Ka column lo chhiar thin zawng zawngte leh min lo hlutsak thintute kumthar chibai ka buk a che u. Zawhna in rawn thehluhte duh angin kan chhang kim hman lo thin a, in mi hriatthiamnate pawh ka’n dil nghal ang e. Tun tum chu kumthar hlimte a ni bawk a, zawhnate chhang lovin mahni vei zawng ka’n ziak hmasa ber ang e. Mizote hi kan khawvel changkang chak takah hian hmasawn dan dika hma kan sawn a tul hlein ka hre ve thin a. Hnam changkang zawkahte chuan mi mal chu thuhran, an sawrkarte pawhin healthcare atana sum dah hran hi an ngai pawimawh khawp mai a. India ramah hian healthcare lam hi kan la ngaihthah viau niin a hriat a, central budget atanga healthcare atana sum an dah hran thin pawh hi mi thiam zawkte chuan an duh khawp lo hle thin. Keini state-ah pawh hian kan retheih ngaihtuah hian healthcare lama sum invest hi kan ngaihthah mah mah em aw a tihtheih.

Kan senior doctor pakhat, Private Hospital-a thawk sawi ka hriatreng chu, damlo admit ngai an han tawng a, a rawn kalpuituten room tha ber ber an rawn beisei nghal a, smartphone changkang tak kawl, incheina atanga en pawha khawsa thei awm takte an ni a, an han admit ta cheng a, discharge a lo hun dawnah a enkawlna fee lam pe tla hleithei lo, a then bat dilte an ni leh nawk thin tih thu a sawi a. Chu chuan healthcare lam aia khawvel changkanna thil kan atchilh zawkzia leh, kan hriselna atana sum invest kan ngaih pawimawh lohzia a tichiang hle. NEIGRIHMS, Shillong lama thawk doctor pakhat pawhin a sawi chu Mizo damlo rawn kalte hi a tam zawk chu motor changkang tak takin an rawn kal a, hospital fee pek a huna pe tla hleithei lo an awm leh fo thin a, kan senior-te pawhin min nuihzat titih fo ta mai a ti bawk.

Vai hmelhriat ka lo neih vete ka titipui atang hian a tlangpuiin sum an khawl chhan chu an damloh huna inenkawlna atan leh nupui pasal neih hun (anmahni emaw an fate) atana inkhawl an ni deuh ber. South India lama ka zuk zina an thingtlang khua ka fanna lamah pawh mi hnuaihnung tak takte ka kawm thin a. Hmeithai HIV+ te ka kawm thin a, an theih ang angin eizawnna an dap a, sum an khawl ve thin a, an sum khawl hman tum dan ka zawhchuandamloh a inenkawlna tur leh an fate nupui pasal neih hun atana hman tur a ni deuhzel.

Kan ramah hian tuna sawrkar mek MNF party sawrkar hmasak zawk atang khan mumal deuhin sawrkar hnathawk ve lote tana hman theih turin Health Care Scheme an rawn chhawp a. A tangkai em em mai a, a chhawrtu lah an tam. Phai lama damlo hruaia ka kalte hian thingtlang mi phaia inentir, khawsak harsa tak tak, phaia enkawlngai site ka hmu fo va. Health Care an hman tangkai vanga anmahni sum atanga an phak hauh loh tur enkawlna dawng an thahnem hle. A buaipuitu lam zawk hian an promote thiam lo nge ni, heti khawpa tangkai si, in-enroll nachang hre lo, tlachawp tak meuh meuha khawngaih vanga a hun pelh daih tawha in-register hnuhnawh an thahnem thin hle.

