Calendar-a January ni 1 a nih hian kan nihna a dang viau chuang em le? Kan chìn thin—mei zûk leh kuhva thial kan sim a ni thei; zu in kan sim a ni thei—a va tha êm! Mahse, thar tùra chu kum, calendar leh diary lam ni loin, kan rilru putzia zâwk hi ni ta se …

Kum hlui sawi lawk ka va’n châk êm! 2018 December ni 23 khán, kan véng hlui, Chanmari-ah ka va léng a—Pu Charlie Lalkhawliana va tlawhin. Ka lehkhabu te ka va pe ve a; min lo faksak ve fú. ’Chuan kan inkàwm a, Reiêka a pian hnua Govt Mizo High School-a zirna a chhunzawm dàn te, Shillong lama College a kal dàn te min hrilh. 1963-a Nehru-a te nufa Aizawla an rawn kal tuma zai hla an lo tum dàn te, 66 chhoa Rock revolution lo chhuah lai vêla a hun hman dàn te leh hla a phuah ve dànte pawh a sawi nual. Ngaihnawm ka va’n ti tak!

Engtia lo ‘En teh a lo her chhuak leh dáwn ta’ ti ve ngawt nge tih te pawh ka zâwt. A sawi. Kan inkawm laklawh lai chuan a pindana a tingtang, kum 1955 vêl atanga a lo tuai tawh chu a va phawrh. A’n zai ta a—hla min saksak a nih chu—a va mawi êm!

En teh! Vana Pa Hall-ah sáwn eng concert cert emaw te, eng show show emaw buatsaihtute zíngah, a vawi tam ka lo tel ve tawh thìn. North East pum puap Beat Contest huaihawttu-ah te leh announcer hial hialah te pawh ka lo tan ve thin tawh kha! Mahse, khami tuma Pu C Lalkhawliana thut muan ina a zai tluka show ropui kha ka la tem ve lo a nih chu!

A âw atangin a tar tawh tih hai rual a ni lo; mahse, a mawi a ni! A mawi a ni mai lo, a hlu a, a vanneihthlak hliah hliah—pui tak a ni!

Kan sawi kual duahna chhan chu, kan dam chhúng níte hi, mi dangte tán engtia hlu nge ni ve ang le, tih hi a ni. Kan nunnate hi mi dang tán engtia hlú nge ni ve ang le, ka tihna a nih chu. 

Dam sen tul mah ila, mi dangte tan hlutna nei si lo hian a dam sen tul theih tlat a. Hrisêl hle mah ila, mi dangte tana natna kan ni thei tlat a nia! Hêng thil te hi i ngaihtuah ang u.

Mi ropui tak va nih hi mi ropui takte hian an tum hranpa kher hran ngai lo; an nun an uluk a, an chuti mai thin a lo ni zâwk. Tum ùla tum tùn chi pawh niin ka hre lo e!

Mi thu sawi thiam tak nih te pawh hi, thu sawi thiam takte hian an tum tùn ngài paw’n ka hre lo—an nunpui kha an sawi mai a, a tak bîk riau zêl. Nunah hian ‘tih’ hi tam se, ‘sawi’ hi tlém se, a dik zuih zêl zawng a nih hi maw!

Tum khat pa pakhat motor khalh an sawi ang deuh kha a ni. A gear thlâkna cháng reng reng a hre lo a. A chuanpuipa-in, ‘A gear thlâk ve êm êm la,’ a’n tih hnuah a thlâk hun àwmah a thlâk ta thin a. ‘A ni zuih ta mai!’ a tih tâk kha!

Nunah pawh hian gear thlâk hun hriat a ngai dáwn àwm mang e! 

Kan la tawn ngai loh, kan la hmuh ngai loh, 2023 chu kan lo chuang kai leh ta reng mai. Min hruaitu hi chu a awm a ni! En teh—heti maia kum thar kan han chuang kai thei te hi … a mak a ni tiraw? Min hruaitu chu a awm chiang! Ka chiang!

Mahse la, min hruaitu hai that that khawpa khawsak hi a awm thei khawp mai. Tunge min hruaitu tihah chiang ila, chumi hruaina zêl chu ûm ila kan va’n that tlânpui dáwn êm!

Hruai lohin tunge kal ngai? Chàwm lohin tunge thang ngai? Chhawn lohin chhawm theih an awm ngai em ni? Chutianga dàwm ngai, mi derdêp mihring chu kan ni si a. Tuin nge min chàwma, tú dàwm nge kan nih tih inbih chiang ang u. Chu chu, kumin kum tharah hian  i zui mai ang u khai.