Kan thianpa pakhatin, “Independence Day velah hian zirtirtu leh police hian reward leh award eng emaw hi an dawng fo bik a. Sawrkar hnathawk dang tan hian dawn ve a rem lo ni maw, an dawng ve ngai lo em a! Hnathawktu dang phu tak tak an tam nen,” a ti bul bul a. Tuman a chhanna chu kan hre lem hlei law! Reward emaw Award eng chi pawh hi dawn a har khawp. Tuten emaw eng Award emaw an han dawn hian mi thenkhatin an han sawi nep ngawt thin tak na a, dawn harsa tak an ni vek. Damchhunga Reward emaw Award emaw dawng miah lo tur hi kan tam. Kan thawhrim ve hlawm tehlul nen hian! Eng lawmman mah la dawng lo, dawn phu tak tak si hi an awm teuh ang. Mahni hnaa rinawm taka thawk, mahni kut zala tla hneh zan mai thin, khawtlang leh ram tan pawha thawk nasa, tu khawkhain an uksak lem loh, mi tangkai inthukru, lawmman hmu tlak hmu si lo, chawimawi tlak chawimawi hlawh si lo an tam ang. Mahni phu tawh ‘lawmman’ hi dawng ve zeuh zeuh hlawm ila, chu chuan min tiphur ang a, kan thawk taima lehzual thei ang. Lawmman hian min tiphur thin. Phurna hian mihring min tichak thin. Tun min fak lo mah se, tun min chawimawi lo mah se, eng lawmman mah dawng ngai lo mah ila, rim tak leh phur taka kan hna theuh thawh hi kan tih tur a ni tlat. Mahni intihphur nan erawh mahni lawmman inpek ve hi rilru hian a ngeih e an tia lawm! Mahni infak zut zut hi a tha ber hauh lo mai a, miten min fak nghahte hi a tha. Mahse mahni thatna leh thiam zawng inhriat ve a, mahni tih that hi mahniin hriat ve fo tur a ni. Mi hriatah ni lem lovin mahni infak leh mahni infuihpawrh vete kan mamawh fo. Chu chuan chakna leh phurna min pe a, nun kan hmachhawnnaah leh hna kan thawhnaah hian phurna min pe thei thin. Phurna hi khawvel hmachhawnna atana hmanraw tha a ni. Mahni infuihphur hi mahni theuha lawmman kan inpek theih, kan dawn theih a ni. Mitthlain ‘chawimawina thuziak’ te hi inpek ve tur a nih chu! Mahni infak ruk ve tur a nih chu! Mi zingah erawh infak hauh loh tur. Mi hriat lohin aw, mahni tan chauh aw,mahni infuih phur nan chauh aw! Mi dang hmuhsit nan emaw, chapo nan emaw ni lovin! Thu chauh ni lo, a tak tak ‘reward/award’ pawh hi dawn ve tur a ni. Tuman an pek si loh che chuan mahni inpe leh hmiah rawh. Lian a ngai lo, to a ngai lo, rangkachaka luan leh lunghlua cheimawi kher a ngai lo. I thawkrim hlea i inhriat ni khan lawmman atan i ei chak zawng tak eng emaw, ni danga i ei ngam zen zen loh kha lei la, ei hmiah rawh. I titha ve hlea i inhriat a, nangmah pawhin phu vea i inhriat riau ni khan i it tak, i la neih ngam loh deuh si kha lei ve tawh rawh. Hna hautak tak i thawh zawh khan ‘lawmman’ inpek ching ve teh. Mahni leh mahni reward inpek hi rilru hah rim tawng tur laka invenna tha tak a ni ve tlat nia. Lawmman hian min tihlim thin si a. Mahse i ‘lawmman’ atan chuan i nun kal zel atana thil pawi tur erawh chu inpe hauh suh ang che. Zu leh ruihhlo dang chu lawmman atan la lul suh. Thil to leh harsa zawng dawng lul teh suh. Sum sen vakna tur chi chu duh hauh suh ang che. Lawmman reng reng hi dawn a zin lutuk chuan a hlutna a bo thei. Ho lam tak avang leh phu vak lo chunga lawmman dawn fo hian a hlutna a tihniam thei tih erawh hre reng ang che. Lawmman dawnna tlak nia i hriatah khan a khat tawk chauhin aw.. Lawmman hmu tlakin rim takin thawk ang che. Tichuan i hlim ang. Ka thawhrimna zawng zawng avangin ka thinlung a lawm si a, chu chu ka thawhrimna zawng zawnga ka lawmman a ni - Thuhriltu 2:10.