Kum 2017 a her liam a, kumthar kan lo chuang kai ta. Kumin hi thalaite, a bikin mipa lam nghahhlelh em em FIFA World Cup khelh kum a ni a, football ngainatute titi tui ber pawh a ni chho thuai ang. Kum 1914 July thla tawp atangin indopui pakhatna a lo chhuak a, kum li chhungin indona hmun hrang hrangah nunna chan maktaduai 20 vel an awm a, hliam tuar pawh maktaduai 21 chuang an tling bawk a. Chu indopuiah chuan Mizote pawh kan tel ve a, Mizoram atangin sang hnih vel leh Falam atangin sang khat zet Kumpinu leh a tanrualpuite tan an thawk chhuak a ni. Chu indopui rapthlak bera Mizote kan tel ve kha a ropui ve hrim hrim a, Mizo hnam history-ah mel lung pawimawh tak a ni bawk a. Indopui pakhatna chu kum 1918 November thla khan a tawp ta a, kumin hi a kum 100-na a ni nghe nghe. Kumin hi kan ram hruaitu MLA inthlan kum a lo ni leh bawk a. Keini ang state te tan hi chuan MLA inthlan hi a pawimawh zual bik hle a, inthlan kum a nih hi chuan politician-ho mai bakah mipui pawh kan phur ve viau thin a. Kan chief minister hi a ni ta awm e, “Inthlan te chu keini tan chuan puja alawm,” a lo tih ang deuh kha a ni. Party mi leh sate an phusa leh nasa anga, tum dang ang a nih chuan sum leng vak a tam leh anga, lo neih loh phah te an awm leh nawk anga, intlawn leh intivui, titau thlem ngai sawi tur an awm leh nawk bawk ang. Engpawhnise, kohhran leh tlawmngai pawlte hmalakna zarah boruak muanawm tak hnuaiah felfai takin kan inthlang thei turah ngai ila. MPF lam pawhin theihtawp chhuah an tum a, political party hrang hrangte nen pawh thawhhona thuthlung an ziak fel tawh a. Vai ramah chuan an inthlang boruak a tawp thin a, kan thenawm state-te pawh an inthlannaa sum an chelek nasat zia kan hre thin. Keini chu Kristian rama tihawm renga mawia chet tum ila, inthlanna thianghlim leh felfai tak a awm theihna turin tanla tlang ila a tha ang. Democatic ramah chuan politician-te inbeih thin hi kalphung pangngai a ni a, mahse, dawt leh thutak pawh hriat hran theih loh khawpa an inbeih erawh chuan mipui min zah lo tihna a ni thung. Ram hruaitu nih tumte hian tlin duh vanga sum tam tak an sen thin hi mipuiin kan chik a ngai. Tlin duh vang chauha ‘polite’, vote duh vang chauh a sum seng thinte hian min hmangaih lo a, kan khawtlang pawh an hmangaih lo a, ram leh hnam an hmangaih tak tak lo.... MLA nih an duh vanga lemchang mai an ni tih hria ang u. Sum leh pai, therhlo chelek awlsam em em politician-te hian mipuite hi bungrua ang lekah an en tihna a ni a, sum hmanga hmin theih, pawisa leh therhlo hmanga lei theihah an ngai tihna a ni. An hmusit tihna a nih ber chu. MLA inthlan kum a ni bawk a, lo neituten ngaihsak an hlawh zual dawn a. Sorkar atanga tanpuina leh chhawmdawlna, sum leh pai leh thil dang awm thei zawng zawng an dawng chur chur anga. NLUP pawh a hun chhung tura ruat a zawh daih tawh hnuah la kalpui zel a ni a, sum la awm ang ang hi an sem mawlh mawlhin a rinawm. Eptu party dangte pawhin loneitute leh kut hnathawktute hamthatna tur an sawi nasat tho dawn avangin kut hnathawh leh lo neih hi hna zahawm ber a nih kum kan thleng mek a ni. Mahse, kan ram loneitute leh kut hnathawha eizawngte hi eng sorkar hnuaiah mah hian an lungawi tak tak lo a, an dinchhuahna tura tih tak taka hmala an la tawng lo bawk. NLUP a ni emaw, MIP a ni emaw an beidawnna tizualtu mai a ni leh thin. Kar kal ta (January 6) khan U.P. chief minister chenna kawtah leh Lucknow-a hmun pawimawh hrang hrangah lo neituten alu an paih darh nasa mai a. Alu chingtute lungawi loh chhan hi an hralhna man a tlem lutuk vang a ni, Adityanath-a sorkarin alu quital khat man Rs 487 a tih chu an duh lo a, Kg 1 Rs 10 (Quital khat Rs 1000) tal ni turin an nawr thung. Kan rama sawhthing chingtute hian hetiang harsatna hi an tawk mek a, serthlum chingtute leh thil dang chingtute pawh hian an thar chhuah hralhna kawngah sorkar lakah beisei tur an nei chau thin khawp mai. Nikum leh kum hmasa lam atang khan lo neitu tam ber innghahna sawhthing man a tlahniam a, hralhna lamah harsatna an tawk nasa hle a ni. NLUP hi loneitute dinhmun chawikanna tur ni mahse thlai thar hralhna lam buaipuitu (NLUP Marketing Cell/Board) lah hi an zuzi tawh bawk