Chhiartu duh tak, kum a tlem ta lo a ni awm e. KA HUANG puahchah tura type writer han khawih velte hi a chakawm lo ta riau mai! Thutthlengseia mut mai mai hi a nuam ber zawk a lo ni awm e. Ka chapona a nih leh ni se, kum 90 vel type writer khawih fuk fuk pawh hi an awm pawh ka ring tawh meuh lo.

Watspp group khawimaw laiah PHUNG (Ramhuai) thu an rawn sawi a, kristian kan ni a, phung a awm loite hi kan ti tak na a, awm chu a awm em ni aw a tih theih.

Mission Veng, Aizawl hi Mission-in a enkawl lai, in 70 vel bak phal loh a nih a nih lai pawha Mission Sapten mawhphurtua an dah ve hial a ni a, pa tawng zawk zawk lo, sam zial a ni nghe nghe. A thih thlengin a met lo ni tain ka hria. A hming Pu Lianhrânga.

Lamhnai neih kum a ni a, lo a nei ve thin. A feh hawng a tlai deuh a, ngaw a lo lut chuan se dai bulah hian pa lianpui mai hi a kawng hnawhin a lo thu tlat mai a ni awm a. Pu Lianhranga chuan phung emaw, ramhuai emaw pawh niin a ngai chuang lo, Pa lianpui kawng kian tura a dil leh a ngaihsak si lo a, kawng thlang lamah a sah hel ta ringawt mai a ni. Tichuan, in a thlen chuan a chhungte a hrilh a, a zan atang chuan khawsik sang deuh maiin a na ta vak mai a. Tlangvalhoin mak an ti a, “Kawng min kian duh si lo a, ka sah hel,” a tih lai chu an zuk en a, a lo sah helna hnuhma pawh an zuk hmu ngei a ni. A thih phah ta em lo a.

U Vankhama (hla phuah thiam) pawh kha Venghluia a nula rim hawng, Bawrgsap in (Larsap in) char lam hnuai ngaw kara a kal laiin THLA-AI an tih mai hian ai chungin a zem vak mai a, a kapkarah te ai chungin a lut tlang vel a ni awm e. Ani pawh kha lukawlh rawtin a na tih an sawi thin. Mak ve angreng tak a ni.

Sawi takah chuan Tau meichhe chhi kan tihte kha an hawng ta vek emaw ni, tunlai thalaite hi chuan hria aram pawh an awmin ka hre lo. 1969 June Bethlehem Vengthlang, tuna ka awmnaa kan chhuk tirh tê khan kan ral... Pachhunga Collge ram, ngaw durah hian a tam thei khawp a, an de sup sup thin a, kan thlir fo mai. Tunah khawiah thang ta maw, a la ngaw reng sia, la det sup sup tho awm, a tua mahin kan tihbuai awm pawh ka hre si lo, an pem ta vek emaw ni dawn tehreng, zuk de tawh ngai miah lo a.