Kan ramah hian healthcare industry hi mihring kan pun chhoh ve zel avangin a than a pawimawh khawp mai a. Sawrkar damdawi in lam hian mipui mamawh a phuhruk zo lo tih a chiang reng a, chuvang tak chuan Private Sector lam an rawn thang ta reng a ni. Hei hi khawvel kalphung a ni a, a chhawrtu chu mipui tho kan ni. Civil Hospital Aizawla khum awm zat hi kum sawm kalta chhung khan a pun belh hman lo va, chu kum 10 chhunga Aizawl mihring pun belh dan erawh kan hrethiam mai awm e. Private hospital-te hi awm lo ta se, kan sawrkar damdawi in tan hian lo enkawl sen chi ziazang a ni lo. Chuvangtak chuan healthcare atan hian sawrkarleh private sector tethawhhona tha a pawimawh em em a ni. Kan private sector lam pawhin an pawimawhna hriain facilities leh infrastructure lamah hmasawn tumin theihtawp an chhuah a, phai pan ngai lova investigation leh treatment eng emaw zah an chhawp a, chu chuan sawrkar sum phai lama luangral tur a veng a, a chhawrtu chu mipui tho kan ni.

Tunhma a Health Care Scheme bakah Central Sorkar scheme liantakmai a rawnpiang ta a. He scheme AB-PMJAY hian mi retheite ban phak tur health care, cheng nuai 5 (Rs.5 Lakhs) thlenga bill theihna a rawn chhawp ta rup mai a. Kan sorkar pawhin he hmalakna hi a kalpui chho a, Health Care Scheme awm sa la awm tho bawkin AB-PMJAY atan hian enrollment an tichho ta char char reng a ni. An tih dan erawh a fuh tawk lo nge ni Eligibility Criteria kan enchian chuan sorkar hnathawk awmna chhungkuaah te, lirthei two-wheeler nei pha chin te, refrigerator nei pha chin te, chhungkaw member-ah thlabi hlawh Rs.10000 aia tam la lut chin te tan registration a lo theih reng reng loh mai a, ennawn leh a tul a rinawm viau mai.

Nikum khan Health Care hrim hrim atana hman theihna tur private hospital tam takte chu sawrkar nen an inrem theih loh avangin health care reimbursement te hi hospital eng emaw zatah a tihtheih ta lo va, a pawi hle mai. A chhan chu engpawh lo nise, kan sorkarhian a chinfel ran a tul hle. Kan doctor-te thiamna a sang zel a, hmanrua lama h pawh phai pan ngai lova kan ram ngeia kan tihtheih tam tak a lo awm ta a, Private Hospital-te hi chutiang service min chhawpsaktute an ni a. Damlohv anga phai pan ngai hautakzia hi a tawngtute ngeiin an hrechiang hle ang. Chuvangin, he buaina hi chinfel thuai ni thei se a lawmawm ngawt ang.

A tira kan sawi ang hian Health Care Scheme kan neihsa pawh hi AB-PMJAY tel lo pawh hian tha zawka kalpui theih a rinawm hle. Premium pek kawngah hian kan ui a ni mai thei. Hun rei tak chhung chu keini chhungkua pawh hian kum tin kan lo in-enroll ve tawh a (sorkar hnathawk kan awm miau loh avangin), Pathian zarah hman ve ngai khawpin kan la awm lo va, chutichung chuan premium kan pek tling khawm atanga mi harsa zawkten an lo chhawr dan han hmuh chuan kum khat atana Rs.1000-2000 emaw lek pek hi a na reng reng lo mai ni lovin, lawm hliah hliah tur zawk kan ni. Duhthusamah phei chuan premium hi category hrang hrangin kalpui se, a nei zote tan premium sang deuh leh room nuam deuh entitlement te awm hial se, pe duh kan tam ka ring hle. Annual-a pe lovin thlabi emaw, quarterly-a pek ngai zawk pawh insiam ta se, a petu tan a nat ka ring lo. Mi harsa zual zawkte tan erawh minimal charge-in registration tihtheih bawk ta se.

Engpawhnise, kan hriselna hi kan ngaih pawimawh zual a tul a, chumi atan chuan kan sum thawh chhuah ang angte pawh khawl nachang kan hriatdeuh deuh a tul a, insen pawh kan inhuam zual a tha hle. Smartphone changkang tak keng chunga inenkawlna man senso bat dil hi a changkang thlawt lo a ni. Hma i sawn teh ang u!