si a. Kumin hian sawhthing chingtute an mangang leh dawn em? Vaiho thunun theiha sawhthing market dah hrim hrim pawh hi sorkar tan mualphona a ni, a changtu minister hian mawh a phur thui hle. Engpawhnise, inthlan kum te a ni a, sawhthing chingtute pawh an hlim turah ngai ang. Kan sorkar hian amah leh amah a intihbuaina pakhat chu Mizoram a medical college din chungchang hi a ni. Din tak tak tum viau angin lang thin mah se engemaw vangin an tipuitling hleithei lo a. A hming tur an phuah tawh a, a logo tur an buaipui leh mek bawk a, kumin hian din tum tak tak angin an lang leh zual sawt dawn. Hnawhsarum deuhin an din chuk chuk thut maithei bawk, inthlan kum a ni bawk a. Tuna an mutan chu MCI atanga phalna hmuh a ni a, an rawn endik tawhnaah phalna an la pe thei lo a. Sorkar hian July 2014 khan a hming an phuah a, August 2015 atanga class tan an tum a, mahse, chuti ngawtin thil a kalpui theih loh a. Referral hospital pawh college dinna tura an cheibawl duh vangin Aizawl Civil Hospital thawktute leh bungrua te an sawn chuk chuk a nih kha. Medical college a hautak viau mai a, sorkar laipui enkawl zui tur a nih  loh phei chuen state pachhia keini ang tan chuan a cho chi pawh niin a lang lo. Nikum lama sorkar thuchhuaha kan lo hmuh dan kha chuan Medical college dinna tur sum hi central sorkarin 90:10 pattern-in a tum tur a ni a mahse a thawktute hlawh leh a enkawlzuina hi state sawrkar kutah dah a ni ang a. A dinna senso chiah hi sorkar laipuiin a tum a nih a, a enkawlna hi state tum tur a nih dawn chuan a huphurhawm viau ang. Chuvangin, kan mamawh zawk chu sorkar laipui din leh  enkawl tur medical college tha tak leh changtlung tak a ni. Kawngpui vanga nikum lama kan buaina zozai kha kan la theihnghilh lo anga. Kumin hian Mizoram chhung inkalpawhna kawngpuite a hnum hlerh hlurh turah ngai ila, sorkar pawhin a zawna kum hnih chhung mipui phun thawm hriat a duh bik lo ang. A changtu minister pawhin inthlan kum a ni bawk a, a vei viau turah ngai ila. Kan ram hi ruahtui tamna ram a nih vangin hnathawh hun chhung a rei lo tih te, lung leh balu tha a awm loh vangin kawngpui tha leh tlo a neih ve theih loh, tih te hi mithiam zawkte sawi fo a ni. Mahse, hei hi thu dik pawh nise, chhuanlam a tling lo. Lung tha a awm lo tih ngawt te, ruahtui a tam tih te hi chu kawngpui siamtute hausak dan en hian awih chi a ni lo. Kan thenawm state-ten kawngpui tha an neih theih chuan kan nei ve thei tur a ni, chu chu minister leh a thawktu department mawhphurhna a ni mai. MLA inthlan hun hi dan pangngai ang chuan kum tawp lam ni tur a ni a, mahse, sorkar laipui sukthlek thlir hian October/November thla velah pawh a ni thut thei. Tunhnaiah chief minister pawhin a sawi kha. Chuti a nih chuan India rama congress sorkar nuai bo vek tuma bei mek BJP hian Mizoramah pawh congress sorkar hi thlak an rawn tum nasa dawn tih a chiang a. State danga an tih angin, rorel lai MLA te hi an bang ve sup sup mai ang em? An party hotu pa laka tlatlum vak lo te hi an sihhnip viau mai lo maw? BJP hian MLA inthlan hmaa state sorkar chhaih buai hi an ching viau a, Mizoram sorkar hi an dim bik ngawtin a rinawm loh. Kum tawpa prime minister lokalin Pu Hawla sorkar a sawi chhiat loh vanga lo thlamuan ngawt chi a ni lo ang. An chet dan en hian kumin chhoah chuan chief minister leh a ministry hi an rawn bei ngei ngeiin a rinawm. Manipur inthlan dawn a Pu Modi-a'n an chief minister a beih anga nasa khan mi malin a la rawn bei lo ang tih a sawi theih loh. Nikum kum tawpa Aizawla a kal hnua Shillong-a a kal pawh khan an sorkar a bei nual a nih kha, kum tir lama inthlang tur an ni bawk a. Chutihlaiin, Modia hruai BJP hi hlauh ngawt tur a ni em? Kan lo ngaisang uchuak ve lutuk palh ang tih te hi a hlauhawm. Kan sakhaw himna leh kan hnam himna hi keini hi chuan ngai pawimawh ber ila, hnam tlem te, chim ral theih reng dinhmun a ding kan nih avangin politician-te pawh fimkhur se, huaisen thin se. Kan hnam himna hi kan kutah thui tak a awm si a. Ram hmasawnna hi thupui bera neih chi pawh a ni lo, a phenah thil tha lo a awm thei a. Kan hnam leh sakhaw himna hi kumin inthlan kumah pawh hian thupui berah nei ila a duhawm khawp ang.