Ka tleirawl tirh chuan Tuikhuahtlang Kohhranah kan lawi thin a, chutihlai chuan Biak in pawh kan nei lo a, hun eng emaw chen chu mi inhnuaiah kan in khawm thin. Inrinni zan, rilru sawi zanah hian pa pakhat (a hming chu sawi lo ila) chu a ding ve fo thin a, a din apiangin a eng amah hmain, “Ka lawm em em a,” a ti hmasa deuh ziah a, lawmna tur thil thar sawi tur a nei zel mai.

A  ni lah taka, kan thil thlir dan a dik phawt chuan lawmna tur hi a lo awm zel mai a lo a ni. Hetih rual hian thil reng reng hi a awlsam lutuk chuan lawmna chang kan hre lo va, ngaiah kan neih a, malsawmnate pawha tur rengah kan ngai fo thin. Harsa taka kan neih chu kan hlut a, harsa taka kan thawh chhuah chu holam takin kan tiriral ngai lo.

Fa neih theihte hi a tur rengah kan ngai a, malsawmna ropui tak a ni tih kan ngaihtuah lo fo thin. Keini nupa pawh hi fa nei loin kum 6 zet kan awm a, doctor kan rawn tlauh tlauh a, ‘In tha’ min ti zel bawk si. Kan tha a, kan nuin nau a pai thei chuang bawk si lo. Kan beidawn rum rum hnuah nau kan han pai ve ta hlauh a, kan va lawm em. Lungte pawh a chhe rum rum mai. A hnu kum 5-naah a chhang kan han nei leh hlauh bawk a, kan lawm hle a ni. Kan fate pahnih kan neih hma hian nau pai theih beisei vangin kan nu hian inzai (surgery) vawi hnih a paltlang a ni. Awlsam taka fa pai zung zung a, nei zung zung tan chuan fa neih theih hlutziate hi a chiang tawk lo mai thei. Inneih atanga kum 6-naah, doctor tam tak rawn hnuah, inzai hial paltlang hnua fa nei thei chauh kan nih avangin fa neih theih hlutzia hi kan tan a chiang zual a, upain ‘fanua malsawmna’ an lo ti hi a awm viau a ni.

Ram zalenah zalen takin kan awm a, kan duh duh kan ziak a, kan duh duh kan sawi a, a changin sawrkar kan sawisel a, kan duhkhawp lohna kan auchhuahpui a, NGO leh Kohhran thlengin zalen takin kan sawisel bawrh bawrh mai. Kan duh duh sawi thei tura zalenna kan nei hi a hluin, lawmna tur a va ni em. Zalenna hlutzia kan hriat duh chuan Burma ram hi en ila, a chiang mai awm e. Kan zalen anga zalen ve châkin an buai mek a, thisen a luang a, mi tam takin in leh lo leh nunna hlu tak an chân tawh a ni. Keini’n ngaia kan neih, a tur renga kan ngaih hi mite chuan thisenin an lei a, zalenna man hi a sang a sin.

Kan ram sik leh sa nawm dan ringawt pawh hi lawm veng vengna tham a ni. Mi ramah chuan khua a vawhin a vawt lutuk a, khaw vawh vangin mi tam tak an thi a, khua a lumin a lum leh lutuk a, tawrh hlelhawm khawp a ni leh bawk si. Keini ramah chuan thlasik khaw vawtte hi zing ni lum ai tinuam tawk lek a ni a, nipui khaw lum nise vai ram khaw lumte nena khaikhin chuan sawi thu a cheng lo. Khiang hlim hnuaiah han thu ila, thlifimin min chhem a, a dai nghal siai siai thin. Boruak nise a la thiang em em a, vairamah chuan mihring hriselna atana hlauhawm khawpin boruak a bawlhhlawh mek a ni. Kuminah ringawt pawh boruak bawlhhlawh vangin mi singhnih dawn an thi tawh a ni. Tui lian, tlangkang, khawkheng leh sawi thama na lirnghing kan tuar lo ringawt pawh hi lawmna tham a ni. ‘Keini zawng kan chan bik hi kan vannei e’ tia lawm fo tur kan va ni em!

Tin, lawm zel hi a pawimawh a niang, Bible pawhin lawm turin min ti ngun em mai. Eng dinhmunah pawh ding ila, kan lawm zel phawt chuan mi vannei kan ni mai. Lawmna chang hre lo, vuivaina tur hre thei em em, lawmna tur aia vuina tur nei tam zawkte chu an hlim thei lo a, mi vanduai an ni. Mi lungawi, mi lawm thinte hi Setana tan pawh tih an har ngawt ta ve ang. An tia lawm, Pastor pakhat pawh nu thenkhat thahnemngai fal deuhte chuan piangthar lo riauin an hria a, counselling an tum ta a, “Kapu, chhandam i ni tawh em?” an han ti phawng mai a. Chutah chu Pastor chuan, “Chutiang lam ka la ngaihtuah ngai reng reng lo,” a ti ta mai a! A han ngawi deuh vang vang a, “Kei a kar Pathianin hei leh chen a rawngbawl min phalsak hi ka lawm em em a, min chhandam ta lo a nih pawhin ka vui lo ve,” a ti ta daih mai a, nuho chu an dang der e, an ti. 

A bialnu, tunlai tawng takin a ruka a lo star ruk em emin pasal a neih dawn meuh pawhin Vankhama chuan, “Ka thai chang lo mah la khiangawia mi tawnah, hmangaih lung i dum phawt chuan lawm zel tang e,” zuk ti thei a! Heti khawpa mahni hmasial lo rilru hrisel hi a zahawm letling mang e.

A tur renga kan ngaih hi a mal malin han chhut keuh keuh ila, lawmna tur hlir a lo ni. Kan lawm zel phawt chuan mahni hmasial vanga kan tawrh fona tam tak hi kan hnuaichhiah zel dawn a lo ni.