•  Mayim Bialik

“Big Bang Theory” TV series kan tuipui chuan Mayim Bialik hi hriat loh theih a ni lo ang. 90s chhoa TV series lãr tak “Blosson, Beaches”-ah pawh lo inlan tawh Bialik hi Hollywood actress zínga Scientist kan tih mai, mi tlêm tê zínga mi a ni. Hollywood stars zínga zirna lama mi chhuanawm leh chhuanvàwr bera sawi hial tùr Bialik hi University of California, Los Angeles (UCLA) atanga Neuroscience-a Doctoral degree nei pha ngat a nih hi!

Kum 12 mi a nih atanga TV series chang tawh hian kum 1993 khan lemchan tual kalsan hmakin College zawm tùrin a inbuatsaih a. Zirna in tha bîk, Yale leh Harvard University-ah te luh theihna remcháng hmu ve ve mah se UCLA a thlang a. Hebrew Studies-ah graduate in, Neuroscience-ah PhD hmu pha hialin a zir chhunzawm a ni.  

Chu mai a ni lo, hormones (pangti péng thununtu) lam a chhui zauna behchhanin fa enkawl dàn (Parenting) lehkhabu, “Beyond the Sling” a lo ziak tawh bawk. Middle school zirlaiten Neuroscience an zir tùr duang pha chin ngat a ni bawk a nia aw…

Kan la sawi loh pawh…

Kan sawi bâk mi lãr, zirna uar tak tak sawi tùr an la awm tún mai. ‘An awmna a hla êm mai,’ kan ti a nih chuan a hnai deuha mi, Kirori Mal College, DU atanga Science leh Arts-a Bachelor’s degree, a double-’ble-a nei thei ngat Amitabh Bachchan te, Shah Rukh Khan te, MBA John Abraham te pawh kan la sawi hman hlei nêm! 

Lemchan thiamho kan han thlúr deuh bîk a; basketball star, tum 15 ngawt NBA All-Star Game-a inlan tawh, Dr. Shaquille O’Neil te; Queen guitarist, arsi lam mi thiam Dr. Brian May te; a hunlaia Supermodel leh fashion icon Christy Turlington te; National Football League  Hall of Famer, Dr. Alan Page te; Electrical Engineer-a Master degree nei pha ngat Rowan Atkinson @ Mr. Bean te; Mathematics-a Master degree nei pha, folk singer Art Garfunkel te; Rock band lãr thin The Offspring vocalist Dr. Dexter Holland te leh mi dang dang, an chanchin chipchiar kan ziak hman ta lo.

Anni chu an véng leh an khua mai ni lo, khawvêla mi lãr a nih tawh hnuah pawh, hming thup ngai hial khawpin lehkha an zir chhunzawm lehzêl duh a nia! An nih ang nih ve châk ringawt hian awmzia a nei ber lo a, an nih ang ni ve tùra taimâk chhuah a, tuar chhel a, tei rei peih a, thawhrim a ngai hmasa zâwk alãwm.

Lãr nia inhriat veleha zirna tàwpsan daih hi … an style a ni ve tlat lo! Anni chu lãr mah se “Zirna An Uar Tlat”! ‘Zirlai tán Zirtàwpni a awm ve lo a; ni tin hi Thawhtanni leh Thawhlehni a ni zêl’ tih hi an thupui a ni miau a …