Keini chu, keini mi tlêm tê zîngah mî hriat kan han ni tan ve êk êk a. Kan zai atang te, man chawia music video kan siam atang te, Miss thlannaa a thleng sâng pâwl kan nih ve avâng te, TV faknaa kan lan ve avâng ten mi’n min lo hre ve tan a. Pawisa lâk luh nâna hman theih khawpin kan YouTube channel min subscribe-saktu (tlâwmngaiin!?) an lo awm ve a—kan zirna kan chawlhsan daih ringawt zêl—hei hi a pawi! Mi lâr, zai thiam lârte leh hollywood star-te kan sawi fo a. An nun khaw lohzia te, an buluk theihzia te leh an chanchin duhawm lo tak tak hriat tûr a tam thin hle. Tûn tum chu, screen-a kan hmuh fo, khawvêla lemchan thiam ber ber, zirna lam pawha mi vântlâng chung lam ni pha ngatte chanchin i’n sawi ve thung dâwn teh ang:

• James Franco:

127 Hours avânga Oscars dawng thei tûra a hming chhawp chhuah ngat, Spider-Man movie hlawhtling taka Harry Osborn lema chang, Hollywood stars mi tlêmtê zînga Academy Awards (Oscars) host pha ngat James Franco hi, Hollywood mipa zînga zirna lama degree ngah ber pâwl a ni. Kum 2008-a University of California, Los Angeles atanga English-a Bachelor’s degree a neih hnuin zirna chhunzawm zêl tûrin New York a pan ngat a—a B.A. hnuin. Hêng zirna in lian pathum ngawtah hian program hrang hrang a rualin a zir rual thawt mai—Columbia University (MFA Writing program), Brooklyn College (Creative Writing), Tisch School of Fine Arts, New York (Directing). Tûnah hian Columbia University atang hian Writing program hi zir zo tawhin Yale University-ah doctoral degree nei tûrin a bei leh mêk a nia aw! Film chang a, screenplay ziak a, direct a, produce reng chungin! People magazine-in Sexiest Men Alive list-a an telh ve kha… zirna chawlhsan phah nân a hmang lo chiang ê!

• Bradley Cooper:

Hollywood actor hlawh hnem ber dinhmun a zâwna kum thum lai luah tawh, Oscars leh Golden Globe Awards nominations eng emaw zât dawng tawh, Bradley Cooper hi thalai movie ngaina zîngah hre lo kan awm âwm lo e. Lemchan lama hlawhtlinna ropui tak a chan bâkah zirna lama mi hlawhtling tak a ni bawk tih hre tel ang u aw… Cooper hi Pace University-a Actors Studio Drama School atanga Acting-a Masters degree nei pha ngat a ni e. A naupan laia nih a châk ber thin chu sipaia tana ‘ninja’ nih a ni mauh mai! A hnuah lehkha zir chhoin English subject-ah a graduate a. Chumi hnuah lemchan lamah kal zuiin a taka lem chan bâkah a zira zir tel chungin Master degree hi a nei a ni.

• Ashley Judd:

Double Jeopardy, Someone Like You, Divergent tea a hmêl kan hmuh American actress, political activist, huminitarian ni bawk, kum 52 mi Ashley Judd hi nu namai a ni lo nasa mai! Country music star Naomi Judd fanu hian college a rah hmain school hrang hrang 13 ngawtah a kal hman a! 2007 khan University of Kentucky atangin Mathematics-ah ngat a graduate a; 2009-ah Union College, Kentucky atangin Honorary Doctors of Humane Letters a hmu leh. 2010-ah Harvard University atangin Public Administration-ah Master degree a zir chhuak leh bawk. Duhtâwk tawh mai âwm, 2016 khan University of California, Berkeley-ah Public Policy-a PhD ti leh tûrin a inziak lût leh a; mahse, lu na benvawn (migraine) a neih avangin a zo thei ta lo hlauh. A film chan tam ber hi a lehkha zir laia a chan vek a nia… M.A. zir zawh loh phah nân a hmang ve lo bawk aw… Master a zir zawh hmâ hian lâr tawh e! Tin, pawngsual tâwk tawh a ni ve tho bawk! Hei vâng hi a ni ang tûnah hian a lemchan lam dah tha rihin khawvêl pum huapa hmeichhe dinhmun tleu tawh siam that nân beihpui a thlâk mêk. 2016 khan United Nations Fund for Population Activities (UNFPA) palai (Godwill Ambassador)-a thlan a lo ni tawh bawk.

• Meryl Streep: ‘

Tûnlai Oscars lalnu’ tih mai tûr, Oscar awards vawi thum dawng a, nominations vawi 21 lai hmua nomination hmu hnem ber record chelh mêktu Meryl Streep hi Hollywood lemchang thiam ber zînga mi a ni; lehkha thiam ber zînga mi pawh a ni! Khawvêla University tha ber pâwl Yale University atanga Acting-a Master of Fine Arts zir chhuak ngat a nih hi aw… Lemchan tuala a lên hma hian Vassar College atangin a graduate a. An professor-te chuan an class-a rilru chak ber leh lehkha thiam thei ber a nih thû an sawi hial. Zirna chawlhsan duh loin Yale-ah hian masters degree nei tûrin a inziak lût leh a, a zir chhuak ta a ni. Ani pawh hi lemchan leh zirna kal kawppui thiam mi a ni. Tûna kum 71 mi ni tawh hi Broadway vêla a inlan hnuah kum 28 mi a nihin film pangngai a chang tan tawh a ni.