Kum 2014 inthlanpuiah khan BJP leh an thawhpui party-ten hnehna chiang takin an chang a, May thla tawp lam atangin Narendra Modi-a kaihhruai sorkar a lo ding a. Tunhma atangin BJP hi hindu sakhua nena inzawm tlat, India ram hi hindu rama leh tum anga ngaih a ni a. Hindu sakhaw behchhan pawl leh party firfiak tak takte nena inkungkaih tlat an ni bawk a. Chu’ng avang te leh prime minister Modi-a ngei pawh hi RSS a lo tel tawh a nih avang te hian Kristian pawl thenkhat leh kohhran hrang hrangte chuan tihduhdahna a thleng mai ang tih hlauhthawnna an nei viau a ni. Mahse, prime minister hi ram hmasawnna atchilh bur a ni a, inthlan campaign laia a thupui ber pawh ‘development’ a nih kha. Thuneihna a chan hnuah ram hmasawnna tura ruahmanna thar leh kalphung thar a ti nual tawh a. India ram hmasawnna turin beihpui a thlak a, ram hrang hrangah a zin kual a, sorkar hrang hrangte chu sumdawnna leh thil dangah thian a siam turin a bei nasa hle a. Ram hmasawnna beihpui a thlak mek avang hian sakhaw dangte (Kristian leh Muslim) tihduhdahna a thlen a hlau viaua ring an awm a, khawthlang lama Kristian tamna ram hausate an lungawi loh palh a hlauthawng viau tura ngaih a ni. Chutihlaiin, ‘sapuiin a zia a thlak thei lo’ an tih ang deuhin, sakhaw tih bik nei BJP kaihhruai (NDA) sorkar hnu hian Kristiante tawrhna a thleng ngun malh malh hle tawh a. Tunhma atangin BJP leh an sangawi zawnpui hindu pawlte - RSS, VHP, etc., hian India ram hi hindu rama siam an tum hle a. RSS hruaitu pakhat Rajeshwar Singh phei chuan, “Lo nghak ula, lo thlir rawh u, December 31, 2021 hi kan rama Kristian leh Muslim awm tawpna tur ni a ni,” tiin India rama Kristian leh Muslim sakhua nuai bo an tum thu a puang a nih kha. Mahse, kum hnih chuang BJP hruai sorkar hnuaiah hian sakhuana kaihhnawih buaina lian tham (major communal riots) a thleng lo a. Chutihlaiin, ram chhung hmun hrang hrangah Kristiante beihna tenau leh biak in suasamna erawh a thleng zing malh malh viau thung. Kristian pawl thenkhatte (United Christian Forum, the Evangelical Fellowship of India, etc.) hian nitin a Kristiante chunga hleilenna thlengte hi an chhinchhiah thin a. Tharum hmanga beihna bakah tawngkam a beihna sawi tur a tam hle a, sorkar laipuia minister zingah ngei pawh Kristiante vau leh tawngkam na taka bei thin an awm. Engpawhnise, India rama thuneihna chang mektute hi hindu sakhua nena inthunzawm tlat an ni a, India ram hindu rama leh tumtute an nih bawk avangin Kristiante chunga hleilenna leh biak in beihna te hi a hluar tial tial lo ang tih a sawi theih lo a. Chutih rual chuan, a hma lama sawi tawh angin, prime minister chak tak hruainain sorkarin ram hmasawnna beihpui a thlak mek avangin khawthlang ramte laka India hmai timawk thei tur thil a thlen erawh an hlau viau thei. Mahse, hindu sakhua ngaihpawimawhna erawh a lian chho tial tial a, bawng talh khap te, yoga chawilar te pawh hi an hmalakna langsar zinga mi a ni. Kum 2014 khan sorkar laipuiin Good Governance Day atan Krismas ni a puang thut mai a, he ni hi prime minister hlui Vajpayee pian cham denchhena puan a ni nghe nghe. A tir atangin Kristiante ni ropui ber pakhat Krismas Ni ber kher sorkar ni pawimawh atana hman a ni hi sawiselna a nasa hle a. Parliament-ah hial sawi chhuah a nih kha. Mahse, sorkar laipui hian, beih letna leh dodalna a nasa dawn tih hriain, good governance day hmang tur hian sorkar hnathawkte tihluihna nen a kar chiah lo a. Kuminah pawh hian Krismas Ni taka good governance day hmang turin thuchhuah siam a ni tawh a. Mizoramah chuan sorkarin good governance hman ve a nih loh tur thu an sawi chiang tawh a. Kristiante ni pawimawhah hian a hranpaa good governance day puala hun hman a nih loh tur thu Mizoram BJP pawhin an sawi tawh bawk a, a lawmawm hle a ni. He good governance day an puan chhan hi thil tha tak a nih rualin a hun atan Krismas ber kher an thlang hi chu tihluih a ni tih a chiang a, Kristiante ni pawimawh a ni tih hre chiang chunga ruat an nih avangin Kohhran hrang hrangte leh Kristian pawl hrang hrangten an sawisel nasa hle a. India danpui - sakhaw zalenna thlengin a kalh ni a sawi te pawh an awm. A bikin Kristian tamna leh Krismas uar taka lawm thinna hmarchhak biala chengte tan phei chuan a thinrim thlak hle a ni. Mahse, sorkar hian khawng leh khauh takin a ti lem lo hlauh zawk a. Engpawhnise, keini Mizo, Kristiante hian kan hmalam huna kohhran leh kan sakhua leh kan hnam tana pawi thei tur thil eng eng emaw kan la tawng chho zel lo ang tih a sawi theih loh a. Chuvangin, vai ram politics vir vel leh ram hruaitute hmalakna hrang hrangte chik taka thlir chunga kan hnam leh kan sakhaw hmabak hi kan ngaihtuah fo a tha awm e.