Civil hospital-a doctor thenkhat min ko khawmin, hmasawnna tur te, insiam rem ngai te leh tul dang tam tak kan Medical Supdt, Dr. Lalhmuchhuaka’n min sawipui a.

Fuihna thu tha tak tak a sawi zingah chuan heti hian zuk ti a. “Kei chu pa ropui tak pawh ka ni lo mai thei, mi zawng zawng hriat pawh ka ni lo ang. Nih tum chi pawh a ni lo. Inchhuanna erawh ka nei ve. Ka pension ve tep tawh a. Sawrkar hna thawkin damlo enkawlnaah theihtawp ka chhuah ve thin a. Ka ipteah hian sawrkar sum, ka chanvo tur ni lo hi cheng khat pawh ka ak haw lo a, ka mi mal motor-ah hian sawrkar petrol litre khat pawh ka thun lo,” a ti.

A la sawi lai mek chuan doctor rualin kut kan beng a. “Pa ropui tak ka ni lo,” a ti na a, pa ropui tak a ni tih kan pawm tlat a ni.

Sawrkar hna thawk kan tam hle a, kan thawh a inang lo. “Ka theihtawp ka chhuah, ka eiru lo,” tingam hi engzat tak awm ang i maw??

“Sum eiru lo” hi chu a awm theih viau ang. Eiruk duh ve rilru tho; mahse, eiruk tur awm chuang lo te, eirukna remchang nei ve lote hi kan awm teuh ang. Chung ho chuan ei ruk loh han chapopui viau tur kan nei lo. Eiruk tur pawh awm, remchang pawh nei, eiru lo hian chhuan tur an nei thung.

Theihtawp erawh chhuah thei vek kan ni. Mahni hnaa theihtawp chhuah mai hi a tawk maw le. Chuti chung chuan theihtawp chhuah lo hi kan tam hle. Mahni hnaa theihtawp chhuah chuan an hna hi an hmingthatpui mai.

Mahni hna concern ni loa hmingthan daih hi awm theih a ni. Thil dik lo chu a ni hauh lo. Mi pakhat hian thil hrang hrang a buaipui theih a, a hlawhtlinpui theih a, a hmingthatpui theih vek. Chuti chung chuan kan hna berah hian kan thawk tha em tih hi a pawimawh.

Dr. Hmuchhuaka chu kawng dangin a lar lo a ni mai thei. Doctor thiam a nihna a larpui mai. Chu chu a hna a ni. Eiru thei dinhmuna (sum khawih ve pha, Ofis pakhat hotu) a awmna pawh a rei ve ta. Chuti chung chuan huai takin ‘Rs 1 pawh, litre khat pawh a hawn loh thu’ a sawi ngam.

Mi thenkhat chuan an eiruk loh thu an sawi ve fo mai thei e. Miin an awih chuang lem lo mai thei. Mi thenkhat chuan an eiruk loh thu an sawi a, kan awih mai. Ei ru lo tam tak hian insawi ve lo mahse an eiru lo tih kan rin nghal an awm bawk. An ei ru lo tih kan awih thlap sa, mi ropui tak tak hi Mizoram sawrkar hnathawk zingah hian an awm teuh.

Mahni hna tha taka thawk leh eiru lo hian kut ben an phu kan ti a, kut kan beng ta a nih kha!