’

‘Naktûkah ka pe ang che…’ tiin a bag-ah present báwm chu a khung leh a. ‘Ka sawi nawn leh ang. La na suh aw. Nuam tùr chuan hrehawm hmasak a ngai thìn,’ a ti leh a. A coffee no chhém heuh heuh pah chuan Krismas leh kum thar pisa chawlh chhúng zawng hmun danga min awm bosan tùr thu chu a sawi nawn leh a.

Ka thin a rim leh hle. A thil tum chu thil tha pawh a ni; mahse, ka pawmpui thei tlat lo. Lungàwi loh lantíra chhuahsan chu ka duh tak zet. Mahse, ka nupui hual Amelia thu sawi khàrna chuan min hneh tlat nia!—‘He khawvêla ka hmangaih ber nang aia thlan hmasak tùr leh hmangaih hmasak zàwk tùr ka nei tlat a! Chu chu nang paw’n i thlan ve theih nán Krismas kan hman dun loh hi a tül rih si a,’ a tih hian!
                ~o~

Kan awmna, véng chuanhnuai atanga la mawng fé panin Amelia chu ka phur a. Rei fé kan tlà hnuah gate lian pui awmna chu kan thleng a. Chu lai hmun chu ka vawi khat kalna a ni. Amelia hnênah chuan, ‘Hei hi maw!? ka ti ringawt. Ngawi rengin a bu nghat ringawt.

A nihna takah chuan, min awm bosanna tùr hmuna kalpuia ka thlah hräm duh chu mak ka inti! Tin, hetia inngaihzàwn lai atanga a thu thua min awmtír pawh hi “thaibawih” sa riaua inngaihna te pawh ka nei ve. A thil tum min hrilh tirh khán ka thinrim tak zet a. Nimin tlaia a sawi nawn leh tum paw’n ka thin a la rim tho—tûkin thleng pawh khán.

Chu hmun chu cement bang lian pui puiin a hual khup a. A chhúngah chuan in sei pútin a ding. Chutah chuan, he khawvêla “Ka nu, ka pa” tih tùr nei ve loho, fahrah an awm khâwm a ni. Chu Home-ah chuan a ni, ka thlâkhlelh ber Amelia chuan, a mi ngaih ber leh a hmangaih ber kalsana Krismas leh kum thar chawlh a hman dáwn ni!

‘Da-a, hei hi inah i hawng chauh dáwn nia—Krismas i hmanpui tùr ka tih tawh kha,’ tiin Amelia chuan present báwm chu min pe ta a.

‘Ame, Krismas hi kum 10 dáwn kan hmang dùn tawh a; hetia …’ ka hnuk zuk ulh dáwn a! ‘ “Krismas nang nèn” kan ti thìn kha a nia. Mahse, “Krismas nang nèn … lo!” ka ti mai a ni ang chu,’ ka ti ta daih a.

Ani chuan, ‘Kan pahniha hlim taka Krismas kan hman dun thin aia hlimawm zâwka hman dàn a awm—Krismas kan hman chhan dik tak kan neih phawt chuan. En teh Da-a, mangtha rih phawt aw. Ka hmangaih che.’

Ka chháng tawh lo! Ka hnung chhawn a. Ka car hùnna lam chu ka pan tau nghat nghat a. Car-a ka luh hnu, motor ka tih nun lai pawh chuan min la thlír reng tih ka hria. A mufler awrh laiin a mittui a hru fap fap tih pawh ka hmu. Mahse, ka en reng duh bîk lo—“Krismas khawhar thlâk” min hmantír tuma min kalsantu chu!

In ka thleng a. Present báwm chu ka hawng a. A chhúngah chuan Bible zu lo awm a! ‘A ho mang e!’ han ti ngawt dáwn ila Bible meuh ho han tih chu ka hreh ve tlat a. A sawi angin a kárah chuan Bible cháng inziahna lehkha them a lo zep thluah bawk.

Amelia nèn hian kan inhmangaih tak zet a; kan inmil êm vàng a ni ang … ti ngawt ila kawng khatah erawh kan inmil thei tlat lo—a sakhuaw mi leh lutuk leh, eng teh vaka ka ngaih ve loh—Pathian, kohhran, inkhâwm, thalai fellowship tih vêl a ngaih pawimawh lutuk avàng hian! Pathian thu, Isua chanchin tih vêl hre lo thak chu ka ni bîk lo. Mahse, ka buaipui peih thlâwt lo! Ame-i ve thung chu “inla-Kris” an tih ang ni êm êm hran loa Pathian ring bur mi a ni. Chance han neih ve tum pawha tawngtai tum phêt ang chi hi! A ninawm hi ka ti deuh mah mah thìn.

Ka Krismas present dawn chu ka chhiar ta poh a. Sande sikul ka kai ve laia tantua min ruat ve nawlh tuma ka chhiar hnua Bible ka keu lehna hmasa ber a ni hial ta ve ang a! A lehkha zeh chu ka chhiar a—Isua pian thu—ka hriat hnu vek! A lehkha zeh dang chu Isaia bung 53 a ni daih—Isua tuar tuarna lam. Ka chhiar tui ta phian!

Isua Krista hian, vàna lal anga chawimawia awm ai chuan, chatuana nun ka neih nán—rethei leh riangvai tùrin, hmuhsit leh endawng tuara krawsa thi tùrin, ran thlêng a rawn bèl chat a nih chu! Ka kianga awm thlahlela min hmangaih êm êmtu Amelia ai hian Isua hian min lo hmangaih daih zâwk a ni. Vàna a kalsan leh Ame-i nèna kan kalsan ve hi, a khaikhina khaikhin chi rual a lo ni hauh lo mai!

Hemi kum atang hian “Krismas dik tak” ka hmang tan ve ta a, ka inchhïr ngai lo. Rethei taka a lo pianna ran thlèng leh kraws leh vànna lal lukhum inzawmna hun a ni tih ka hre tawh si a.
                ~o~
Amelia rawn lêt leh tum, kan inhmuh phata kan hlimzia mai chu—heta sawia ziah zawh rual chi hi a ni lo! Mihring inhmangaih tawnna satliaha inhmangaih tawh loin, Pathian hriatpuina leh malsàwmna chang dùn chungin kan inngaizàwng tawh a; a nawmzia mai chu e … sawiin a siak lo!

Kan duhnate chu Pathian kan hriattír zêl a. Hei, tünah phei chuan ka bialnu ni thìn Amelia kha ka nupui a ni tawh a, kan fa hmasa ber tùr pawh thla thar khian neih kan inbeisei ve tawh asin!

Kum tin Krismas a lo thleng a. Tùn hmaa Krismas present dawn loh leh ngaihzáwngte nèna Krismas hman dun loh kan hlauh ang kha kan hlau tawh lo a; Krismas awm chhan leh present hlu ber kan dawn buaipui loa Krismas hman hi kan hlau ber tawh zâwk a ni.