Vailen hnua kan history a thil thleng langsar ber mai chu kum 1966 March thla tir atanga zalenna sual hnam sipaite leh min awptu India sipai indona kha a ni mai awm e. Mizote chanchin a hun thim lai ber a tih ngam hial bawk ang. Chu hun thim, Zofate zin kawnga a bumboh lai ber mai intanna chu India indo thlawhnaten Aizawl khawpui an pawng beih chiam kha a ni a. Lehlam zawnga chhut pawhin rambuai kha India tan pawh chhinchhiahtlak a nihna lai a awm - mahni ram chhunga hel beihna atana indo thlawhna a hman hmasak ber leh awm chhun a nih bakah civil mite chennaa a beih hmasak ber a ni bawk. Khatih lai huna khawvel pum huapa human rights bawhchhiatna langsar ber a tling hial bawk ang. Heng thilte hi sawi nep tum pawl awm thin mahse India indo thlawhnaten Aizawl leh Mizoram khaw hrang hrang an beih dan chanchin ziak a awm nual a, a taka tawngtu la hre chiang tak tak an awm nual bawk. March 5,1966 khan India indo thlawhnate Aizawl khawpui chheu darh turin an lo lang thut mai a, van sang atangin bomb leh rocket-in an rawn bei a, puakrangin an hawl zui bawk a, an leidote leh nunau pawisawi lo an hre hrang si lo a, an rawn vaihma ta hmiah hmiah mai a. Meialh nasa tak siam thei bomb an thlak a, a puak ul ul a, a alh zuai zuai bawk a. Bazar hmunpui leh mipui chenna hmun thlengin chung thlawhnate chuan an phin a, ralpui beiha a khaw pum an rawn beih avangin hmun him a awm tawh lo. Kar loah Zawlkhawpui a kang duai duai a, Mizoram pumpui innghahna khawpui chu indona hmun a chang ta a, tihchhiat vek tuma indona hmanraw tha ber ber nena beihna lakah chuan tang turin chakna a nei lo a, mipui an darh ta chum chum mai a ni. He thil rapthlak tak thleng chungchang hi Mizo mipuite hriatah leh khawvel hriatah India sorkar hian chiangkuang taka sawifiahna leh puanzarna a la nei lo a, rorelna ina politician thenkhatte tawngkam atang erawh chuan hriat nuam loh khawp a dawt phuahchawp sawi tawk an awm tih a hriat thung. He thil thlen hnu lawk April, 1966 khan Assam Assembly House-ah Cherrapunji bialtu MLA Stanley D.D. Nichols Roy chuan Mizoram buai thu sawi chhuakin sorkar chet dan na takin a sawisel a, “Heti em ema nasa a sipai chakna hmang a helna tihreh tum hi thil hlauhawm tawp a ni,” a ti hial a. Hetih lai vel hian ram dang chanchinbu mi pakhat hnenah prime minister Indira Gandhi’n Air Force ten mihring leh ei tur (supply) chauh an thlak thu a sawi a, Assam Chief Minister pawhin sawi nep a tum viau bawk a. Mahse, he MLA hian, “Ka pu, Chief Minister khan bomb hman a ni lo tiin a sawi a. Thlawhna an hman kha chu indo thlawhna ngei a ni. Chu’ng thlawhna atanga thil an thlak te chu a puak a, thil a tichhia a, he ram leh hnam tana mi rinawm tak takten an thih phah a, an thil neih hlu tak takte an chan phah bawk asin. Aizawl beihnaa sipai chakna hleihluak tak a hman a, Air Force hial rawih mai hi a uchuak mah mah ka ti. Tunge khua leh tui rinawm ni a, tunge rinawm lo? Tunge MNF nia tunge Mizo Union tan? Tunge Mizo District a rorel lai party mi? tih in thliar hran theih loh vangin maw? Heng zawng zawng ai hian hleihluak taka Air Force chet dan leh bomb an thlak hi a rapthlak. Bomb ngei a ni kan tih hi keini chuan kan hmu a, a fiahna pawh kan nei, chu’ng chu sipaiin Mizo District ah hian an hmang a ni,” tiin assembly house-ah a sawi chhuak a ni. Kum zabi 21 chhunga mahni dinchhuah eizawnna (entrepreneurship) lama hlawhtling ber pawl a ngaih CNN dintu Ted Turner chuan, “Kum 1940 chho velah khan CNN hi awm tawh se la chuan German Nazi-hoin Juda maktaduai 5 an thahna (Holocaust) kha a thleng kher lo ang,” tiin a sawi a. Khawvel hriata thilthleng a nihna ang chiaha puanzar hian buaina rapthlak tak a pumpelh thei tihna a nih hmel. Kum 1966 chho vela Mizote kan vanduaina em em chu rambuai hmetmit tura Aizawl leh Zoram hmun hrang hranga min awptu India indo thlawhnaten bomb hmanga (mipui nunau pawisawi lo thlenga) min beih thu kha hmun danga chengte hriata puangzartu kan nei lo kha a ni. Tunlai ang hian media hi chakin awlsam takin information inpek tawn theih chu ni sela chuan India sorkar chet dan kha chu khawvelin a dem viau ang. Rambuai laia mipui tawrh dan zawng zawngte kha han enin kum zabi 21-na a khawvela human rights bawhchhiatna rapthlak ber pawl a tling hial ang. Mahse, puangzartu leh thlavang hautu awm ta lo chu mipuiin an sepui ruah tuar ngawt ngawt mai a ni. Hnam tin hian an hnam pum nghawng thil thleng langsar tak tak, a chhe zawng leh a tha zawng pawhin an nei vek a, chutiang chu an theihnghilh phal ngai lo a, thangthar zelten an hriat rengna turin hmunhma te an buatsaih a, in ropui tak te an sa a, lung te an phun thin. A champha a lo thlen changin urhsun takin hriatrengna hun te an hmang thin ngai a nia. Keini pawh hian 3/5 kha hre reng ila, he niah hian kum 1966 a thil rapthlak tak lo thleng kha hre chhuak leh thin ila, hnam rilru pu thar leh ila, thinrimna ni leh lungngaihna ni a hmang mai loin kan hliam hlui tuam dam dan tur ngaihtuah chungin kan tawrhna atang khan rilru thar puin i tho chhuak leh thin ang u.