Dr Ka Zawhna

Kum 60 mi sex lama chak lo..

Dr. Chawnglungmuana - Nov 15, 2022

Sex hman hrim hrim hi rilru inpawh tak anih loh chuan mipa sex drive hniam sa tan chuan hman chakna a insiam mawh hle tih kan hriat tel a tha. Hmang tur chuan in checkup hmasak ni thei se, natna benvawn, a bik takin lung lam fel lohna (heart disease) an nei lo tih confirm hmasak a pawimawh ang.

Zawhna: Ka pu, kum 60 mi ka ni a, mipat hmeichhiatna kawngah hian ka chaklo ta riau mai a, tunlai a sex chakna an tih mai Dr X te hi ei ve ta ila a pawi ang em? Nupa nun kan hman khat deuh changa sazu lik vel a var beh lo awm thin hi enge a chhan? Min puih theih chuan ka lawm hle ang

Chhanna: Sex lama chak lohna lam hi zawhna ka dawng thei khawp mai a, chuvangin Sex hi hringnun ah a pawimawh hle a ni tih chu chhiartute’n in hrethiam mai awm e. Mithiam thenkhat te sawi dan phei chuan mihring nunah hian thil pawimawh pathum, a tel lova awm theih loh ang hiala an ngaih a awm a, chungte chu – Eat, Sleep, Sex (ei leh in, mut leh sex hman) an ti. A dik ber ang em erawh sawi a har a, sex lamah chuan mi thenkhat chu sex hmang lo tura inserh hrang an awm a, an buai phah lem lo ni te pawhin a lang. Engpawhnise, sex hi nupa nun ah a pawimawh em avangin kan han ziak leh poh ange.

Mihring hi kan kum a lo tam hian tisa chakna (sex drive) a lo tlahniam ve hret hret thin a. Chuti chung chuan sex hmang peih lo tawp erawh an vang mai thei; a bikin mipa ah a ni zual ang. Hmeichhia erawh an thi a hul hian an sex drive atana pawimawh hormones a lo tlahniam a, an serh tuihnang insiam a lo tlem telh telh bawk a, chu chuan sex hman chak lohna a thlen ve thei a, mahse hei hi thil nihphung pangngai (natural) ang te pawhin a ngaih theih awm e. Mipa ah pawh hian sex drive chu a tlahniam ve thei teh meuh mai a, mahse hrisel lohna, eng natna benvawn emaw tak te an nei anih loh chuan sex drive hi chu an hrisel that poh leh a pangngai tluang thei viau thung.

Sex lama chak lohna (low libido, low sex drive) kan tih leh sazu fuk thei lo emaw fuk rei thei lo (Erectile Dysfunction) ang te hi a in ang lo tih hriat erawh a tha thung. Sex drive hniam hi a chunga kan sawi angin natna benvawn, a bikin zunthlum, thisen sang, kal emaw thin tha lo nei te, zu leh zuk leh hmuam ti nasa ah te hian a awm duh khawp mai a. Tin, damdawi thenkhat sex drive ti hniam thei te pawh a awm bawk (side effect tihna). Chutiang ang harsatna ah chuan tuna i rawn sawi damdawi Dr.X kan tih ang te hi an chawh common tak chu a ni a. Sildenafil damdawi niin ram changkang lamah chuan Viagra ti in a lar hle. India ramah chuan a hming hrang hrang a awm a, Penegra tih te pawh hi an hman uar zinga mi niin Dr.X nen hian a combination chu a in ang reng thung. 
    
Sildenafil damdawi hi a tha khawp mai a, mahse a hman dan dik a pawimawh a, chu bakah chuan lung lam natna nei tan fimkhur a ngai hle thung. A bik takin sex hman hma darker chanve vel tal a ei tur a ni a. Amah ringawt chuan a thawk mawh thei a, chuvangin intih zauthau a ngai thung. Chutiang chu anih vangin thawk tha tur chuan hmeichhia an pawimawh ve tihna a ni. An pasal te ti zauthau thei zawnga an khawsak ve kha a pawimawh hle. Tin, sex hman hrim hrim hi rilru inpawh tak anih loh chuan mipa sex drive hniam sa tan chuan hman chakna a insiam mawh hle tih kan hriat tel a tha. Hmang tur chuan in checkup hmasak ni thei se, natna benvawn, a bik takin lung lam fel lohna (heart disease) an nei lo tih confirm hmasak a pawimawh ang.

I rawn sawi dang leh hi chu mipa hi sex kan hman loh pawhin leh, kan chakna a chhuah kher loh pawhin kan serh ti hnangtu tuihnang (smegma) an tih hi a insiam ve reng a. Chu chu silfai uluk loh chuan a khir var a, lik lai hi a khuh fo thei a ni. Chuvangin inbual paha sazu lik a, sahbawn nena silfai nachang hriat fo a pawimawh. Tleirawl leh thalai lam hi a nachang hre lo an awm fo mai a, hygiene lam uluk lovah phei chuan infection te pawh a insiam phah thei a ni. Tunhmaa vai labour ho, a bikin mosolman ho thu chungin an zung a, an zun zawhah an sazu tuiin an silfai thin kha kan lo nuihzat thin a, a lo hygienic hle zawk a ni. Chuvangin hygiene uluk hram hram a tha.

Share now