Eng i ti nge a hming chu i lam leh sak kher a!? Kum sawm leh kum nga liam tawha mi a nihzia leh theihngilh tuma ka tan nasatziate hi i hre ve vek tho a…!’ tiin, kum 15 liamtaa mi, vawiina a hmuh thû min hrilhtu ka thianpa kiangah chuan ka phun bûl bûl a.

2005 kum a nih tak kha â—kha nû nêna kan intawn kum kha. Thla a sik leh sik loh pawh sawi loa insik neuh neuh paha a heh pet fan fan thin nû kha. A hnuah phei chuan a heh a peh sek thin kha ka pehsak ve sek thin a nih kha! Khâng zawng zawng kha, kum 15 liam hnû hian ka hriat rengna hian la hre rengin a la theihnghilh thei miah lo a lo nih hi!

Duat tinrênga duat kha ka châk thin. Ka neih ro sumin a phâk bâka pûk chawp pawha duat kha ka tum thin a—hialin a. Ka theih tâwp chhuah leh ka theih chin thleng kha chuan ka duat ve fan fan thin—natna khirh tak vei, ka vei lehchhâwn nû kha!

A tah chânga tahpui kha ka hlimpui tlat thin a. A natna chhuah chânga Paracetamol hmawm ve mai duh hial khawpa na veah khan ka inngai tlat thin. Thisen a mamawh châng leh ka neih tlèm intawn tuma ka thinrim thinzia tak te kha aw! Mahse, ti khan, a kiangah khan ka zâl ve mai thin. A hlimna ber nih kha ka hlimpui ber a ni thin a; a nuihna tûr a nih dâwn phawt chuan engkim zuamin ka inhuam tak zet zet thin.

Mahse, keia dan phâk leh chelh phâk rual lohin; kei aia nei leh thiam, fing leh nei nung zâwk, amah enkawltu atâna tlinga fit zâwk, ama doctor ngei mai chuan min chhuhsak ta si a!

‘Thianpa, vawiina amah i hmuh leh chuan a hlim zêl em? Pasal a nei ve tawh ang tiraw? Eng nge a thawh tâk?’ tia zawh chu, chhûng rila na chung chuan ka thei ngang lo—a mi chhânna tûr ka hre ngam lo pawh a ni ang e! Tin, ka châwm tâwk leh ka phû tâwk, theih tâwp chhuaha hmangaiha, ‘dam chhûng atâna’ ka dawm tlat tûr nupui ka nei tawh a; fate min châwipui ve hial tawh si a!

A hming—kha nû hming ngei kha, a rawn sawi chhuah leh tâk avâng hian, hmâna a ngãi ang bawk khân, awmze awm tawh loah rilru sêng lehin, amah ngaiin rilru a thar leh lo thei si lo a nih hi! Chûng zawng zawng chu ka tuar leh dâwn tih hre reng chunga ka hriata a rawn sawi chhuak leh sak kher erawh hi chu … thian mah ni se, velh hrep ka duh ngawt mai!

‘Thianpa, kum 15 liam tâa chêng nawn leh a, kha nû nui mawi tawng leh ang khân, Thlarau Thianghlim hnathawh tel miah loin ka rilru hi min siam tharsak leh a. Min then tuma ná ka tihzia ang chiah khan ná min tawrh nawntîr leh sak chiang a nia aw!’